Jeremia 31 - KITABU KITAKATIFU

Avandu va Isiraeli Viranaa Yengo

¹ Yahova avoora, “Ing'inga yiza lwandakave Nyasaye wi zihiiri ziosi zia Isiraeli, kandi valakave avandu vange.

² Mu changalangwi ndaamanyia zimbavasi ku avandu valii nivahononoki mu likuza. Lwa avandu va Isiraeli valindilira ovososi,

³ Inzi ndaaloleka kuvo kutura ihale. Avandu va Isiraeli, inzi muyanzaa kazozo, kunangwa ndazizagilira kumumanyia uvuyanzi vwange vutaveeye nekeheri.

⁴ Munyi avandu va Isiraeli avaveeye avuvuguli vudinyu kuli mukaana mugima inzi, kulwayago ndamwumbaka vuhia na muliyumbaka. Munyi mulavina kigira uvusangari kandi mulakuba vikuli vienyu.

⁵ Munyi mulataga milimi jimizabibu kuvigulu via Samaria, kandi yavo avazavatage navalie ku makuyu gajo.

⁶ Yee, ing'inga yiza lwa avasikari valakalangiliri ku vigulu via Efuraimu, ‘Gendi kuzie Ziyoni, ku Yahova Nyasaye wiitu.’ ”

⁷ Yahova avoora, “Mwimbi nuvusangali ku Isiraeli, ihiiri eveeye enene ligali mu ziosi. Mwimbi lwimbu lwinyu lwi lizominya kovora, ‘Yahova amali kohonyia avandu veve; amali kosoola yavo vosi avatigara.’

⁸ Inzi ndavaleta kutura Ivaale kandi ndavavungiza kutura mukeheri chi lirova. Avavoku navalema valakaze navo, avakali vaveeye nizinda navo avaveeye himbi kwivura, navirane kuli ihiiri enene ligali.

⁹ Avandu vange vazavirane nivalira, nivasaara lwa nambe nimbimilira mulirana. Inzi nambimiliri kuduuka ku migera jiamazi, kunzira inungi yavalivulaa kwikigatira. Mbeeye kuli baba uvandu va Isiraeli kandi Efuraimu nu muyaayi wange wu kutanga.”

¹⁰ Yahova avoora, “Zihiiri mumbulirizi, kandi mulandizi makuva gange muvisuru vie ihale. Inzi ndasalanyia avandu vange, navuzwa ndavavungiza kandi ndavalinda kuli mwayi alindaa chayo chiche.

¹¹ Inzi mali kovoholora avandu va Isiraeli kandi mali kuvahonyia kutura ku ihiiri yi zinguru.

¹² Valakaze kandi valakimbi nuvusangali ku kiguru cha Ziyoni kandi valayanzilira vihaanwa viange - vihaanwa viu vuzwage ni iwaini na maguta, vihaanwa via amagondi ni zing'ombe. Navave kuli mulimi gwa samwa vulahi; valanyora vuli kindu choosi cha venya.

¹³ Kunangwa vakana valavina kandi valayaanza, kandi avasaza, vasoleri navakulundu valasangala. Inzi ndavaleminya mwoyo nukugirung'anyia lisioma liavo kuva vuyanzi, ovovereri vwavo kuva uvusangari.

¹⁴ Inzi ndaha avasaalisi viukulia vinolu, kandi ndigutiza avandu kolondekana ni lienya liavo liosi. Inzi, Yahova mali kovora.”

Zimbavasi zia Yahova ku vandu va Isiraeli

¹⁵ Yahova avoora, “Mwoyo gwahulirika mu Rama, lihulirika lie lisioma linene ligali Raheli asiomeraa avana veve; vosi vamali kukuza, kandi asuuyi koleminywa mwoyo.

¹⁶ Mulekere lilira kandi mweye amaliga ginyu. Goosi agamumali kokolera avana vinyu kuduuka namuhevwe amadanyi; navirane kutura mukivala chumusigu.

¹⁷ Lisuuvirizwa liveeyeho ku ing'inga yinyu yiza; avana vinyu valakirane hango haavo. Inzi, Yahova mali kovora.

¹⁸ “Inzi mbulira avandu va Isiraeli nivavoora muvovereri, ‘Yahova kwali kuli mutugu gutatugwa, navuzwa wakwigiza kutia amalago. Ukwiranyie; kwetegeki kwirana ku ivi, Yahova Nyasaye wiitu.

¹⁹ Kunyi kwasuula ivi, navuzwa nulwazana kwenya kwirane kuive. Inyima lwa waari nuwakakuha amageri, kwinaminya mitwi jiitu mu vovereri. Kwali muzisoni, kigira kwakora uvwoni nikuveeye avasoleri.’

²⁰ “Isiraeli, munyi muveeye kuli mwana wange wandayanza, mwana wandayanza ligali. Ing'inga lwa ndalanga lieta lienyu, Inzi muganaganyiaa nuvuyanzi. Mwoyo gwange goveeye ku munyi; ndava nizimbavasi.

²¹ Mulombe vimanyiru kunzira; mwenyerizi kandi inzira ya mwaleka. Mwilane, munyi avandu va Isiraeli, muzie yengo mu madaala ga mwaleka.

²² Munyi avandu vataveeye nilisuvira, mulavoyavoya kudura ing'inga ki? Inzi mali kolomba kindu kihia kandi keveeye lugano, keveeye lugano kuli mukali asoola umundu musaza.”

Ligasiza lia Vandu va Nyasaye mu ing'inga yiza

²³ Yahova Wuvunyali, Nyasaye wa avandu va Isiraeli avoora, “Lwa naziranyie avandu mukivala chavo, vaza viraniri kovora mukivala chi Ivuyuda kandi namadaala gayo gene, ‘Yahova agaasizi kiguru kitakatifu cha Jerusalemi, havundu hatakatifu ahamenyaa.’

²⁴ Avandu valakamenye Ivuyuda kandi mu madaala gayo, kandi avalimi valakaveyo harara navayi niviayo viavo.

²⁵ Inzi ndakahane zinguru kuyavo avaliva nivaluhi kandi ndakigutizi vuli mundu uliva mudedekere kigira inzara.

²⁶ Kunangwa avandu valakavoole, ‘Inzi ndaazia kogona ma nimbuka nimbeeye nizinguru.’

²⁷ “Inzi, Yahova, mboraa ndi ing'inga yiza lwandikora kivala cha Isiraeli ni Ivuyuda kwizura mu na avandu nizinyama.

²⁸ Kandi kuli ndaahenda mwoyo nukwiiha, nukusambula, nukutung'aminya, nukudiviza, kandi nukuvasambura, kunangwa ndavasingiriza kandi ndavadinyiriza.

²⁹ Lwa ing'inga yeyo iliduuka, avandu sivalivoolaku kandi, ‘Vivuli valia mazabibu jizisalulwa, Navuzwa avana vanyoola chafuunya zisalulwa.’

³⁰ Muvogono yivwo, ku vosi ulilia mizabibu jizisalulwa amiinu geege galakuza; kandi vuli umundu alakakuzi kigira uvwoni vwivwe mwene.”

³¹ Yahova avoora, “Ing'inga yiza lwa ndilomba lilagana liange lihia navandu va Isiraeli kandi navandu vi Ivuyuda.

³² Sinalive kuli Lilagana lia Ndalomba navaaguuga vaavo lwa ndaavagumira mukono nukuvimilira kutura mu kivala cha Egebeti mba. Kali niiva ndaali kuli musaza kuvo, sivalinda lilagana liene yilio mba.

³³ Lilagana lihia liandilomba navandu va Isiraeli lilakave kuli ndi? Inzi ndakaviiki lilaga liange muvo kandi ndakaling'ode mu mioyo jaavo. Ndakave Nyasaye wavo, na valakave avandu vange.

³⁴ Siaveeyeho kali mulala waza wigizi wache kumanya Yahova, kigira vosi valakamanye inze, kutura kumukekeeke kuduuka kumunene. Inzi ndakasamihi vwoni uvwavo kandi sindakizulizi uvudamanu vwavo mba. Inzi, Yahova, mali kovora.”

³⁵ Yahova ahaanaa liuva kigira uvulavu vwilidiku, mweli nizing'ereng'ani viaka vudiku. Ahunzulanyia inyanza ma agekola kuhuuma; lieta lilie ni Yahova Wuvunyali.

³⁶ Inzi sindivilira kuhaana malago yago mba, kandi sindaleka Isiraeli ivuli kuzizagilira kuli ihiiri mba. Inzi, Yahova, mali kovora.

³⁷ Niiva lidiku lilala ligulu liakagereywi kandi imise jilirova kohenzerizwa, maku yakasuyi avandu va Isiraeli kigira kugoosi agavamali kokora. Yahova amali kovora.

³⁸ Yahova avoora, “Ing'inga yiza, lwa Jerusalemi yoosi lilakumbakwe vuhia kuli lidaala liange, kutura ku munara gwa Hananeli kuduuka ku kirivwa chu mukoona.

³⁹ Kandi lwako lulungi lulazizagilira kutura hene yaho kuduuka ku kiguru cha Garebu maku evodong'ane kuzia Goa.

⁴⁰ Livona liosi, havundu havakuzu vaayavirwa kandi ahiligoke lisiuvwa, kandi imilimi jiosi igulu wu mugera gwa Kidironi kuduuka ivugwi wi kirivwa chi Barasi nahave hatakatifu hange. Lidaala yilio sililononywa anoho kudivizwa mba.”