Jeremia 30 - KITABU KITAKATIFU

Lilagana lia Yahova ku avandu veve

¹ Yahova, Nyasaye wa avandu va Isiraeli,

² yambolera: “Ng'oda mukitabu vindu viosi viamali kokovoolera,

³ kigira ing'inga yiza lwananziranyie avandu vange va Isiraeli na Ivuyuda. Inzi ndakaviranyiri mukivala chandaahana ku avaguuga vaavo, kandi na vavuguli imiandu jiacho. Inzi, Yahova mali kovora.”

⁴ Yaga na makuva ga Yahova yamoloma kolondekana na Isiraeli ni Ivuyuda:

⁵ “Inzi ndaahulira lilira liukutihiza, lilira liuvuti kandi litaveeye liemirembe.

⁶ Kalunu uganaganeku yaga! Musaza anyala kwivura mwana? Kigira ki ndolaa vuli musaza uviiki makono kunda yeeye kuli mukali oveeye mulilumwa lielivula? Kigira ki vuli mundu aveye novoveleli mumoni?

⁷ Lidiku liuvudinyu lizaa; sihaveeyeho nilidiku linyala kufwanana nalio mba, ing'inga yuvudinyu ku avandu va Isiraeli, navuzwa valahona.”

⁸ Yahova Wuvunyali avoora: “Lwa lidiku yilio liliduuka, inzi ndakavunanye iniira eveeye kumagoti gaavo, kandi ndakatulizi minyororo jayo, sivaliva avatugwa vavageni kandi mba.

⁹ Muvogono yivwo, valakatumikiri inzi, Yahova Nyasaye wavo, kandi chisukululwi cha Daudi, cha nangore mwami.

¹⁰ “Avatumikiri avandu vange Isiraeli, mutatia mba; avandu va Isiraeli, mutatiihizwa mba. Ndamusoola kutura mukivala chi ihale yicho, kutura mukivala chamuveeyemu avahambe. Munyi na mulirana yengo kandi namumenye mumirembe; munyi na mukingwi, umundu kali mulala sinaamutihizi mba.

¹¹ Inzi nanzizi kumunyi kandi naamuhonyie. Inzi ndakadivizi zihiiri ziosi uwa inzi mali kumusalanyira, navuzwa sindamudiviza mba. Inzi sindaleka muzie vugira kohevwa amageri mba; navuzwa lwamuha mageri sinagave amalulu ligali mba. Inze, Yahova mali kovora.”

¹² Yahova avolera avandu veve, “Zingwago zienyu sizinyala kohona mba, zingwagu zienyu sizinyala kohona mba.

¹³ Umundu avulaho kali mulala unyala ku umulinda, runyasi lwizingwagu zienyu luvulaho, lisuuvira kigira ovohonyi ku munyi si liveeyeho mba.

¹⁴ Avayaanze vinyu vosi vamali ku mwivilira; sivamuhendera mwoyo mba. Inzi mali kumwingilira kuli musigu; amageri ginyu gaveeye amalulu, kigira vwoni vwinyu voveeye vunyingi ligali; kandi uvuchamu vwinyu voveeye vonene ligali.

¹⁵ Mutililira kandi kigira zingwagu zienyu mba; ovohonyi si voveeyeho ku munyi mba. Inzi ndaamuha mageri kuli ndio, kigira vwoni vwinyu voveeye vunyingi; kandi uvuchamu vwinyu voveeye vonene.

¹⁶ Navuzwa kalunu, vosi avamudiviza navo kandi ndavadiviza, kandi avasigu vinyu vosi valahirwa ihale kuli vahambe. Vosi avamudambizaa navo kandi valadambizwa, kandi vosi avamuranya navo valaranywa kandi.

¹⁷ Inzi ndamukora muve vulahi kandi; ndahonyia zingwago zienyu, kali nbiiva vasigu vinyu vavoola, ‘Ziyoni imali kolekwa; umundu kali mulala sialivahendera mwoyo mba.’ Inzi, Yahova mali kovora.”

¹⁸ Yahova avoora, “Inzi ndiraanyia avandu vange mukivala chavo, kandi ndava nizimbavasi ku avandu va Isiraeli; Jerusalemi ilumbakwa vuhia, kandi zinyumba ziayo ziuvwami ziliranywa.

¹⁹ Avandu vamenyayo valimba zinyimbu zielizominya; valahanzuka nuvusangali. Kigira ligasizwa liange valamedeka ligali; ligasiza liange lilavaletera luyali.

²⁰ Inzi ndiranyira ihiiri zinguru ziayo ziakale, kandi ndagisingiriza vudinyu ligali; Inzi ndahaana amageri kuvoosi avavadambizaa.

²¹ Aviimiliri vaavo valatura mukivala chavo chene, avanene vaavo valatura hagati ha avandu vaavo vene. Ndamugerihiza, na alisunda himbi ku inzi, nivwaha unyala kogeriza kuuza vugira kogenihizwa?

²² Navave avandu vange, kandi inzi ndava Nyasaye wavo. Inzi Yahova mali kovora.”

²³ Uvutima vwa Yahova voveeye kuli chihi, imbuzaa induru ligali ilahuuza ku mitwi ja vandu avuvuchamu.

²⁴ Uvutima vwa Yahova vululu sinavugirung'ane mba kuduuka lwa naduukizi ilienya liezing'anagani zizie. Mumadiku gaaza mulakamanye yaga.