Jeremia 3 - KITABU KITAKATIFU

Avandu va Isiraeli Vataveeye avasuuvirifu

¹ Yahova yavolera avandu va Isiraeli: “Niiva umundu alakunga mukali weve, naamuleke agwi mukali wu musaza wundi, sianyala kumwiranyia kandi mba. Yaga galononyia kivala ligali. Navuzwa munyi avandu va Isiraeli mwasigamira avanyasaye vandi vanyingi, kalunu mwenya mwirane ku inzi!

² Henza kuzindongozi zivigulu. Haveeye kuho nahavundu handi hamukikiri kuva avasuuvirifu? Mulindiliraa avayaanze kunzira kuli Muharabu alindiliraa avasigu muchangalangwe. Mumali kwononyia kivala nukuvula kuva avasuuvirifu.

³ Yiki nicho chagira imbura nivula kukuba kandi imbura ying'inga yilisembera nivula kuuza. Kali muheezaa kuli avataveeye avasuuvirifu; muvura zisoni.

⁴ “Nakalunu mumbolera, ‘Inzi mbeeye baba winyu, kandi mwayinyanza kutura ing'inga yandaali mwana.

⁵ Simulasinyika ing'inga yoosi mba; simulava nu vutima kigira inzi kazozo mba.’ Isiraeli, yago nigo gamwavora, navuzwa mwakora uvudamanu vwosi kuli munyala.”

Isiraeli na Yuda Kuduuka Viganiri

⁶ Yahova yambolera mu madiku giliamiiha liumwami Josia, “Ololi aga Isiraeli, mukali utaveeye musuuvirifu oyo akoli? Agirung'ani kutura ku inzi, kandi kukigulu choosi kitambi kandi isi wu musaala muvisi gwosi akoli kuli utaveeye musuuvirifu.

⁷ Ndaaganaganyia ndi namali kokora yaga goosi alirana kuinzi, navuzwa siyirana mba kandi amwavo weve Yuda utaveeye musuuvirifu yalora goosi.

⁸ Yuda kandi yalora ningunji Isiraeli vazie ihale kigira vaali nivagirung'ani kutura ku inzi nivagwiyi avataveeye avasuuvirifu. Navuzwa Yuda utaveeye musuuvirifu amwavo wa Isiraeli siyaali nuvuti mba. Oyo kandi yagwa utaveeye musuuvirifu

⁹ kandi siyalolaku zisoni mba. Yononyia kivala navula kuva musuuvirifu, nasigamira amagina ni misaala.

¹⁰ Inyima wivindu yivi, Yuda amwavo utaveeye musuuvirifu, wa Isiraeli yagada vuzwayirani ku inzi; siyaali nagiligali mba. Inzi Yahova mali kovora.”

¹¹ Maku Yahova yambolera ndi, kali niiva vandu va Isiraeli vaali nivagirung'ana kutura kuye, vamanyia kuva avalahi kuvita Yuda utaveeye musuvirifu.

¹² Yaanduma kuzia kovoolera Isiraeli, “Avandu va Isiraeli avataveeye avasuuvirifu, mwirane ku inzi. Mbeeye wizimbavasi kandi sindava nu vutima mba; sindava nu vutima nimunyi mihiga ni mihiga mba.

¹³ Mwiyame muveeye namahiolo kandi mwayibaala ku inzi Yahova Nyasaye winyu. Mwiyame ndi hasi himisaala jia amatu mavisi mwayanza avanyasaye vageni kandi simwatia malago gange mba. Inzi Yahova mali kovora.

¹⁴ “Mwirane munyi avandu avataveeye vasuuvirifu; muveeye avange. Ndaavugura mulala kumunyi kutura muvuli lidaala kandi vaviri kutuura muvuli ihiiri, kandi nda mwiranyia ku kiguru cha Ziyoni.

¹⁵ Ndakamuhe avamihi avatizaa kandi valakamwamiihi novogeri nilimanyiriza.

¹⁶ Maku nimumali komeedeka mukivala yicho, avandu sivalamolomaku kandi kigira lisandugu liange lia malago mba. Sivalaliganaganyia anoho kulizuliza mba; kali sivalalienya anoho kolomba ilindi mba.

¹⁷ Lwa ing'inga yeyo iliduuka, Jerusalemi ilakalangwe ‘Endeve yu vwami vwa Yahova’, kandi izihiiri ziosi zilakavuganiri wene yeyo kusigamira. Kunangwa sivalalindagilira nokolonda uvudamanu vwimioyo jiavo mba.

¹⁸ Avandu va Isiraeli valahaambana harara na vandu vi Ivuyuda, navosi harara valatura muvuhambe mukivala cha Ivaale navalilana mukivala chandaha avaguuga vaavo kuva imiandu ji mihiga ni mihiga.”

Ivifananyi via Vandu va Nyasaye

¹⁹ Yahova avoora, “Munyi avandu va Isiraeli, ndali nilienya kumuvugilira kuli avana vange kandi nukumuha kivala chuvusangari, kivala kilahi ligali mulirova liosi. Ndaali nilienya munyi muunange baba, kandi muvuli kugirung'ana kutura ku inzi.

²⁰ Navuzwa kuli mukali utaveeye musuuvirifu, simuveeye avasuuvirifu ku inzi mba. Inzi Yahova mali kovora.”

²¹ Liyoga lihulirika kutura kuzindongozi zie vigulu: navandu va Isiraeli avalira nokogoonya, kigira vamenya muvwoni kandi vayivilira Yahova Nyasaye wavo.

²² Mwirane, munyi vosi avamali kugirung'ana kutura ku Yahova; alamuhonyia nukumukola kuva avasuuvirifu. Muvooraa, “Yee, kuuza ku Yahova kigira aveeye Nyasaye wiitu.

²³ Sikwakonywaku kali hakuzu nilisigamira avanyasaye kuzindongozi zii vigulu mba. Ovokonyi vwa Isiraeli vutura ku Yahova Nyasaye wiitu.

²⁴ Navuzwa lisigamira Baali nyasaye wizisoni, limali kokora kogotizi iviayo ni mitugu kandi navana vayaayi na vakana, nivindu viosi iviavaguuga viitu vanyola muliyinzira vudinyu kutura muzing'inga ziakale.

²⁵ Gakuduukiraa kogone hasi muzisoni kandi koleke lileganywa lietu likukuniki. Kunyi navaaguuga viitu kumali kwakora uvwoni ku Yahova Nyasaye wiitu haali kanyingi. Sikwatia malago geege mba.”