Jeremia 29 - KITABU KITAKATIFU

Ibarwa ya Jeremia ku vandu vi Vuyuda mu Babiloni

¹ Yiyi ni Ibarwa ya ndaang'oda kuzia ku avasaalisi, avaporofeti, aviimiliri, harara na avandu vosi ava Nebukadineza yaali naahiri kutura Jerusalemi kuzia Babiloni kuli avahambe.

² Ndaang'oda Ibarwa yiyi inyima wu mwami Jehoyakini na mama weve, harara na avanene vi inyumba yu vwami, aviimiliri vi Ivuyuda kandi Jerusalemi, avasiza na avaturi vaali nivahiliywi mu vuhambe mu Babiloni.

³ Ndahaana Ibarwa yiyi ku Elasa mwana wa Shafani na Gemaria mwana wa Hilikia, avu Mwami Zedekia wi Ivuyuda yaali natumi ku mwami Nebukadineza wa Babiloni. Ibarwa yiyi yaali kuli ndi:

⁴ “Yahova Wuvunyali, Nyasaye wa avandu va Isiraeli, avoora ku avandu vosi avayavugilira mwami Nebukadineza kuhila mu lihaminywa kutura Jerusalemi kuzia Babiloni:

⁵ ‘Mwumbake zinyumba na mumenye mu. Mutage milimi na mulie ku via mugesa.

⁶ Muleete avakali na mwivuli avana. Avana vinyu avayaayi valeete avakali, na avana avakaana vazie zingali, kunangwa vaduuki kwivura avana vayaayi na avakaana. Livulana lienyu limeedeke, na mutagehera mu livula mba.

⁷ Mukore agaveeye amalahi mu lidaala linene yilio, lya inzi mali kumuhila kuva kuli avahambe. Musaale ku inzi kigira lidaala yilio. Niiva valagasizwa nimiandu, munyi kandi mulagasizwa nimiandu.

⁸ Inzi Yahova, Nyasaye wa avandu va Isiraeli, mwiganihizaa ndi, mutaleka avaporofeti, avasigitiri na avakumu avamenyi hagati hinyu vamugade mba. Mutahulirizi ku maloto gaavo mba,

⁹ kigira vaporofeta ovovehi ku munyi mu lieta liange. Inzi si ndaavatuma mba. Inzi Yahova Wuvunyali, mali kovora.’

¹⁰ “Yahova avoora, ‘Lwi mihiga 70 jimalirika ni muveeye mu Babiloni, ndaaza kumugeniha kandi ndaduukiza lilagana liange ku munyi na ndamwilanyia mu kivala cha Isiraeli.

¹¹ Inzi manyirizi ligali lilohiza liange ku munyi, lilohiza lie zing'anagani zindahi, zitaveeye zindamanu mba; lilohiza liu kuhaana ligasizwa kandi lisuuvirizwa mu ing'inga yizaa.

¹² Maku mulanira ku inzi. Mulaza kusaala ku inzi, na inzi ndamuhulira.

¹³ Munyi mulanyenyeriza na mulanyola, kigira mulanyenyeriza ni mioyo jinyu josi.

¹⁴ Inzi mboraa, mulanyola kandi ndamwiranyia mukivala chienyu. Ndamwiranyia harara kutura mu vuli kivala kandi kutura vuli havundu hoosi ahandaamusalanyia, kandi ndamwiranya mukivala chandaamutulizamu nimuhila mu lihaminywa. Inzi Yahova, mali kovora.’

¹⁵ “Munyi muvooraa ndi, Yahova umali kumuha avaporofeti mu Babiloni.

¹⁶ Hulirizi ku aga Yahova avoora kigira umwami uwamihaa mu vwami vwa Daudi yamiha, kandi kigira avandu vi lidaala linene yili, aviiko vinyu, avavura kuhirwa mu vuhambe harara ni munyi.

¹⁷ Yahova Wuvunyali avoora, ‘Inzi ndaleta kuvo iliihi, inzara enene ligali kandi uvulwaye, kandi ndavakora vave kuli amakuyu gaguunda agaveeye amadamanu ligali kali agatanyala kulivwa mba.

¹⁸ Inzi ndavalonderera ligali ni liihi, inzara enene ligali nu uvulwaye; kandi zihiiri ziosi zie lirova zilava nu vuti vunyingi ligali kolola yaga. Vuli havundu hoosi hambahila, avandu valava ni ligenya kandi nuvuti ku agaamali kokoleka kuvo. Avandu valavasekeriza nukuvakolera kehenyahenye, kandi kutumikira amita gaavo kuva kuli kilaamo.

¹⁹ Yaga galakoleka kuvo kigira si vahulira amakuva gandazizagilira kutuma kuvo kuvitira ku avatumikiri vange avaporofeti, navuzwa sivahulira.

²⁰ Muhuliri amakuva ga inzi Yahova mboraa ku, munyi avandu vosi avandaatuma kuzia mu liadikizwa mukivala cha Babiloni.’

²¹ “Yahova Wuvunyali, Nyasaye wa avandu va Isiraeli, amali kovora kigira Ahabu mwana wa Kolaia na Zedekia mwana wa Maaseia, avavoora kumunyi ovovehi mu lieta lilie. Avoora ndi alamuviika mu zinguru zia Nebukadineza, mwami wa Babiloni, naye alaviita imbiri winyu.

²² Lwa avandu vaahirwa mu vuhambe kutura Jerusalemi kuzia Babiloni venya kulaama mundu, valavoora ndi, ‘Yahova, yaanza uvakolere kuli wakolera Zedekia na Ahabu, avu mwami wa Babiloni yasamba mu muliru nivakikiri mwoyo!’

²³ Yiki kilava ikivi kuvo, kigira valoleki kuva nuvwoni uvudamanu ligali. Vamali kokora ovoheyi kandi vamali kovora ovovehi mu lieta lia Yahova. Yaga gaali amadamanu ku Yahova; yamanya ligali agavamali kokora, kandi aveeye mulolekizi kuvo. Yahova Wuvunyali umali kovora.”

Ibarwa ya Shemaya

²⁴ Likuva lia Yahova liaduuka ku inze kovoolera Shemaya Munehelami ndi,

²⁵ Yahova Wuvunyali, Nyasaye wa avandu va Isiraeli avoora: Ivi waang'oda zibarwa mulieta lilie kandi watuma ku avandu vosi avaveeye mu Jerusalemi, kandi ku Zefania mwana wa Maaseia musaalisi, kandi ku avasaalisi vosi kovora:

²⁶ “Zefania, Yahova yakola ivi kuva musaalisi mu vogono vwa Jehoyada, kandi kalunu oveeye umunene mu Litembeli. Nu Vunyali vwuvwo kolola ndi mundu woosi oveeye umulalu, kandi wekolaa umuporofeti, agumilwi nokovofwa ni minyororo kandi kumuviika munyumba ya avahambe.

²⁷ Kigira ki si wavula kokora yaga ku Jeremia wa Anazozi, wamolomaa kuli muporofeti ku avandu?

²⁸ Yavolera avandu mu Babiloni ndi mulamenya mu lihaminywa ku zing'inga zinyingi. Kunangwa, mwumbake zinyumba mumenye mu kandi mulimi milimi na mulie ku via mugesa.”

²⁹ Musaalisi Zefania yasomera ibarwa yiyi. Jeremia,

³⁰ maku, Likuva lia Yahova liaza kuinzi Jeremia.

³¹ “Tuma amakuva ku avandu vosi vi lihaminywa mu Babiloni, uvavoolere ndi, kigira Shemaya amali koporofeta ku munyi lwa inzi ngikiri kumutuma, kandi amukoli kusuuvira ovovehi,

³² Kunangwa, ndahaana amageri kuye harara ni visukululwi vivie. Sialakaveho mundu kali mulala ulimenya hagati ha avandu yava ulilola uvulahi vwa ndakakolele avandu vange, kigira amali kwibaala ku inzi Yahova.”