Jeremia 28 - KITABU KITAKATIFU

Jeremia nu Muporofeti Hanania

¹ Mu muhiga mulala mwere, mulitanga lie liamiiha liu mwami Zedekia wi Ivuyuda, mu mweli gokolaa katano ku muhiga gwa kane, Hanania mwana wa Azuri, muporofeti kutura Gibeoni, yamoloma ku inzi mu Litembeli. Yambolera imbiri wa avasaalisi kandi avandu vosi ndi,

² Yahova Wuvunyali, Nyasaye wa avandu va Isiraeli avoora: “Inzi mali kutulizaho zinguru ziu mwami wa Babiloni.

³ Ku ing'inga yi mihiga 2 ndilanyia havundu hano mavikiru goosi gi Litembeli gu mwami Nebukadineza yaahira Babiloni.

⁴ Kandi ndilanyia Jehoyakini muyaayi wa Jehoyakimu mwami wi Ivuyuda, harara na avandu vosi vi Ivuyuda avaazia mu lihaminywa mu Babiloni. Yee, ndavunaga zinguru ziu mwami wa Babiloni. Inzi Yahova mali kovora.”

⁵ Maku ndaavolera Hanania imbiri wa avasaalisi kandi na avandu vosi avaari ni vasingiyi mu Litembeli:

⁶ “Amini Yahova akole ndio. Yahova akole amakuva gu voporofeti vuvwo kuva giligali, kandi yiranyie hano mavikiru gu mu Litembeli ga yaahira Babiloni, harara na avandu vosi avaaziayo mu lihaminywa.

⁷ Navuzwa huliriza amakuva gambolaa ku ivi kandi ku avandu.

⁸ Avaporofeti vaaliho imbiri wange kandi imbiri woovo, ku ing'inga yakale, vaporofeta makuva kigira vulwani, inzara enene kandi uvulwaye vilakaze ku vivala vinyingi kandi ku vwami vwizingulu ligali.

⁹ Navuzwa muporofeti aporofetaa amakuva gi mirembe alamanyikana kuva muporofeti wa Yahova amali kutuma lwa ovoporofeti vwivwe vuva vwagiligali.”

¹⁰ Maku muporofeti Hanania yavugula iniira yu mwami nagituliza ku ligoti liange, kandi nagivunanyia mu vidonye;

¹¹ kandi yavoola imbiri wa avandu vosi: “Yahova amali kovora ndi, nindio alakavunanyie iniira mwami Nebukadineza yavika ku magoti gi zihiiri ziosi; na alakola ndio ku ing'inga yi mihiga 2.” Maku ndaazia.

¹² Ing'inga yindi inyima wu muporofeti Hanania yaali ni yakavunanyia iniira kutura ku ligoti liange, Yahova yambolera

¹³ nzie na mbolere Hanania: “Yahova avoora ndi, unyala kuvunanyia iniira yu musaala, navuzwa alalomba iniira yi kivia mu vogono vwayo.

¹⁴ Yahova Wuvunyali, Nyasaye wa avandu va Isiraeli, avoora ndi, alaviika iniira yi kivia ku zihiiri ziosi kandi zilatumikira mwami Nebukadineza wa Babiloni. Yahova avoora ndi, kandi alakola kali zinyama ziu mbulimu kutumikira mwami Nebukadineza.”

¹⁵ Maku ndavolera Hanania ndi, “Huliriza, Hanania! Yahova si yatuma ivi mba, kandi okoli avandu yava kusuuvira ovovehi.

¹⁶ Kunangwa, Yahova mwene avoora ndi, alakutuliza ku kivala muhiga gunu nigukiri kufwa, ulakuza kigira umali kovoolera vandu kwibaala ku Yahova.”

¹⁷ Ku muhiga gwene yigwo, ku mweli gwa saba, muporofeti Hanania yakuza.