Jeremia 27 - KITABU KITAKATIFU

Jeremia Wiviki Iniira

¹ Nonoho inyima wa Zedekia mwana wa Josia yagwa mwami wi Ivuyuda, Yahova yambolera

² nzelombere iniira yu musaala kandi mugoye gwo lokova ma nziviki ku ligoti liange.

³ Maku Yahova yambolera ndumi amakuva ku avami va Edomu, Moabu, Amoni, Tiro na Sidoni kuvitira ku avatumwa vaavo avaari nivaazi mu Jerusalemi kolola mwami Zedekia.

⁴ Yahova Wuvunyali, Nyasaye wa avandu va Isiraeli, yambolera ndage avatumwa yava, vavoolere avami vaavo ndi;

⁵ “Kuvunyali vwange ovonene kandi kuzingulu ziange ndaalomba kivala, avandu kandi ni zinyama ziosi izimenyi ku lirova; kandi mbanaanga ku mundu woosi wa inzi mwene mali kotovola.

⁶ Kalunu mali kuhaana vivala yivi viosi kuzinguru ziu mutumikiri wange, Nebukadineza, mwami wa Babiloni mutumikiri wange, kandi mali kokora kali zinyama ziosi ziu mbulimu kumutumikira.

⁷ Zihiiri ziosi ziramutumikira, kandi ziratumikira muyaayi weve kandi nu mwisukulu veve kuduuka lwa ing'inga iduuka lwa kivala chiche umwene kilakahele. Hene yaho, zihiiri zinyingi harara na avami vanene ligali valakamukole kuva avatugwa vaavo.

⁸ “Navuzwa niiva ihiiri yoosi anoho uvwami vwosi si vulatumikira Nebukadineza mwami wa Babiloni, kandi niiva si valamutia nu kwegehiza imbiri weve, inzi Yahova ndahaana amageri ku ihiiri yeyo mu liihi, ninzara enene kandi nuvulwaye kuduuka lwa mwami Nebukadineza avadiviza ligali.

⁹ Kunangwa mutahulirizi makuva ga avaporofeti vinyu mba, anoho avasegetiri, anoho avamaloto, anoho avakumu avavooraa muvuli kutumikira mwami wa Babiloni.

¹⁰ Avandu yava vamugada na valamukola muvugulwi kandi muhilwi ihale ligali kutura mukivala chiinyu. Ndamukunga kutura mukivala yiki, kandi muladivizwa.

¹¹ Navuzwa niiva ihiiri yoosi ilatia nu kwegehiza imbiri wu mwami wa Babiloni, kandi kumutumikira, maku ndavavugilira vamenye mukivala chavo aveene, kandi valimi milimi jaavo. Inzi Yahova mali kovora.”

¹² Ndaavora makuva malala mere ku Zedekia mwami wi Ivuyuda, “Wegehizi ku mwami wa Babiloni. Umutumikiri harara na avandu veve, na mulamenya.

¹³ Kigira ki munyi harara na avandu vovo mwitwi muvulwani anoho ninzara enene ligali anoho nu vulwaye? Yaga nigo aga Yahova amali kovora galakoleka ku ihiiri yoosi ivuulaa kwegehiza imbiri wu mwami wa Babiloni.

¹⁴ Mutahuliriza amakuva ga avaporofeti avamuvoleraa muvuli kutumikira kandi kwegehiza imbiri wu mwami wa Babiloni mba. Vaveeye avaporofeti vu vugadi.

¹⁵ Yahova mwene amali kovora ndi si yatuma avaporofeti yavo kumunyi kovora makuva gu vugadi mulieta lilie mba. Kulwayago alamukunga kutura mukivala yiki, munyi harara na avaporofeti avavooraa uvugadi kandi muliitwa.”

¹⁶ Maku ndaavolera avasaalisi harara na avandu aga Yahova yaali navooye: “Mutahuliriza amakuva ga avaporofeti avavooraa ndi mavikiru gi Litembeli galilanywa vwangu kutura Babiloni. Vavoola amakuva gu vugadi ku munyi.

¹⁷ Mutavahuliriza mba! Mwegehizi kandi mutumikiri mwami wa Babiloni na mulamenya! Kigira ki lidaala linene yili live kuli kitumi cha mang'anye?

¹⁸ Niiva vaveeye avaporofeti va agiligali, kandi niiva vaveeye na amakuva gange, vateeve inzi Yahova Wuvunyali, mburi kuvugilira mavikiru gatigala mu Litembeli lia Jerusalemi kandi munyumba yu vwami yi Ivuyuda kandi vilanywe mu Babiloni.”

¹⁹ Yahova Wuvunyali avoora yaga kigira zitiru, inyanza, uvusingilu, harara na mavikiru gandi viatigala mu lidaala linene yili,

²⁰ via Nebukadineza mwami wa Babiloni yavula kuvugura lwa yaahira Jehoyakini mwana wa Jehoyakimu mwami wi Ivuyuda, harara na aviimiliri vosi vi Ivuyuda kandi Jerusalemi mu lihaminywa kutura Jerusalemi kuzia Babiloni.

²¹ “Muhulirize ku makuva ga inzi, Yahova Wuvunyali, Nyasaye wa avandu va Isiraeli mboraa kigira iviju viatigala mu Litembeli kandi munyumba yu Mwami yi Ivuyuda kandi Jerusalemi:

²² Vilavugulwa na vilahirwa Babiloni na vilavayo kuduuka lwa ndiganagana kuvio. Maku ndavilanyia kandi ndaviviika havundu hano. Inzi Yahova mali kovora.”