Jeremia 26 - KITABU KITAKATIFU

Jeremia Yaleeteywi Mukiyaro

¹ Nonoho inyima wa Jehoyakimu mwana wa Josia yagwa mwami wi Ivuyuda,

² Yahova yambolera, “Singira mumugizi gwi Litembeli na ulandizi amakuva gamali kukulaga ovoole ku avandu vaza kutura mu madaala gi Ivuyuda kusigamira Yahova. Utaleka kindu kali kilala mba.

³ Namusia avandu valahulira mavaleke zinzira ziavo ziuvudamanu. Niiva valahulira, Inzi ndagirung'anyia zing'anagani ziange ziukudiviza ziandoohiza kuvakolera kigira vikolwa viavo vwuvuchamu.”

⁴ Yahova yambolera mbore ku avandu, “Inzi, Yahova, mali koovola ndi kuduuka mutie inzi nokolonda amigizu gandamuha,

⁵ kandi mutegizi amatu ku amang'ana gavatumikiri vange, avaporofeti, avandaazizagilira kutuma kumunyi vuli lwosi. Munyi simwatia agavavoola kali hakuzu mba.

⁶ Niiva mulazizagilira kuvula kutia, ndakora ku Litembeli yili aga ndakora ku Shilo, kandi izihiiri ziosi zielirova zilatumikira lieta lielidaala yili kuli kiramo.”

⁷ Avasaalisi, avaporofeti navandu vosi vahulira nembora amang'ana yaga mu Litembeli,

⁸ kandi lwandaali nindakamara komoloma goosi aga Yahova yaali niyandagi kovora, vangumira nivahanzuka, “Gakuduukiraa witwi kulwayaga!

⁹ Kigira ki novoora mu lieta lia Yahova ndi, Litembeli yili lilava kuli Shilo kandi lidaala yili liradivizwa na siaveeyeho kali mundu ulimenya mu mba?” Maku avandu vizura nivangumberiza.

¹⁰ Maku lwa aviimiliri vi Ivuyuda vahulira agekoleka, vadidikana kutura munyumba yu vwami ni vazia mu Litembeli nivikara mu kirivwa kihia.

¹¹ Kunangwa avasaalisi navaporofeti vavoolera aviimiliri navandu, “Umundu uyu adukanaa kukalagirwa likuza kigira omolomi vudamanu ku lidaala lietu. Mwamuhulira munyi aveene.”

¹² Kunangwa ndaavoora, “Yahova yanduma nandizi vindu viosi viamwahulira nembora kigira Litembeli kandi nilidaala yili.

¹³ Gamuduukira mugirung'anyie liamumenya liinyu kandi nivindu viamukoraa, kandi kuduuka mutie Yahova Nyasaye winyu. Niiva mwahulira, alagirung'anyia zing'anagani zizie ziukumudiviza kuli yavoola alakola.

¹⁴ Navuzwa kulwa inzi, mbeeye mummakono ginyu. Mukore ku inzi aga muloraa kuva amalahi kandi amalungi kumunyi.

¹⁵ Navuzwa mumanye yaga: niiva mulanzita, munyi navandu vilidaala yili mulava nilihiolo liukwita umundu utaveeye nimbara, kigira ni Yahova uwanduma nduuki kumwiganihiza.”

¹⁶ Maku aviimiliri navandu vavoolera avasaalisi navaporofeti, “Umundu uyu yamoloma ku kunyi mu lieta lia Yahova Nyasaye wiitu; atiitwa mba.”

¹⁷ Inyima wa yago, avakulundu valala vasingira nivavolera avandu vaali nivavungi,

¹⁸ “Lwa Hezekia yaali mwami wi Ivuyuda, muporofeti Mika wa Moreshezi yavolera avandu vosi ndi Yahova Wuvunyali amali kovora, ‘Ziyoni yaza ilimwi kuli mulimi, Jerusalemi neeve kuli kitumi cha mang'anye, kandi kiguru chi Litembeli nakigwi mulitu!’

¹⁹ Mwami Hezekia navandu vi Ivuyuda siviita Mika mba. Navuzwa, Hezekia yaaha Yahova luyali kandi nageriza koyeeka kuliyaanzilira lilie. Maku Yahova yagirung'anyia zing'anagani zizie kigira kivi chayaali navooye alaleeta kuvo. Kalunu koveeye ahimbi koleta kivi chilitiihiza kukunyi aveene.”

²⁰ Uria mwana wa Shemaya kutura Kiriazi-Jearimu yaali umundu wundi waporofeta mulieta lia Yahova; yaporofeta makuva malala mere ku lidaala yili ni kivala yiki kuli Jeremia yaali naporofeti.

²¹ Lwu mwami Jehoyakimu navasikari veve navatumikiri veve vahulira aga Uria yaali namali kovora, mwami yageriza kumwiita. Navuzwa Uria yaagahulira; kunangwa yiruka mu vuti nazia Egebeti.

²² Mwami Jehoyakimu, yatuma Elinazani mwana wa Akihori navandu vandi kuzia Egebeti nokoleta Uria.

²³ Vamuleeta ku mwami Jehoyakimu, uwamwiti ni kivavi na muviri gwigwe gwasiuvwa havundu havulavu havayavira vakuzu.

²⁴ Navuzwa kigira ndaali novokonyi kutura ku Ahikamu mwana wa Shafani, sindaviikwa ku vandu nukwitwa mba.