Jeremia 25 - KITABU KITAKATIFU

Mihiga 70 Ju Muvuhambe

¹ Mu muhiga gwa kane ing'inga ya Jehoyakimu mwana wa Josia yaali mwami wi Ivuyuda, ndaanyoora likuva kutura ku Yahova kigira avandu vosi vi Ivuyuda. Yigu gwaali muhiga gwu kutanga lwa Nebukadineza yaali mwami wa Babiloni.

² Ndaavoora likuva yili ku avandu vosi vi Ivuyuda kandi Jerusalemi,

³ “Ku mihiga 23, kutura ku muhiga gwa 13 lwa Josia mwana wa Amoni yaali mwami wi Ivuyuda kuduuka ing'inga yiyi, Yahova umali kumoloma ku inzi, na inzi ndaamuvolera goosi agayaambolera. Navuzwa munyi si mwahulira mba.

⁴ Kali niiva Yahova yaazizagilira kutuma ku mwinyi avatumikiri veve avaporofeti, navuzwa si mwenya kuhuliriza mba.

⁵ Vaamuvolera mugirung'ane kutura kuzinzira zienyu zindamanu kandi ziu vuchamu, kunangwa muzizagiliri komenya mukivala cha Yahova yahaana kumunyi harara na avaguuga vinyu keve kuli miandu ji mihiga ni mihiga.

⁶ Vaamuvolera muvuli kusigamira kandi kutumikira avanyasaye vandi, kandi muvuli kokora Yahova ave nu vutima mu lisigamira vifananyi via mwalomba. Mulava ni mwatia Yahova, ngano si yamuha amageri mba.

⁷ Navuzwa Yahova mwene avoora ndi, mwasuura kumuhulira. Mu vogono vwene yivwo, mwamukola kuva nu vutima ni vifananyi vinyu, na mulikola ndio, mumali koleta amageri geege ku munyi aveene.

⁸ “Kunangwa, kigira si mwahulira, Yahova Wuvunyali, avoora,

⁹ ‘Ndatuma na avandu vosi kutura Ivaale harara nu mutumikiri wange, mwami Nebukadineza wa Babiloni. Valaza kulwaana avandu vi Ivuyuda, harara ni zihiiri ziosi ziveeye ahimbi. Ndadiviza ihiiri yiyi harara ni zihiiri zindi zimenyi ahimbi nayo, na zilatigala hazwa, kilava kindu chokogenyia kandi chukutiihiza ligali mihiga ni mihiga. Inzi Yahova mali kovora.

¹⁰ Ndatuliza kuvo uvusangari kandi uvuyanzi vwa yavo osererwa kandi osereraa, kandi uvulavu kuli vwi itaya vulatula kuvo harara ni viukulia.

¹¹ Kivala yiki choosi kilatigala amang'anye kilava kindu chokogenyia; zihiiri yizi ziratumikira mwami wa Babiloni ku mihiga 70.

¹² Inyima wi mihiga 70, ndahaana amageri ku zihiiri ziosi harara nu mwami wa Babiloni kigira uvwoni vwavo. Ndadiviza kivala yiki ligali na kilatigala amang'anye mihiga ni mihiga.

¹³ Ndahaana amageri ku kivala cha Babiloni, ndaviika kuvo ikivi choosi chi litihiza cha ndalaga ndaleta ku zihiiri lwa ndaamoloma kuvitira ku muporofeti Jeremia. Ikivi yiki choosi ichang'odwa mu kitabu yiki.

¹⁴ Ndahaana amageri ku avandu va Babiloni kigira uvudamanu vwosi vwa vamali kokora. Avami avanene harara ni zihiiri zinyingi zilavaguuta nukuvakola kuva avatugwa.’ ”

Likalaga lia Nyasaye ku Zihiiri

¹⁵ Yahova, Nyasaye wa avandu va Isiraeli, yambolera, “Mbeeye nu vutima uvunyingi kuli kekombe chizuuyi iwaini. Vugula kekombe yiki chuvutima vwange uhili ku zihiiri ziosi zia Inze ngutumaa kuzio, na uvakole kunwa iwaini yiyi.

¹⁶ Lwa vanwa iwaini yiyi, valayekayeka kuli avahambiku kandi valagota zing'anagani, kigira iliihi liandumaa hagati haavo.”

¹⁷ Kunangwa ndaavugura kekombe chi iwaini kutura ku Yahova, ninzia kuhaana ku zihiiri zia Yahova yaali niyandumi ku, kandi ndaavakora vanwi iwaini yiyi.

¹⁸ Jerusalemi kandi na amadara manene goosi gi Ivuyuda, harara na avami kandi na aviimiliri vago, vanwi iwaini yiyi, kunangwa vaduuki kugwa changalangwi, chukutiihiza kandi chokogenyia, kunangwa avandu valatumikira amita gaavo kuva kuli kilaamo kuduuka lero.

¹⁹ Avandu vandi avaanwa ku iwaini yiyi vaali: Mwami wa Egebeti, avatumikiri veve, avanene veve, avandu veve vosi

²⁰ kandi na avageni vosi avaari mukivala cha Egebeti; Avami vosi vi kivala cha Uzi kandi na avami vosi vi kivala cha Filisitia mu madaala manene ga Ashikeloni, Gaza, Ekironi kandi na avandu vaatigara Ashidodi,

²¹ avandu vosi vikivala cha Edomu na Moabu harara na avana va Amoni,

²² Avami vosi va Tiro, Sidoni kandi na avami vosi vi visulu viveeye mu inyanza ya Meditareniani,

²³ na avandu va amadara manene ga Dedani, Tema, Buzi kandi na avandu vosi avavegaa amasu gaavo,

²⁴ avami vosi vi kivala cha Arebia, kandi na avami vosi vi zihiiri ziazugana avamenyaa mu changalangwi,

²⁵ na avami vosi va Zimuri, Elamu na Media,

²⁶ kandi na avami vosi va Ivaale, ihale kandi na ahimbi, mulala sa mulala, kandi ni zihiiri ziosi ziveeye ku lirova. Inyima wa avandu yava vosi kunwa iwaini yiyi, mwami wa Babiloni alava wukumaliriza kunwa.

²⁷ Maku, Yahova yambolera, “Ovoolere avandu ndi, Inzi Yahova Wuvunyali, Nyasaye wa avandu va Isiraeli, mbalagaa vanwi iwaini yiyi kuduuka lwa vahambika kandi valuki, valagwa hasi kandi si valavuka mba, kigira iliihi lia ndetaanga hagati haavo.

²⁸ Niiva valasura kunwa iwaini yiyi kutura ku ivi, hene yaho uvavoolere ndi Yahova Wuvunyali umali kovora ndi kuduuka munwi iwaini yiyi.

²⁹ Ndatanga miyinzi jange ju kudiviza lidaala linene liange mwene. Vasuviraa valahononoka kuhevwa amageri? Awa, valahevwa amageri, kigira ndatuma vulwani ku avandu vosi avaveeye ku lirova. Inzi Yahova Wuvunyali mali kovora.

³⁰ “Ivi Jeremia, kuduuka wilwaze amakuva goosi aga inzi mali kovora. Kuduuka ovoolere avandu yava ndi, ‘Yahova alafuuma kuli isimba kutura mwigulu, kandi alatuluruka kuli inguba kutura hatakatifu hehe mwigulu. Alafuuma kuli isimba ku avandu veve, alahanzuka kuli mundu uduvagaa amazabibu. Vuli mundu woosi omenyi ku lirova alahulira mwoyo gwa;

³¹ kandi mwoyo gwigwe gulahulirikira ku keheri chi lirova. Yahova aveeye ni liyaala ku zihiiri. Alakalagira avandu vosi, kandi aliita avandu vachamu vosi. Yahova amali kovora.’ ”

³² Yahova Wuvunyali avoora ndi, kivi kilaaza ku ihiiri ndala inyima wi yindi, kandi imbuza yi kiihi enene ilaaza kutura ihale ku keheri chi lirova.

³³ Ku lidiku yilio, miviri ja avandu va Yahova amali kwiita jirasalanywa kutura kolovega lulala lwi lirova kuduuka ku lovega lundi. Mundu kali mulala si alajisiomera, kinga si jilavugulwa nukuzia kuyavirwa mba. Miviri yiji jirakave kuli kitumi chi isiina kumalova.

³⁴ Muliri, munyi aviimiliri, munyi aviimiliri va avandu vange, mukubi zikwiri vudinyu! Musiome kandi mugalagale mu luguchi. Ing'inga imali kuduuka kumunyi kusinzwa kuli amagondi amamigu.

³⁵ Aviimiliri sivalakave na havundu hu kwirukira mba, anoho avamihi sivalakave na havundu hu kwivisa mba.

³⁶ Hulirizi lilira lia avayi, kandi lisioma lia aviimiliri vi chayo, kigira Yahova adivizaa vwayiru vwavo.

³⁷ Vigo viavo vie mirembe vilatigala hazwa, kigira uvutima uvululu vwa Yahova.

³⁸ Yahova amali koleka avandu veve kuli isimba elekaa uluhangaywa lwayo. Vutima vwa Yahova kandi litihiza linene lie liihi vimali kugirung'anyia kivala kugwa changalangwi.