Jeremia 23 - KITABU KITAKATIFU

Likuva lie Lisuuvirizwa

¹ Likalaga lia Yahova ku aviimiliri vononyiaa nukusalanyia avandu veve lilakave liukutihiza ligali kulindi!

² Yaga nigo aga Yahova, Nyasaye wavandu va Isiraeli avoora kigira aviimiliri vaduukana vahendere avandu vaavo mwoyo: “Simwahendera avandu vange mwoyo mba; Mwamala kuvasalanyia nukuvakunga vazie ihale. Kalunu nziza kumuha amageri kuvudamanu vwamumali kokora.

³ Inzi ndavungiza avandu vange vandi avatigara kutura muvivala wandaali nimali kuvasalanyira, kandi ndavilanyia mukivala chavo. Navave nulwivulu lunyingi nokomedeka.

⁴ Inzi ndatovora aviimiliri vaza kuvaliindi. Avandu vange sivalatia anoho kutihizwa mba, na sindavaha amageri kandi mba. Inzi, Yahova mali kovora.”

⁵ Yahova avoora, “Ku ing'inga yiza lwa nandovole mwami mulungi mu kisukururwi cha Daudi. Mwami mwene oyo nayamiihi novogeri kandi yaza akole agaveeye malahi kandi malungi mukivala choosi.

⁶ Lwaveeye mwami, avandu vi Ivuyuda navahone, kandi avandu va Isiraeli navamenye mumirembe. Kunangwa navamuguliki ‘Yahova muhonyi wiitu.’ ”

⁷ Yahova avoora, “Ing'inga yiza lwa vandu valivula kwisuha ku inzi kuli Nyasaye oveeye mwoyo, waleeta avandu va Isiraeli kutura mukivala cha Egebeti.

⁸ Muvogono yivwo, valakisuhi ku inzi kuli Nyasaye oveeye mwoyo waleeta avandu va Isiraeli kutura mukivala cha Ivaale kandi kutura muvivala vindi wandaali nindavasalanya. Maku valakamenye mukivala chavo.”

Likuva lia Jeremia ku Avaporofeti

⁹ Mwoyo gwange gusaliriziywi, kandi ndegeraa. Kigira Yahova, kandi kigira mang'ana geege matakatifu mbeeye kuli umundu umali kuhambika, umundu unweye Iwaini inyingi.

¹⁰ Kivala chayizula avandu vataveeye avasuuvirifu ku Yahova; vamenya limenya liuvuchamu kandi vatumikira zinguru ziavo vudamanu. Avandu vi kivala vasioma kandi uvwayilu vwayuma kigira kilaamo cha Yahova.

¹¹ Yahova avoora, “Avaporofeti navasaalisi vaveeye vugira Nyasaye; Inzi mali kuvanyolerera ni vakora uvudamanu mulitembeli.

¹² Zinzira ziavalondamu zilava zindelere kandi ziekisundi; inzi ndavakora vichigatiri kandi vagwi. Nziza koleta kivi kuvo; ing'inga yaavo yokohevwa amageri yiza. Inzi, Yahova mali kovora.

¹³ Inzi mali kolola uvwoni vwavaporofeti va Samaria: vamali komoloma mulieta lia Baali kandi vamali kuchaminya avandu vange.

¹⁴ Navuzwa inzi mali kolola vaporofeti mu Jerusalemi ni vakora uvudamanu ligali: vakolaa ovoheyi nokovoora ovovehi; vakonya avandu kokora uvudamanu, kunangwa siaveeyeho kali mundu mulala olekeraa kokora agaveeye amadamu mba. Ku inzi vaveeye vosi avuvudamanu kuli avandu va Sodoma na Gomora.

¹⁵ “Kunangwa, yaga nigo aga inzi, Yahova Wuvunyali, mboraa kigira vaporofeti va Jerusalemi: inzi ndavaha vitagwa vilulu valie kandi isumu vanwi, kigira vamali kulandiza agataveeye guvulungi mukivala choosi.”

¹⁶ Yahova Wuvunyali yavolera avandu va Jerusalemi, “Mutahuliriza aga vaporofeti vavoola; vamuvolera lisuuvirizwa liuvugadi. Vamuvolera agavamali kuganagana, sigaveeye aga inzi mali kovora mba.

¹⁷ Ku avandu vamali kusuura kuhulira aga inze mali kovora, vazizagilira kovora ndi goosi galava amalahi kuvo. Kandi vavoolera vuli mundu oveeye muhindagirizi ndi kivi sikilamugwira mba.”

¹⁸ Inzi ndavoora, “Siaveeyeho ku vaporofeti yava wamanyiriza zing'anagani zia Yahova ziumuvwivisu mba. Siaveeyeho kuvo wahulira anoho wamanyiriza likuva lilie, anoho kali wahuliriza nokotegiza amatu geege ku aga yavoola mba.

¹⁹ Vutima vwivwe voveeye kuli kihuzuzi kenene, kiihi kenene ichaaza kivitiri kumitwi ja vandu vachamu,

²⁰ kandi sikililekera mba kuduuka lwa alikola goosi agaganagana kokora. Mumadiku gaaza avandu valakamanyirizi yaga vulahi.”

²¹ Yahova yavoola, “Sindaatuma vaporofeti yava mba, navuzwa kalindio vazia. Sindaavaha likuva liosi mba, navuzwa vamoloma mulieta liange.

²² Niiva vakamanyi zing'anagani ziange ziumuvwivisu, ngano vakalandizi likuva liange ku avandu vange kandi ngano vakavakoli koleka limenya lidamanu liavamenyaa kandi ni vindu viuvuchamu viavakola.

²³ “Inzi mbeeye Nyasaye oveeye havundu hoosi simbeeye havundu harara mba.

²⁴ Siaveeyeho nu umundu unyala kwivisa hanyala kuvula kumulora mba. Simumanyi inzi mbeeye havundu hoosi mwigulu kandi kulirova?

²⁵ Ndaamanya vaporofeti yavo kovora avavoora ovovehi mu lieta liange kandi vekola ndi inzi mali kuvaha amakuva gange mu maloto gaavo.

²⁶ Vaporofeti yavo valachaminya avandu vange novovehi vwavo vwavelombela kuduuka ing'inga ki?

²⁷ Vaganagana ndi amalooto gavavora galakola avandu vange vanziviliri, kuli avaguuga vaavo vanzivilira kandi nivagirung'ana vazia ku Baali.

²⁸ Muporofeti oveeye namaloto avoole yaga namaloto vuzwa, navuzwa muporofeti uhuliyi likuva liange gamuduukira alandizi likuva yilio muvusuuvirifu. Nivulahiki ovoveeye mu mukuuzi nogeranyia niingano?

²⁹ Likuva liange liveeye kuli muliru kandi kuli inyundu ivunanyiaa zinyanda muvidonye.

³⁰ Mbeeye nuvusigu navaporofeti yavo avavuguraa mang'ana ga vache nivagalandiza kuli likuva liange.

³¹ Ndunyiraa avaporofeti yavo avamolomaa mang'ana gaavo aveene nivavoora gatuli ku inzi.

³² Muhuliri aga inzi Yahova, mboraa! Ndunyiraa avaporofeti vavoola amalooto gizuraa ovovehi. Vavoola amalooto yaga nukuchaminya avandu vange novovehi vwavo kandi ni liegingira liavo. Inzi sindaavatuma anoho kuvalaga vazie mba, kandi sivaveeye avovokonyi ku avandu mba. Inzi Yahova mali kovora.”

Uvuliduhu vwa Vandu ku Yahova

³³ Yahova yambolera, “Jeremia, kunangwa lwa mulala ku vandu vange anoho muporofeti kinga musaalisi akoteeva, ‘Likuva lia Yahova liveeye ki?’ Mbolere, ‘Ivi oveeye uvuliduhu ku Yahova kandi azizanga kukutulizaho.’

³⁴ Niiva mulala ku avandu vange anoho muporofeti anoho musaalisi natumikira amang'ana, ‘Uvuliduhu vwa Yahova,’ inzi ndamuha amageri navinyumba veve vosi.

³⁵ Muvogono yivwo, mundu samulala ateeve avalina veve naviiko veve, ‘Nilitivuli ki lia Yahova ahaani? Na Yahova avooye ki?’

³⁶ Kunangwa vatazizagilira kutumikira amang'ana ‘uvuliduhu vwa Yahova,’ kigira niiva umundu woosi alatumikira, inzi ndakalombe likuva liange kuva uvuliduhu ligali kuye. Avandu vamali koleka amang'ana ga Nyasaye wavo, Nyasaye oveeye mwoyo, Yahova Wuvunyali.

³⁷ Hene yaho ulavoolera muporofeti, ‘Nikindiki cha Yahova amali kukutivulira? Anoho nikindiki cha Yahova amali kovora?’

³⁸ Kandi nivavula kutia lilago liange nukutumikira mang'ana ‘uvuliduhu vwa Yahova’ maku uvavoolere ndi

³⁹ Inzi ndavavugura ligali nukuvasiuva ihale kutura ku inzi, yavo aveene harara nilidaala liandahana ku harara avaguuga vaavo.

⁴⁰ Inzi ndaleta kuvo zisoni zitahera mba kandi lileganywa lilakavuli kwivilirwa.”