Jeremia 22 - KITABU KITAKATIFU

Likuva lia Jeremia ku vi Inyumba yu Vwami vwi Ivuyuda

¹ Yahova yambolera, “Zia ku inyumba yu mwami wi Ivuyuda na uvavoolere likuva yili,

² Uhuliri Likuva lia Yahova, O, mwami wi Ivuyuda, oveeye ku endeve yu vwami vwa Daudi, harara na avatumikiri veve, kandi na avandu veve avingiraa mu virivwa yivi.

³ “Inzi Yahova, mulaga mukore likalaga liveeye lirungi kandi liu vulungi. Mukingi mundu umali kunuurwa kutura ku munuri. Mutakola uvudamanu anoho mutadambiza avageni, avavisandu anoho avakunzakali mba. Mutiita avandu vataveeye nimbara havundu yaaha mba.

⁴ Niiva mulakola ligali kuli mali kulaga, visukululwi via Daudi vilazizagilira kuva avami. Yavo harara na avanene vaavo kandi na avandu vaavo, valazizagilira kuvitira mu virivwa vieinyumba yu vwami yiyi ni vanini ku magare gu vulwani kandi ku zibarasi.

⁵ Navuzwa niiva simulatia malago gange, hene yaho, inze nzisuha ku munyi ndi, inyumba yu vwami yiyi ilagwa amang'anye. Inzi Yahova mali kovora.

⁶ “Inyumba yu vwami yi Ivuyuda eveeye indahi ligali ku inzi kuli kivala cha Gileadi, kandi kuli vigulu via Lebanoni; navuzwa ndagekola eve kuli changalangwi, havundu ha avandu vatamenya mba.

⁷ Nduma avandu kuza kudiviza inyumba yu vwami yiyi. Valaza ni zimbazi ziavo, valatema nu kugwihiza zitiru ziayo zie midaragwa, nu kujisiuva mumuliru.

⁸ “Avandu kutura mu zihiiri zinyingi valavitira havundu yaaha nokoteeva mundu sa mulala ndi, kigira ki Yahova amali kokora ikindi kuli yiki ku lidaala linene yili?

⁹ Maku valativura ndi gaveeye kigira mumali koleka lilagana lienyu na inzi, Nyasaye winyu, kandi mumali kusigamira kandi kutumikira avanyasaye vandi.”

Likuva lia Jeremia Kigira Joahazi

¹⁰ Avandu vi Ivuyuda, mutalira kigira mwami Josia mba, kandi mutasioma kigira likuza lilie mba. Navuzwa muliri vululu ligali kigira Joahazi mwana weve. Vamuvugura nu kumuhila mukivala chi ihale, si alirana kandi mba, sialalola kivala chiche cha yiivulwa mu kandi mba.

¹¹ Yahova avoora yaga kigira Joahazi mwana wa Josia, uwamiha kuli mwami wi Ivuyuda muvogono vwa baba weve, “Umali kuzia ihale kutura hano, sialirana kandi mba.

¹² Alakuzira mukivala cha vamali kumuhila mu, sialalola kivala yiki kandi mba.”

Likuva lia Jeremia ku Jehoyakimu

¹³ O, vayaayi, kivi keveeye ku mundu wumbakaa inyumba yeeye ni likalaga litaveeye lirungi, kandi wumbakanga kuyo zigorofa uvusuuvirifu. Mundu oyo akolaa avandu kuyinzira vugira kumuha amadanyi kandi si avaheezaa mitungu jaavo mba.

¹⁴ O, vayaayi, kivi keveeye ku mundu ovola, “Inzi ndiyumbakira inyumba yange enene ligali, eveeye ni ving'oze viuvwiyangu muzigorofa; aviiki amadirisha munyumba yeye, kandi akunikaa madigi gayo ni zimbaho zie midaragwa, kandi avakaku irangi inzakanyu.”

¹⁵ Gene yago, uyu kuva mwami mulahi ligali niiva alumbaka zinyumba zie misaala ji midaragwa zindahi ligali kuvita zia avandu vandi? Baba weve yaali ni limenya lilahi. Yaali wi likalaga lirungi kandi mulungi kazozo, kandi yagasizwa mu vindu viosi via yakola.

¹⁶ Yaali ni likalaga lirungi ku avadaka, kandi vwali vulahi kuye. Yiki nicho kivuni kumanya Yahova.

¹⁷ Navuzwa unyala vuzwa kukayirwa lienya liilio umwene; witaa avandu vataveeye nimbala kandi mu kilage udambiza avandu vovo Yahova umali kovora.

¹⁸ Kunangwa, Yahova avoora yaga kigira Jehoyakimu mwana wa Josia mwami wi Ivuyuda, “Mundu kali mulala si alalila kigira likuza lilie anoho sialavoola, ‘nagukutiihiza mulina wange, nagukutiihiza!’ Mundu kali mulala si alasioma kigira likuza liile anoho sialalira nokovoora ‘O, munene wange! Umwami wange!’

¹⁹ Kuli isukiri iyavilwa, mundu uyu alayavilwa ndio, alasiuvwa ichova wi virivwa via Jerusalemi.”

Likuva lia Jeremia kigira Lidivizwa lia Jerusalemi

²⁰ Avandu va Jerusalemi, muzie ku kiguru cha Lebanoni na muhanzuki; muzie mukivala cha Bashani na muliri. Mwaniri kutura ku vigulu via Moabu, kigira avakonyi vinyu vosi vamali kuguutwa.

²¹ Yahova yamoloma ku munyi ing'inga ya mwali ni mwagasizwa, navuzwa mwasuura kuhuliriza. Mwakora yaga mulimenya lienyu liosi, simwali munyala kutia Yahova mba.

²² Imbuza ilahuuza avayi vinyu, avalina vinyu valahirwa kuli avahambe vi liihi, na lidaala lienyu linene lilava mu zisoni kigira uvwoni vwosi vwa mumali kokora.

²³ Mumenyaa mu mirembe mu zinyumba ziumbakwa ni midaragwa kutura Lebanoni; navuzwa mulaverera lwa munyoora vuzunu kuli vwu mukali ulumwaa.

Likalaga lia Nyasaye ku Jehoyakini

²⁴ Yahova yavolera mwami Jehoyakini mwana wa mwami Jehoyakimu umwami wi Ivuyuda, “Ligali kuli inze mbeeye Nyasaye omenya, kali niiva wakaveeye kuli imingiri yu muhuri ku mukono gwange mulungi, ndaakakusiluli kutura ku inzi

²⁵ nu kukuviika ku avandu va ivi utizanga, avandu venya ku kwita. Ndakuviika mu zinguru ziu mwami Nebukadineza mwami wa Babiloni harara na avasikari veve.

²⁶ Ndakuniga harara na mama woovo kuzia mu lihaminywa. Mulazia mukivala cha mutiivulwa mu mba, na vombi mulakuzira uwene yeyo.

²⁷ Mulakegombe kwirana mukivala yiki, navuzwa si mulakakelole kandi mba.”

²⁸ Inzi ndaavoora “Mwami Jehoyakini amali kugwa kuli kiju kimali kwadika, ikisiuviywi ihale kandi mundu siachenyi mba? Yiki nicho chagira oyo harara na avana veve nivahilwa mu lihaminywa mukivala cha vatamanyi kindu choosi?”

²⁹ O, munyi avandu vi kivala chi Ivuyuda; muhuliri aga Yahova amali kovora:

³⁰ “Mundu oyo amali kukalagirwa ku agotiza avana veve, kandi mundu unyala kuzizagilira mba. Si alakave ku ni visukululwi iviliamiiha mu Ivuyuda kuli avavugura uvwamihi kutura ku Daudi mba. Inzi Yahova, mali kovora.”