Jeremia 21 - KITABU KITAKATIFU

Liguutwa lia Jerusalemi Lilolekiziywi

¹ Mwami Zedekia wi Ivuyuda yatuma Pashuri mwana wa Malikia nu musaalisi Zefania mwana wa Maaseia ku inzi kovora,

² “Nuyanza okomolomere ku Yahova, kigira mwami Nebukadineza harara ni liihi lilie vakumbiriza lidaala. Hawundi Yahova alakokolera kilala ku vilolekizu vivie na akole Nebukadineza aleke.”

³ Maku Yahova yamoloma niinzi, kandi ndaavolera avandu vaali nivatumiywi kuinzi

⁴ vavoolere Zedekia ndi Yahova, Nyasaye wa avandu va Isiraeli avoora, “Zedekia nziza kuguuta liihi liilio ililwanaa mwami wa Babiloni harara ni liihi lilie. Inzi ndavungiza viugi viavasikali vinyu hagati hilidaala.

⁵ Inzi ndamulwana nizinguru ziange ziosi, kandi, nu vutima vwange vululu.

⁶ Inzi ndakiti vuli mundu omenyaa mu lidaala yili; avandu harara nizinyama valakuza kigira vulwaye vwukutihiza.

⁷ Navuzwa ivi, navatumikiri vovo, harara navandu vahononoka muvulwani, inzara, kandi nuvulwaye, munyi mwosi mulagumirwa nu mwami Nebukadineza kandi navasigu vinyu avenya kumwita. Nebukadineza yaza namwiiti. Sialileka mundu kali mulala kumunyi anoho kumumanyia zimbavasi anoho liverererwa mba. Inzi, Yahova mali kovora.”

⁸ Maku Yahova yambolera mbolere avandu, “Huliri! Inze Yahova, nyenya mutovole hagati hi inzira izizaa mulivamwoyo ni inzira izizaa mulikuza.

⁹ Umundu woosi ulitigala mu lidaala nayitilwi mu vulwani, anoho aliitwa ninzara anaho nuvulwaye. Navuzwa kuwosi ulitula ichova niyihaana ha vandu va Babiloni, avingiliraa lidaala, sialitwa mba; alahononokiza livamwoyo lilie.

¹⁰ Inzi mali kukalaga sindaleka lidaala yili mba, navuzwa ndalidiviza. Lilaheevwa ku mwami wa Babiloni kandi alalisamba numuliru lishie ligali. Inzi, Yahova mali kovora.”

Likalaga ku Vwami vwa Vandu vi Ivuyuda

¹¹ Kandi, ovoolere vwami vwa vandu vi Ivuyuda, “Muhuliri likuva lia Yahova;

¹² O, Ivisukulurwi via Daudi, yaga nigo aga Yahova avoora: Mukore vulungi vuli lidiku ohonyie oyo umali kunuurwa kutura mu zinguru ziavadambizi, gase vutima vwange vulaloleka kandi vulaaka kuli muliru kigira uvudamanu vwamumali kokora. Namusambwe nasialavaho na mulala ulisiminya mba.

¹³ Munyi avandu va Jerusalemi mwikalaanga hadiguluku hilivona, kuli lwanda lusingilanga igulu mukeleremo. Navuzwa ndalwana ni munyi. Munyi muvolaanga ndi siaveeyeho umundu kali mulala unyala kumwingilira anoho unyala kuvunanyia likingwa lienyu mba.

¹⁴ Navuzwa inzi ndamuha amageri kigira agamumali kokora. Ndasaamba zinyumba zienyu ziuvwami kandi muliru gulasamba vuli kindu keveeye himbi. Inzi Yahova, mali kovora.”