Jeremia 20 - KITABU KITAKATIFU

Livitaana lia Jeremia nu Musaalisi Pashuri

¹ Lwu musaalisi Pashuri mwana wa Imeri, uwaali musingiliri munene mu Litembeli, yahulira nimborofetaa makuva yaga,

² yalaga inze kugumirwa, kukuywa kandi nukumbika mu ijera ahimbi ni kirivwa cha Benjamini mu Litembeli lia Yahova.

³ Ku lidiku lialonda ku, inyima wu musaalisi Pashuri yaali ni yakamboholora kutura mu ijera, ndaamuvoolaa, “Yahova si yaakugulika lieta liilio Pashuri mba. Lieta liamali kukugulika ni ‘Litihiza Havundu hoosi.’

⁴ Yahova mwene avooye, ‘Ndakokola ove mutiihizi ku avalina vovo vosi kandi ku ivi mwene, kandi avasigu vaavo valitirwa mu vulwani imbiri woovo. Nziza kuviika avandu vosi vi Ivuyuda mu vwamihi vwu mwami wa Babiloni; alavugula avandu valala avahili mukivala cha Babiloni kuli avahambe na avandu vandi alavita.

⁵ Ndaleka avasigu vaavo valalanya vutugi vwosi vwi lidaala linene kandi valagumira uvutugi ni miandu josi ji lidaala linene, kali na amaviikiru ga avami vi Ivuyuda, kandi valaginga vindu viosi nu kuvihira mukivala cha Babiloni.

⁶ Na ivi Pashuri, harara na avandu vi inyumba yooyo mulagumirwa nu kuhirwa mu vutugwa mukivala cha Babiloni. Uwene yeyo ulakuzira yo kandi ulatevwa yo, harara na avalina vovo vosi avawavooleraa ovovehi vunyingi ligali.’ ”

Lielilira lia Jeremia ku Yahova

⁷ O, Yahova, ivi wangada, na inzi ndaahulira. Ivi oveeye ni zinguru kuvita inzi, kandi umali kunguuta. Vuli mundu yasekeriza, vaangolera kehenyahenye vuli lidiku liosi.

⁸ Lwa molomanga, nzanira ku ivi kandi mbanzukanga, “Kirage! Kandi vwoneku!” Yahova, inzi mali koleganywa kandi kokolelwa kehenyahenye vuli ing'inga kigira nandizaa likuva liilio.

⁹ Navuzwa lwa mboraa, “Ndivilira Yahova kandi si ndamoloma mu lieta lilie mba,” maku likuva liilio liveeye kuli muliru gusambanga mu inzi. Ngelizanga kwikuzira, navuzwa sinyalizanga mba.

¹⁰ Mbulira vuli vandu nivamonya, “Litihiza liveeye havundu hoosi! Kulwayago, kulamuvoola ku vanene!” Kali avalina vange vahimbi ligali valindilira ku ligwa liange. Avalina yava vavoola, “Hawundi anyala kugadwa, maku kunyala kumugumira kandi kuvanze kisaalia.”

¹¹ Navuzwa ivi, O, Yahova, Oveeye harara ninzi kuli musikari wizingulu. Kulwayago, avadambizi vange valichigatira kandi si valanguuta mba. Valava mu zisoni zinene ligali kigira si valanyaliza mba. Zisoni ziavo si zilivirirwa mihiga ni mihiga mba.

¹² O, Yahova Wuvunyali, ivi ogerizaa avandu nuvulungi; wamanya agaveeye mu mioyo jaavo kandi mu zing'anagani ziavo. Kunangwa, ndakayanzi kolola ivi nuvaanzaa kisaalia ku avasigu vange, kigira inzi mali kuviika ku ivi kivuni cha makuva gange.

¹³ Mwimbiri Yahova! Mwizominye Yahova! Kigira asoolanga avadambi kutura kuzinguru zia avandu vadamanu.

¹⁴ Lidiku lia inzi ndivulwa lilamwe! Lidiku lia mama wange yanzivula litagasizwa mba!

¹⁵ Alaamwi, mundu waleeta makuva ku baba wange kovora, “Mwana muyaayi wivuliiywi ku ivi,” kumuloomba kuva nu vusangali ligali.

¹⁶ Mundu oyo ave kuli amadara manene aga Yahova yadiviza vugira kugavererera. Mundu oyo ahuliri lilira liu vuzunu mu ing'inga ya mugamba, kandi ahuliri liyoga liu vulwani mu ing'inga yu mbasu hagati,

¹⁷ kigira mundu oyo si yanzita ningikiri kwivulwa. Maku inda ya mama wange yakaveeye kirindwa change.

¹⁸ Kigira ki ninzivulwa? Ndivulwa nyoore uvudinyu novovereri, nduuki ku keheri chi limenya liange liosi mu zisoni?