Jeremia 2 - KITABU KITAKATIFU

Ovulindi vwa Nyasaye ku Isiraeli

¹ Yahova yambolera,

² “Nzie kulandiza ku avandu va Jerusalemi amakuva yaga ndi: Inzi nzizuliza kuli mwaali avasuuvirifu lwa mwaali ni mukikiri avasoleri, kandi kuli mwaali nimwanyaanza lwa kwali harara nikwakaletana mulitanga; mwanonda kuvitira mu changalangwi, kuvitiramu kivala kitatagwa mu uvuguza.

³ Munyi avandu va Isiraeli mwaali avatovole vange; mwaali kuli amakuyu gange gokogesa. Ku mundu woosi umusaaliriza, ndaleta kivi kandi uvudamanu kuye, Inzi Yahova mali kovora.”

Uvwoni vwa avaguuga va Isiraeli

⁴ Huliri Likuva lia Yahova, munyi visukululwi via Yakobo, munyi zihiiri ziosi zia Isiraeli.

⁵ Yahova avoora: “Vudamanu ki vwa avaguuga vinyu vanyoola ku inzi? Ni kindiki chavakola ni vagirung'ana kutura ku inzi? Vaasigamira vifananyi viavuzwa, kandi navo vaagwa avandu vataveeye novokonyi.

⁶ Si vahenda mwoyo kigira inzi mba, kali niiva ndavasoola kutura Egebeti kandi nimbimilira kuvitira mwigendanyama: kivala chumu kandi chu vuhimwa, kivala chumu chu mundu atanyala kuvitira mu mba kandi cha avandu vatanyala komenya mu mba.

⁷ Ndaavaleta mukivala kigunamu, kusangalira ligesa lia cho kandi vindu via cho vilahi. Navuzwa lwa vaza mukivala yiki, ni vakekola kuva hazwa, kandi ni vachononyia, kivala chandaali ndahana kuvo.

⁸ Avasaalisi si vateva, ku ‘Yahova aveeye hayi?’ Yava avaari ni lilago sivamanya inzi mba. Avamihi vibaara ku inzi avaporofeti vaporofeta mu lieta lia Baali, kandi nivasigamira vifananyi via vuzwa.”

Kiyaalo cha Yahova ku avandu veve

⁹ “Kulwayago, Inzi Yahova ndahaana likalaga ku avandu vange kandi. Inzi ndaleta likalaga ku visukululwi viavo.

¹⁰ Muzie kuduuka imadioli mu visulu via Kitimu, anoho mutume mundu azie kuduuka ivugwi mukivala cha Kedari ahenzerizi ligali; mulalora ndi kindu kali kilala kuli yiki si chekoleka ku maziambiri mba.

¹¹ Sieveeye ho ni Ihiiri imali kugirung'anyia avanyasaye vayo mba, kali niiva si vaali avanyasaye vagiligali mba. Navuzwa avandu vange vamali kungirung'anyia, inzi Nyasaye wavaletera uvukumi, na vanyasaye vatanyala kokora kindu choosi.

¹² Kulwayago, ndalaga ligulu kodegera ni litihiza linene ligali, kandi ni ligenya linene ligali,

¹³ kigira avandu vange vamali kokora uvwoni vuviri. Vamali kugirung'ana kutura ku inzi, oveeye kisinukiru cha amazi gi livamwoyo, kandi vamali kuyava amadavalia gaavo, amadavalia gafuduka kali agatanyala kugumira amazi.

Amadanyi ga Isiraeli ku vudamanu

¹⁴ “Avandu va Isiraeli sivaveeye avatugwa? Kandi sivivulwa nuvutugwa mba. Kigira ki avasigu vaavo vavahima?

¹⁵ Avasigu vaavo vavafumiraa kuli zisimba; vakoli kivala chavo kugwa changalangwi, kandi madaala manene gaavo gagwiyi amang'anye vugira vandu.

¹⁶ Yee, avandu va Mefisi na Tahapanesi vamali kwatanyia vihanga viavo.

¹⁷ Avandu va Isiraeli, mweletera uvudinyu munyi aveene! Mwandeka inzi, Yahova Nyasaye winyu, lwa ndaamwimilira munzira zienyu.

¹⁸ Kalunu muganaganaa mulanyola ki lwa muzia Egebeti, kunwa amazi gu mugera gwa Naili? Muganaganaa mulanyola ki lwa muzia Asiria kunwa amazi gu mugera gwa Efurate?

¹⁹ Uvudamanu vwinyu aveene vulamuha amageri, kandi ligirung'ana lienyu kutura ku inzi lilamukalagira. Muliiga kuli voveeye vuvi kandi vululu, koleka inzi, Yahova Nyasaye winyu, kandi kuvula kuva avasuuvirifu kuinzi. Inzi Mwami Munene Yahova Nyasaye Wuvunyali mali kovora.”

Avandu va Isiraeli vasuura Kusigamira Yahova

²⁰ Mwami Munene Yahova avoora, “Munyi avandu va Isiraeli, madiku ga kale mwasuura zinguru ziange; mwasuura kutia kandi nu kusigamira inzi. Yee, ku vuli vigulu vitambi, kandi isi wa vuli musaala gwa amatu amavisi, mwasigamira avanyasaye.

²¹ Ndaali ni ndamusimika kuli musaala gwa makuyu gwa ndaatovora, kutura ku uvuguza uvulahi ligali. Navuzwa loli kuli mumali kugirung'ana! Muveeye kuli muzabibu gumali kugunda ugutaveeye kindu kali hakuzu.

²² Kali niiva mulisinga ni isavuni inyingi ligali, navuzwa uvudamanu vwinyu vulaloleka imbiri wange.

²³ Munyalandi kovora si mwayeyononyia aveene mba? Kandi si mwasigamira Baali kali hakuzu mba? Heenzi kuli mumali kokora uvwoni mu livona; loli ku aga mumali kokora. Muveeye kuli ing'amia yikikali, inyagura yiyi ni yiyi niyenya kutumwa.

²⁴ Muveeye kuli isukiri yu muvulimu inyagura mwigendanyama, lwa eveeye mulienya kutumwa eheranaa mwika kuli imbuza! Nivwaha unyala kugigaya kutura ku lienya liu muviri gwayo? Isaza yoosi eveeye ni lienya nayo, si ilanyangana mba. Isukiri yiyi ilanyooleka ing'inga yoosi ya yenya kutuma.

²⁵ Avandu va Isiraeli, mutasaliriza virenge vienyu mba, anoho mutava nuvuha na avanyasaye vandi mba. Navuzwa muvooraa, ‘Awa, si kunyala kwirana inyima mba. Kwayaanza avanyasaye vandi avageni. Kandi kulavasigamira.’ ”

Avandu va Isiraeli vaduukana vahevwe amageri

²⁶ Yahova avoora, “Kuli umwivi aviikwa mu zisoni lwa agumiriywi, kandi ndio munyi avandu va Isiraeli vosi mulavikwa mu zisoni harara na avami vinyu kandi na avanene vinyu, avasaalisi na avaporofeti.

²⁷ Munyi vosi mulavikwa mu zisoni, munyi avavoora ndi umusaala goveeye kuli baba winyu, kandi lwanda loveeye mama winyu. Yaga galakoleka kigira mwagirung'ana kuzia ihale kutura ku inzi havogono hukugirung'ana nu kuza ku inzi. Navuzwa lwa muveeye mu vudinyu, muteeva inzi kuza nu kumuhonyia.

²⁸ “Vaveeye haliha avanyasaye vamwelombera aveene? Leki vaze vamuhonyie ing'inga ya muveeye mu vudinyu. O, munyi avandu vi Ivuyuda, muveeye na avanyasaye avanyingi kuli amadara manene ga muveeye nago.

²⁹ Kigira ki muhing'anaa ninzi? Kigira ki munyi mumali kwibaala ku inzi?

³⁰ Ndaamuha amageri, navuzwa yago goosi sigali kindu ku munyi mba. Simwambugirira kumulungikiza mba. Kivavi chiinyu aveene kimali kwita avaporofeti vinyu, kuli isimba induru yukwononyia.

³¹ Munyi avandu va Isiraeli, muhulirize agambooraa. Inzi mali kugwa kuli changalangwi ku munyi, kandi kuli kisundi ligali kandi kivala chu vuhimwa? Kigira ki muvooraa ndi mulakola kuli gamuyaanzizaa, kandi simunyala kwirana ku inzi mba?

³² Mukaana musoleri anyala kwivilira viukwisiaha vivie vie zahabu, anoho mukaana osererwa anyala kwivilira inguvu yeeye ye keserero? Navuzwa avandu vange vamali kunzivilira ku madiku manyingi agatavalizwa mba.

³³ Munyi mumanyiriza ligali vulahi kuli munyala konyoora avayaanze! Kali vakali vadamanu vanyara kwiga zinzira zienyu ziu vuchamu.

³⁴ Mumali kwita vandu vadaka avataveeye nimbala; si mwavanyoola ni vaveeye a viguliri kandi a vivi mba. “Navuzwa mu likora yaga goosi, muvooraa,

³⁵ ‘Kunyi si koveeye nimbara mba; gaveeye agiligali ndi Yahova siaveeye nu vutima ni kunyi mba.’ Navuzwa inzi Yahova ndamuha amageri kigira muvooraa ndi simwakola uvwoni mba.

³⁶ Kigira ki muvoyavoya nimuganagana kuzia ku avanyasaye vi zihiiri zindi? Avandu va Egebeti valamuviika mu zisoni, kuli avandu va Asiria vamuvika mu zisoni.

³⁷ Mulagirung'ana kutura ku avandu va Egebeti nimufumi makono mu zimoni zienyu kigira zisoni. Inzi Yahova, mali kusuura yavo avamusuuviraa muvo; kandi si valamukonya mba.”