Jeremia 19 - KITABU KITAKATIFU

Jeremia Nikiju Chadiki Chovodohi

¹ Yahova yambolera nzie kugura kiju chovodohi. Yambolera kandi nzie mbuguli valala ku vakulundu va vandu kandi valala ku vasaalisi vakulundu,

² kandi mbitiri mukirivwa chi viju viadika kuzia mulivona lia Hinomu. Iwene yeyo ndalandiza makuva gayamboolera.

³ Yahova yandaga mbore, “Munyi Avami vi Ivuyuda na avandu va Jerusalemi, muhuliri aga inze Yahova Wuvunyali Nyasaye wa avandu va Isiraeli mboraa. Nziza koleta kivi kenene havundu yaaha kunangwa vuli mundu ulikihulira alakagenye.

⁴ Nziza kokora yaga kigira avandu vamali kondeka kandi vononyi havundu yaaha nukuhaana zisadaka zievisiuviliru ku vanyasaye vandi - Yavo aveene anaho avaguuga vaavo anoho avami vi Ivuyuda sivamanyi kindu kigira avanyasaye zana yavo mba. Vamali kwita vandu vatali nimbala havundu yaaha,

⁵ kandi vamali kwumbakira Baali uvwali kunangwa vaduuki kusamba avana vaavo numuliru kuli visiuviliru. Inzi sindaavalaga kokora ndio mba; kali sigaaliku mu zing'anagani ziange mba.

⁶ Kulwayago, ing'inga ilakaaze lwa havundu yaaha nahavuli kulangwa kandi Tofezi anoho livona lia Hinomu. Muvogono yivwo halakamanyikane.

⁷ Havundu hano, ndononyia lilohiza liosi lia avandu vi Ivuyuda na Jerusalemi. Ndakaleke avasigu vaavo vavaguuti nukuvitira muvulwani. Ndakahaane miviri jiavo mikuzu ku amanyonyi kandi zinyama ziumbulimu kuli chukulia.

⁸ Inzi ndakaleete lidiviza liukutihiza ku lidaala yili na vuli mundu ulivitira mu lio alakegose nokogenya.

⁹ Musigu alakakumbirizi lidaala nokogeriza kwita avandu valio. Likumbirizwa lirakave liukutihiza kali avandu mu lidaala yili valakalie aveene na vene kali navana vaavo.”

¹⁰ Kunangwa Yahova yambolera mbunanyie kiju imbiri wavandu vaali nivaziiyi harara ninzi,

¹¹ Kandi mbavoolere ndi Yahova Wuvunyali ovooye ndi, “Inze ndavunanyia avandu yava harara nilidaala, lilava kuli kiju chovodohi ichadiki yiki ikitanyala kuvikwa harara kandi mba. Avandu navayaviri avakuzu vaavo kali mu Tofezi kigira sinahavekuho havundu handi hukuvayavira mba.

¹² Ndaalaga kokora lidaala yili na vandu vamenyi mulio kuli Tofezi.

¹³ Zinyumba zia Jerusalemi zinyumba ziavami vi Vuyuda - zinyumba ziosi zievihanwa vie vimuli visambirwa kuvisegese viazio kuduuka umwigulu, kandi uwa isadaka yukunwa imali kusundulwa kuvanyasaye vandi, vilononywa kuli havundu ha Tofezi.”

¹⁴ Kunangwa ndaatula Tofezi wa Yahova yaali nandumi kulandiza likuva lilie. Ndaazia nisingila mu mugizi gwi Litembeli nimbolera avandu vosi

¹⁵ ndi, Yahova Wuvunyali, Nyasaye wavandu va Isiraeli, avoora, “Inzi nziza koleta kulidaala yili Kandi ku lidaala lindi liosi liahimbi amageri goosi agandavoola ndakakole, kigira muveeye avahindagirizi kandi simulahulira agambooraa mba.”