Jeremia 18 - KITABU KITAKATIFU

Jeremia munyumba yumulongi

¹ Yahova yambolera,

² “Sulunguta indangu uzie munyumba yumulongi, nangoheereyo likuva liange.”

³ Kunangwa ndaaziayo nenyoola mulongi nayinzira ku isiongo yeye.

⁴ Kunangwa ikiju chalongaa kutura kovodohi chonekeraa mumakono geege, akigirung'anyaa nokolomba kiju kindi, ichalolaa ndi keveeye kilahi akelombe.

⁵ Kunangwa Yahova yambolera,

⁶ “Mbeeye nuvunyari kokora kumunyi avandu va Isiraeli agumulongi yakola nilidohi? Munyi muveeye mumakono gange kuli lidohi liveeye mumakono gumulongi.

⁷ Niiva ku ing'inga yoosi ndakavooye ndi nziza kwiha, kuvunanyira hasi anoho kudiviza ihiiri anoho vwami,

⁸ navuzwa ihiiri yeyo igirung'ane kutura kuvudamanu vwayo, inzi sindakola agandavoola ndakakole mba.

⁹ Kolovega lundi, niiva ndakavooye nziza kusingiliza anoho kwumbaka ihiiri yoosi anoho vwami,

¹⁰ navuzwa ihiiri yene yeyo nivula kutia inzi nokokola uvuchamu, inzi sindakola agandavoola ndakora mba.

¹¹ Kunangwa kalunu, ovoolere avandu vi Ivuyuda na Jerusalemi ndi ndohizaa zing'anagani ziukuvingilila kandi nzetegekaa kuvaha amageri. Uvavoolere valeke komenya muvwoni - vagirung'anyie zinzira ziavo ni vindu viavakola.

¹² Valativura, ‘Awa, kigira ki kokole ndio? Kunyi kwosi kulava kuli avahindagirizi kandi avandu avuvudamanu kuli kwenya.’ ”

Avandu vasuyi Yahova

¹³ Yahova avoora, “Teeva vuli ihiiri niiva kindu kuli yiki chayekolekaku maziambiri. Avandu va Isiraeli vamali kokora kindu chukutiihiza!

¹⁴ Zinyanda zindambi zia Lebanoni ziveezaku vugira likonza? Migera mikiindu ji kiguru jacho jikama ku?

¹⁵ Navuzwa avandu vange vamali kunzivilira! Vahaana vihaanwa vie vimuli ku vifananyi. Vamali kwichigatira kuinzira yavaduukana kogenda ku, sivalonda muzinzira ziakale mba; vagenda kuzinzira zitaveeye zinungi.

¹⁶ Vamali kokora kivala yiki kuva kindu chilitiihiza, linene ligali, kandi vakekoli kuva chokoleganywa kazozo. Vosi avavitaa valagenya ku agavalolaa; valasung'usa mitwi giavo muligenya.

¹⁷ Inzi ndasalanyia avandu vange imbiri wavasigu vaavo, kuli uluguchi luhuuziywi nimbuuza yikivihiri kutura ivugwi. Inzi ndagirung'ana kutura kuvo; Inzi sindavakonya lwikivi kiduukaa mba.”

Kolohiza mu vwivisu kwita Jeremia

¹⁸ Maku avandu vavoola, “Hambi, gendi kolohizi mu vwivisu kwingilira Jeremia; kigira liegiza lielilaga navasaalisi, anoho konyoora amigizu kutura ku vageri, anoho makuva kutura ku vaporofeti sigalagota mba. Kunangwa hambi, kumwingiliri namang'ana giitu malulu kandi kuvuli kuhuliriza ku kindu choosi cha avoora.”

¹⁹ Kunangwa ndasaara, “Yahova, uhuliriza agambooraa kandi huliriza aga vasigu vange vavola ku inze.

²⁰ Uvudamanu voveeye nimitungu jiuvulahi? Navuzwa vamali kuyava liliina nduuki kugwa mu. Wizulizi kuli ndaaza komoloma ku ivi muvogono vwavo kunangwa uvuli kuvaha mageri mu vutima vuvwo.

²¹ Navuzwa kalunu, Yahova, oleke avana vaavo vakuzi kigira inzara; oleke vakuziri mu liihi. Oleke avakali vagotizi avasaza vaavo navana; oleke avasaza vakuzi kigira uvulwaye kandi avasoleri vakuziri mu vulwani.

²² Tuma avandu vikivihiri valanye zinyumba ziavo vugira lieganihiza; uvakole vaaniri mulitiihizwa. Vamali kulima liliina nduuki kugwamu kandi vamali kotega mitego jingumili.

²³ Navuzwa, Yahova, ivi umanya lilohiza liavo liosi liu mu vwivisu kunzita. Utasamiha uvudamanu vwavo anoho kusamiiha uvwoni vwavo mba. Uvaleke vave muliguutwa kandi uvahe amageri lwa ukikiri nu vutima.”