Jeremia 17 - KITABU KITAKATIFU

Amageri ku avandu vi Ivuyuda kulikola uvwoni

¹ Yahova avoora, “Avandu vi Ivuyuda, uvwoni vwinyu vwang'odwa ni kalamu yikivia; vwang'orwa ku mioyo jinyu nesonga yiligina lia limasi kandi vwang'odwa mu zikona ziu vwali vwinyu.

² Avandu vinyu vasigamira vifananyi via vamali kolomba kigira umunyasaye wikikali Ashera: Kuvwaali, isi wa vuli musaala muvisi, kuzindongozi ziu kutugulu

³ kandi ku vigulu viu mukivala kigalamu. Ndakora avasigu vinyu vavugura uvutugi kandi amaviikiru ginyu, kigira uvwoni vwosi vwa mumali kokora mukivala chiinyu choosi.

⁴ Mulaleka kivala cha ndaamuha nu kukihaana ku avasigu vinyu. Ndamukora mu vatumikiri avasigu vinyu mukivala cha mutamanyi kindu kali hakuzu, kigira uvutima vwange voveeye kuli muliru, kandi guladuka nu kusamba mihiga ni mihiga.”

Kusuuvira Yahova

⁵ Yahova avoora, “Ndakalagira oyo ugirung'anaa kutura ku inzi, kandi usuviraa mu mundu, kandi mu zinguru zizie.

⁶ Aveeye kuli uvulimu voveeye mu changalangwi, kandi sialalola uvulahi vwosi mba. Alamenya havundu haveeye ahumu mwigendanyama, mukivala chijumbi chu mundu atamenyaa mu.

⁷ “Navuzwa ndagasiza oyo usuviraa mu inzi kandi oyo wa inzi mbeeye lisuuvira lilie.

⁸ Aveeye kuli musaala gwasimikwa ahimbi ni migera ja mazi kandi gwahila miri ligali kuduuka ku mazi. Siguveeye nu vuti mu ing'inga ye kivasu mba kigira amatu gagwo si ganiara mba. Si guhenda mwoyo lwi imbura itaveeye ho mba; navuzwa guzizagiliranga kwama amakuyu.

⁹ “Nivwaha unyala kumanyiriza zing'anagani ziveeye mu mwoyo gwu mundu? Goveeye mwoyo gwu vugadi ligali kuvita vindu vindi viosi. Goveeye mulwaye ligali kali si gunyala kohona mba.

¹⁰ Inzi Yahova nyenyerizaa zing'anagani kandi ngeriza mioyo ja vandu. Inzi ngolera mundu samulala kolondekana ni limenya lilie, kandi kolondekana ni likora lilie.”

¹¹ Mundu anyoora uvutugi munzira itaveeye isuuvirifu, aveeye kuli ilinyonyi ligoneraa amavuyu agaliavula kotera. Hagati hi limenya lilie alagotiza uvutugi vwivwe, kandi mu keheri chi limenya lilie alava vuzwa kandi umusiru.

¹² Litembeli lietu liveeye kuli endeve yu vukumi yu vwami, liasingirizwa ku kiguru kidiguluku kutura mu litanga.

¹³ O, Yahova, ivi oveeye lisuuvirizwa lia avandu va Isiraeli; yavo vosi avalekaa ivi valaduuka mu zisoni. Valagota kuli amita gahandikwa hasi mu luguchi, kigira vamali koleka ivi, Yahova, oveeye kisinukiru cha mazi gi livamwoyo.

Jeremia Yateeva Yahova amukonye

¹⁴ O, Yahova, ombonyie na ndahona ligali; osoore na inzi ndahona ligali. Ivi niye wa inzi nzizominyanga!

¹⁵ Avandu vandeva ndi, “Litihiza lia Yahova yalaga kukunyi liveeye hayi? Leki liize ku kunyi kalunu ndi!”

¹⁶ Navuzwa, Yahova, inzi si ndakuniga olete ikivi kuvo mba; kandi sindegomba ing'inga yu vudinyu kuza kuvo mba. Yahova, ivi umanyi yaga; kandi umanyi ligali aga inzi mali kovora.

¹⁷ Utava litihiza ku inzi mba, kigira ivi oveeye likingwa liange lwu vudinyu vuzaa.

¹⁸ Viika yavo avandambizaa muzisoni, navuzwa utambika inzi mu zisoni mba. Leeta litihiza linene kuvo, navuzwa utatiihiza inzi mba. Leeta ikivi kuvo kandi uvadivizi ligali.

Kulinda Lidiku lie Lisabato Litakatifu

¹⁹ Yahova yambolera, “Jeremia, zia ulandizi likuva liange ha virirwa via avandu; via avami vivundu Ivuyuda vavitiramu nu kwingira kandi kutura mu lidaala linene; kandi ha virivwa vindi viosi via Jerusalemi.

²⁰ Ovolere avami kandi avandu vosi vi Ivuyuda kandi vuli mundu woosi omenyi mu Jerusalemi kandi avingiraa mu virivwa yivi, vahulirize ku aga inzi mboraa.

²¹ Uvavoolere ndi, niiva vayaanza livamwoyo liavo, vatageriza kuginga musigo gwosi ku lidiku lie Lisabato mba; vatageriza kuginga kindu kali kilala kwingira mu virivwa via Jerusalemi mba,

²² anoho vataginga kindu kali kilala kutura mu zinyumba zienyu ku lidiku lie Lisabato mba. Vatakola muyinzi gwosi ku lidiku lie Lisabato mba; navutswa valikole kuva Lidiku Litakatifu, kuli ndaalaga avaguuga vaavo.

²³ Avaguuga vaavo siyahulira anoho si vaatia lilago liange mba, navuzwa vaali avadinyu; sivenyaa kutia anoho kwiga kutura ku inzi mba.

²⁴ “Volera avandu yava ndi, gavadukiraa vatie amalago gange goosi. Vatageriza kuginga musigo gwosi kuvitira mu virivwa vie lidaala linene ku lidiku lie Lisabato mba. Gavadukiraa valikole kuva Lidiku Litakatifu kandi vatakola muyinzi gwosi kali hakuzu mba.

²⁵ Maku avami vaavo kandi vatumikiri vaavo valingira mu virivwa via Jerusalemi kandi valava kondeve yu vwami vwali vwa Daudi. Harara na avandu vi Ivuyuda kandi va Jerusalemi, valanina ku magare gu vulwani kandi ku zibarasi, na lidaala linene lia Jerusalemi lilava na avandu avanyingi kazozo mihiga ni mihiga.

²⁶ Avandu valaza kutura mu madaala manene gi Ivuyuda kandi kutura mu tudaala toveeye ahimbi na Jerusalemi, kandi kutura mu kivala cha Benjamini, kandi kutura Shefela, kandi kutura mu vigulu, kandi kutura Negebu; valaleta mu Litembeli liange vihaanwa viu kusambwa, visiuviliru, vihaanwa viu vuguza kandi vihaanwa viekimuli, kandi vihaanwa vie Lisandiza.

²⁷ Navuzwa kuduuka vatie nu kulinda. Lidiku lie Lisabato kuva Litakatifu, kandi sigavaduukira kuginga misigo nu kwingira mu virivwa via Jerusalemi ku lidiku lie Lisabato mba. Ni vakora ndio ndahambiza muliru nu kusamba virivwa vie lidaala linene, kandi gulasamba zinyumba ziu vwami ziosi zia Jerusalemi kandi si gunyala kusiminywa mba.”