Jeremia 16 - KITABU KITAKATIFU

Lienya lia Yahova ku Livamwoyo lia Jeremia

¹ Yahova yamoloma ku inzi navoora,

² “Utaleta mukali anoho onyoore avana havundu kuli yaaha.

³ Inzi ndakovolera agazizaa kwekoleka ku avana viivurwa hano nuku viivuri vaavo.

⁴ Vaza varware zinguzu ziukutihiza manavakuzi kandi siaveeyeho kali mulala waza asiome anoho kuvayavira mba. Miviri jaavo jaza jivungi kuli kitumi chemboreya kumarova. Valakitirwi muvulwani anoho navakuzi kigira inzara, kandi miviri jiavo jilakagwi chukulia chamanyonyi nizinyama ziumbulimu.

⁵ “Utingira muinyumba yavasiomaamu mba. Utaverereraku mundu kali mulala mba. Inzi sindagasiza avandu vange nimirembe anoho kuvamanyia uvuyanzi kandi zimbavasi mba.

⁶ Avatugi navadaka valakuza mu kivala yiki, navuzwa siaveeyeho kali mulala ulivasiomera anoho kuvayavira mba. Siaveeyeho kali mulala ulakikale mwene anoho kovega mutwi gwigwe kumanyia ovovereri mba.

⁷ Siaveeyeho kali mulala ulakarii chukulia anoho ulinywa iwaini harara naye anoho ulakamuleminyi mwoyo lwumuyanze weve akuza mba, si aveeyeho mulala ulaka muvererere mba, kali ku oyo umali kogotiza baba weve anoho mama weve.

⁸ “Utingira munyumba yavandu valombi lilia mba. Utikara hasi navo kulia kinga kunwa mba.

⁹ Hulira aga inzi, Yahova Wuvunyali, Nyasaye wavandu va Isiraeli mbora. Inzi ndaheriza uvusangari kandi uvuyanzi vwa oyo osererwa kandi osereraa. Avandu hano valakave mwoyo kolola yaga kwekoleka.

¹⁰ “Lwanovoolere avandu yava yaga goosi, vaza vakoteeve ndi, ‘Kigira ki Nyasaye alagi kivi kenene yiki kukwingilira? Ni vudamanu ki vwa kwakora? Nivwoniki vwakumali kokora ku Yahova Nyasaye wiitu?’

¹¹ Kunangwa uvavoolere Yahova umali kovora, ‘Avaguuga vinyu vagirung'ana kutura ku inzi nivasigamira kandi nivatumikira avanyasaye vandi. Vandeka kandi sivatia nokolonda amigizu gange mba.

¹² Navuzwa mumali kokora vudamanu ligali kuvita kali avaguuga vinyu. Munyi mwosi muveeye avahindagirizi kandi aviziimbi, kandi simutizaa inzi mba.

¹³ Kunangwa, ndamusiuva ichova wikivala yiki, kivala chamunyi anoho avaguuga vinyu vavura kumanya. Weneyeyo namutumikiri avanyasaye vandi mbasu na vudiku, kandi sinambeku ni zimbavasi kumunyi mba.’ ”

Lirana Kutura mu Lihaminywa

¹⁴ Yahova avoora, “Ing'inga yiza lwa avandu valivula kwisuha ku inzi kuli Nyasaye oveeye mwoyo uwaleeta avandu va Isiraeli kutura mukivala cha Egebeti.

¹⁵ Nitali valakisuhi ku inzi kuli Nyasaye oveeye mwoyo uwaleeta avandu va Isiraeli kutura mukivala chi Ivaale kandi kutura muvivala vindi viosi viandaali nindavasalanyiramu. Inzi ndakaviranyie mu kivala chavo aveene, mukivala chandaha kuvaguuga vaavo. Inzi Yahova mali kovora.”

Amageri gaaza

¹⁶ Yahova avoora, “Nziza kutuma avaruvi vanyingi vaze vagumiri avandu yava. Maku ndatuma avahizi vanyingi vaze kuvahima kutura mu vigulu kandi mu tugulu kandi kutura mu zimbinga ziezinyanda.

¹⁷ Inzi ndolaa vindu viosi viavakola. Sikeveeyeho ichaaviswa kutura ku inzi mba; ndolaa uvwoni vwavo.

¹⁸ Inzi ndavakora vatungi haali kaviri kigira uvwoni vwavo nuvuchamu vwavo, kigira vamali kwononyia kivala change nivifananyi vitaveeye nilivamwoyo kuli avakuzu, kandi vamali kuviikamu avanyasaye vanyingi vuvugadi.”

Lisaala lia Jeremia liu vusuuvirifu mu Yahova

¹⁹ Yahova, ivi niyie ukingaa inzi kandi ombeezaa zinguru; ongonyaa mu ing'inga yuvudinyu. Zihiiri zilaza ku ivi kutura ku zinduru zielirova nokovoora, “Avaguuga viitu valii vuzwa navanyasaye vuvugadi kandi nivifananyi viavuzwa.

²⁰ Umundu anyala kolomba avanyasaye veve mwene? Awa, niiva yaakakolindio, sivakaveeye avanyasaye ligali mba.”

²¹ Yahova avoora, “Kunangwa, liukutanga kandi liukumaliriza, inzi ndakora zihiiri kumanya zinguru ziange kandi vunyali vwange; zilakamanye ndi inzi mbeeye Yahova.”