Jeremia 15 - KITABU KITAKATIFU

Lidivizwa lia Avandu vi Ivuyuda

¹ Maku Yahova yambolera, “Kali niiva Musa na Samweli vakasingiyi hano nokogoonya inzi, sindakamanyi avandu yava livererera liange mba. Vakole vazie ihale; vakole vatuli imbiri wange.

² Lwa vakoteeva wavanyala kuzia, uvavoolere ndi inzi malikovoola: Valala kuvo valakuza kigira vulwaye, wene yeyo niyio wavalizia! Avandi valakuzira muvulwani wene yeyo niyio wavalizia! Avandi valakuza kigira inzara! Na avandi valahirwa kuli avahambe wene yeyo niyio wavalizia!

³ Inzi Yahova, mali kotovola ndi, ndalaga vindu vine viukutihiza kokoleka kuvo: Valitirwa mu liihi; zimbizi zilatandula miviri jaavo; amanyonyi galalia miviri jaavo, kandi zinyama ziu mbulimu zilalia miviri jitigala.

⁴ Ndakora vandu vu mukivala choosi kuva nu vuti ovonene ligali kigira vindu vidamanu via Manase mwana wa Hezekia yakola mu Jerusalemi lwa yaali mwami wi Ivuyuda.”

⁵ Yahova avoora, “O, munyi avandu va Jerusalemi, nivwaha ulimuvererera? Kandi nivwaha ulimulirira? Nivwaha ulakave nu vwiyangu kumuteeva kuli muzizagiliraa?

⁶ Munyi avandu va Jerusalemi mumali kusuura inzi; mumali kugirung'ana kutura ku inzi. Kulwayago, mali kuhaana amageri ku munyi kandi kumudiviza, kigira si ndaali nyara kumanyia livererera mba.

⁷ Mali kumusesa kuli amavululi muvuli amadara goosi mu kivala. Ndaamudiviza munyi avandu vange, kandi ndiita avana vinyu vosi, kigira si mwagirung'ana kutura kuzinzira zienyu zindamanu mba.

⁸ Vaveeye ho avakunzakali avanyingi mukivala chienyu kali kuvita zinzaro ziu muyeke mu inyanza. Ndiita avasoleri vinyu mu vosooleri vwavo; kandi ningora avamama vaavo nivasalirizwa ligali Nonoho ndaavakuya vululu ligali kandi nindeeta litihiza kuvo.

⁹ Mukali wagotiza avana veve saba umali kukinda, nukugamula imieka. Vulavu vwi lidiku lilie vumali kugirung'ana kugwa kisundi kenene; Umali kuduuka mu zisoni kandi mwoyo gwigwe gulwaye. Ndaleka avasigu vinyu viiti yavo kumunyi avakikiri mwoyo. Inzi Yahova, mali kovora.”

Lielilira lia Jeremia ku Yahova

¹⁰ O, vayaayi kivi keveeye ku inzi! Kigira ki mama wange niyaanzivula nokondeta mukivala yiki? Gaduukanaa nembane nu kuhiing'ana na vuli mundu mu kivala. Inzi sindayegobiza anoho si ndayegoba ku mabesa ku mundu woosi mba; navuzwa vuli mundu alanamaa inzi.

¹¹ O, Yahova, viramo viavo viosi vive via agiligali niiva si ndaakutumikira vulahi mba, kandi niiva si ndaagoonya ivi mu vogono vwa avasigu vange vaali mu vudinyu kandi mu kivi.

¹² Mundu anyala kuvunanyia ikivia, kukira ligali ikivia kutura Ivaale ichazuganywa mu umugasa?

¹³ Yahova yambolera, “Ndatuma avasigu kuzia kulanya uvutugi kandi amaviikiru ga vandu vange. Ndakora ndio kuhaana amageri kuvo kigira uvwoni vwa vamali kokora mu kivala choosi.

¹⁴ Ndavakora kutumikira avasigu vaavo mukivala cha vatamanyi kindu kali hakuzu, kigira uvutima vwange voveeye kuli umuliru kandi guladuka nukusamba mihiga ni mihiga.”

¹⁵ Maku ndaavoora, “O, Yahova, ivi oveeye ni limanyiriza, unzizurize kandi ongonye. Oleke inzi mbanze kisaalia ku yavo avandambizaa. Utikuzira navo mba kigira valanzita. Wizulizi ndi linyegwa liange liveeye kigira ivi inzi nyegangwa.

¹⁶ Ivi wamoloma ninzi na ndaahuliriza vuli likuva liilio. Inzi mbeeye woovo, Yahova Nyasaye Wuvunyali, kunangwa makuva googo galeetanga vusangali kandi uvuyanzi mu mwoyo gwange.

¹⁷ Inzi sindiikala harara nu muganda guyaanzaa kandi kusangalira uvudamanu mba. Kigira liitia amalago googo ndikala wengine kandi ndaali nu vutima vunyingi.

¹⁸ Kigira ki inzi nzizagiliranga kusalira? Kigira ki zingwagu ziange sizinyala kohonywa? Kigira ki ziasula kohona? Ivi otovooye ligali kokora inzi kuva nu vutima kuli umugera gwa mazi ugukamanga zing'inga ziu mbasu?”

¹⁹ Kulwayago, Yahova yavoola, “Niiva ulirana ku inzi, ndakwiranyia kandi ulava mutumikiri wange. Niiva ulavoola amakuva gaveeye amalahi na oleke kovora amakuva amadamanu, hene yaho ulava muporofeti wange kandi. Avandu varirana ku ivi, navuzwa ivi si ulazia kuvo mba.

²⁰ Ndakokola ove kuli lidigi lie imbinga yu mugasa. Avasigu vovo valakulwaana, navuzwa sivalakuguuta mba. Inzi ndava harara na ivi kukukinga kandi ndakohonyia.

²¹ Ndakosoora kutura kuzinguru zia vachamu kandi avandu vikirage. Inzi Yahova mali kovora.”