Jeremia 13 - KITABU KITAKATIFU

Inguvu yi Ikatani

¹ Yahova yambolera nzie nguliri zinguvu zie ikatani manziviki; navuzwa yambolera mburi kuziviika mumazi.

² Kunangwa ndazigula maninzivika.

³ Kunangwa Yahova yamoloma ku inzi kandi lwa kaviri navoora,

⁴ “Zia ku mugera gwa Efurate kandi uviisi zimbala mulilina liezinyanda.”

⁵ Kunangwa ndaazia nimbisa zimbala yizi ahimbi nu mugera gwa Efurate kuli Yahova yaali niyandagi.

⁶ Lwinyima Yahova yambolera nzirane kumugera gwa Efurate na mbuguli.

⁷ Kunangwa ndiranayo, kandi ndaanyoora ndi havundu handaali niimbisi, ziali nizioneki kandi siziali zindahi mba.

⁸ Maku Yahova yamoloma ninzi kandi navoora,

⁹ Yavoola, “Ni ndio nanzononyie liegingira lia vandu vi Ivuyuda kandi liegingira linene lia vandu va jerusalemi.

¹⁰ Avandu vadamanu yava vasuuye kutia inzi. Vamala kuva avahindagirizi kandi avachamu kuli maziambiri, kandi vamala kusigamira nukuyinzilira avanyasaye vandi. Kulwayago valava kuli zimbala yizi zitaveeye zindahi mba.

¹¹ Kuli zimbala zigumira vudinyu mukisindi, kandi ndio ndeenya avandu va Isiraeli ni Ivuyuda vagumiri vudinyu ku inzi. Inzi ndaakola yaga kunangwa vaduuki kuva avandu vange kandi vahane lizominya nuluyali ku inzi; navuzwa sivaatia inzi mba.”

Ijuba Yi Iwaini

¹² Yahova Nyasaye yambolera, “Jeremia ovolere avandu va Isiraeli ndi vizulizi vuli ijuba yi iwaini ni iwaini. Valativura ndi vamanya vuli ijuba yi iwaini kuduuka yizuri iwaini.

¹³ Kunangwa uvavoolera ndi, Inzi Yahova, mboraa ndi, ndanwehiza vandu vikivala yiki iwaini kuduuka lwa vahambika: avami avaveeye visukululwi via Daudi, avasaalisi, avaporofeti kandi avandu vosi avamenyi mu jerusalemi.

¹⁴ Kunangwa inzi ndavadunyanyia kuli zijuba, avasaakulu navasooleli harara. Livererera anoho zimbavasi sivilangora mburi kuvita mba.”

Jeremia yiganihiza Kigira liegingira

¹⁵ Avandu va Isiraeli, Yahova amali kovora! Mwegehizi kandi mumuhuliri.

¹⁶ Uhaane luyali ku Yahova, Nyasaye winyu, nakikiri koleta kisundi, kandi nukikiri kwisigatira ku vigulu; nakikiri kugirung'anyia uvulavu vwa wasuuviramu kugwa kisundi kenene.

¹⁷ Niiva simulahulira, inzi ndakaliri mu vwivisu kigira liegingira lienyu ndakaliri nuvululu kandi maliga gange galakidoreke, kigira avandu va Nyasaye vamali kuhirwa ihale mu avahambe.

¹⁸ Yahova yambolera, “Ovolere umwami harara na mama weve vatuli kondeve yu vwami vwavo, kigira zitaji ziavo zindahi zimali kugwa hasi kutura ku mitwi jaavo.

¹⁹ Amadara ga Negebu gamali kukumbirizwa; siaveeyeho kali mulala unyala kuvita azie mugo mba. Avandu vosi vi Ivuyuda vamali kuhirwa ihale mulihaminywa.”

²⁰ Avandu va jerusalemi, heenzi! Avasigu vinyu vazaa kutura Ivaale! Vaveeye hayi avandu vaviikwa kumulinda, avandu va mwigingiliraa ku?

²¹ Mulakavoole ki lwa avandu va mwaganagana vaveeye avalina vinyu vamuguuta nukukwamiiha? Mulakave muvuzunu kuli vwumukali yenya kwivura.

²² Nimuva nimuteeva kigira ki ivindu yivi viosi vimali kwekoleka ku munyi, kigira ki zinguvu zienyu zimali kutanduka kandi mumali kwonogonywa, gaveeye kigira vwoni vwinyu voveeye vudamanu ligali.

²³ Umundu mumwamu anyala kugirung'anyia ligodo lilie anoho engo inyala kugirung'anyia vodondonye vwayo? Niiva vanyara, maku munyi avakola uvudamanu munyala kwiga kokora agaveeye amalungi.

²⁴ Yahova alamusalanyia kuli mukuzi guhuuziywi ni mbuuza yumuchangalangwi.

²⁵ Umali kovora ndi yiki kilava kivi chienyu. Yili nilio liamali kotovola akole ku munyi kigira mumali kumwivirira kandi musuuviraa muvanyasaye vuvugadi.

²⁶ Yahova mwene alamutuliza zinguvu nukumuviika muzisoni.

²⁷ Amali kumulora nimukoraa ivindu viu kuvihiliriza. Amali kumulora nimuzizaa ku avanyasaye vu muvigulu kandi anoho kuli ibarasi yenya kutuuma. Avandu va Jerusalemi kivi, keveeye ku munyi! Munyi mulava avadamanu kuduuka ing'inga ki?