Jeremia 12 - KITABU KITAKATIFU

Jeremia Yilirira ku Yahova Amuteva

¹ “O, Yahova, ivi oveeye mukalagi mulungi kazozo lwa ndeta amakuva gange imbiri woovo. Nitali kuduuka ndeve ivi ivindu kigira uvulungi. Kigira ki avandu vachamu vagasizwa? Kigira ki avandu vataveeye vasuuvirifu vaguuta?

² Ivi wavasimika kuli musaala navahira imiri; vaviruka kandi vaama amakuyu. Vuli ing'inga vamoloma vulahi kigira ivi, navuzwa sivakohendera mwoyo mba.

³ Navuzwa, Yahova, ivi wamanya inzi; olola agangolaa, kandi kuli ndakuyaanza. Kunga avandu vuvudamanu yava vazie ihale kuli magondi gu kwita; uvalindi kuduuka ing'inga yukusinzwa.

⁴ Kivala chietu kiluma nuvunyasi kuniara muvuli mulimi kuduuka ing'inga ki? Zinyama na manyonyi vikuza kigira uvudamanu vwa avandu viitu, avavoora, ‘Nyasaye sialola ichakokoola mba.’ ”

⁵ Yahova yavoola, “Jeremia, niiva uluha kunyagula na vandu vizimbiru, unyala ndi kunyagula nizibarasi? Niiva siunyala kusingila mukivala kilahi, nunyalizindi mumulitu gwa Jorodani?

⁶ Kali avamwavo vovo, avandu vinyumba yooyo yene, vamali kukuzaama; vasanga mulingililwa liilio. Utavasuvira mba kali niiva vamoloma amakuva malahi.”

Ovovereri vwa Yahova Kigira avandu veve

⁷ Yahova avoora, “Inzi ndaaleka avandu va Isiraeli; inzi ndaasuura ihiiri yange endovole. Ndahaana avandu vange vandayaanza kuzingulu zia vasigu vaavo.

⁸ Avandu vange vatovole vamali kusuura; vamali kufuumira kuli isimba yu mulitu, kunangwa mali kuvadunyira.

⁹ Avandu vange vatovole vaveeye kuli linyonyi limali kwingilirwa kuzimbega ziosi na mave. Mulange zinyama ziumbulimu ziizi musange mulisavo!

¹⁰ Avami vanyingi vageni vamali kwononyia mulimi gwi kizabibu change; vamali kuduvaganyia imilimi giange; vagirung'anyia kivala change chandayaanza kugwa changalangwi.

¹¹ Vamali kokekola ligendanyama; keveeye hazwa imbiri wange. Kivala choosi chaagwa changalangwi, siaveeyeho kali mulala okehendera mwoyo mba.

¹² Engereka wivisuru vie viangalangwi, avandu vamali kuuza ku valanya. Mali kutuma uvulwani kwononyia kivala choosi; siaveeyeho kali mulala oveeye mumirembe mba.

¹³ Avandu vange vaamiza ingano, navuzwa valakagese livaanze; vamali kuyinzira vudinyu, navuzwa sivanyoyeku kindu mba. Kigira vutima vwange vululu vitagwa viavo sivilakora vulahi mba.”

Lilagana lia Yahova ku vatende va Isiraeli

¹⁴ Yahova avoora, “Inzi mbeeye nichokovoola ku vatende va Visiraeli avamali kwononyia kivala chandaha avandu vange Isiraeli. Ndahira avandu vachamu yavo ihale kutura muvivala viavo kuli musaala gwihiywi, kandi ndasoora avandu vi Ivuyuda kutura muvo.

¹⁵ Navuzwa lwamba nindakavahira ihale, ndakavaveere zimbavasi; ndilanyia vuli ihiiri mukivala chavo kandi mulirova liavo.

¹⁶ Niiva valavugilira idini yavandu vange nu mwoyo mulala nukwisuha, ‘Kuli Yahova aveeye mwoyo’ - kuli mulitanga vigiza avandu vange kwisuha ku Baali - lwene yilwo valakave avalala kuavandu vange kandi valakagasizwi.

¹⁷ Navuzwa niiva ihiiri yoosi sielakatie mba, maku ndagituliza ho nukugidiviza ligali. Inzi, Yahova mali kovora.”