Jeremia 11 - KITABU KITAKATIFU

Avandu vi Ivuyuda na Jerusalemi Vavura Kolonda Lilagana

¹ Yahova yambolera Jeremia,

² “Hulira makuva gi lilagana yili. Ovoolere avandu vi Ivuyuda kandi Jerusalemi ndi,

³ Inzi Yahova Nyasaye wa avandu va Isiraeli, mali kuviika kilaamo ku mundu woosi uvula kutia amakuva gi lilagana yili.

⁴ Ni lilagana lia ndalomba na avaguuga vaavo lwa ndaatuliza kutura mukivala cha Egebeti; kivala chaali kuli kisambiru chi vivia kuvo. Ndaavavoolera vatie inzi kandi vakole vuli kindu cha ndaavalaga. Ndavavolera ndi, niiva valatia inzi, valava avandu vange, na inzi ndava Nyasaye wavo.

⁵ Hene yaho, ndaduukiza lilagana lia ndaalomba na avaguuga vaavo ndi: ndakavahe uvutugi kandi kivala kigunamu cha vamenyi mu kalunu.” Inzi Jeremia ndaavoora, “Yee Yahova.”

⁶ Maku Yahova yambolera, “Uzie mu madaala manene goosi gi Ivuyuda kandi kuzinzira ziosi zia Jerusalemi. Wilwaziri avandu amakuva gange uvavoolere vahuliri amakuva gi lilagana yili kandi vagatie.

⁷ Lwa ndaaleeta avaguuga vaavo kutura mukivala cha Egebeti, ndaaviganihiza vatie inzi. Ndaazizagilira ku viganihiza kali kuduuka na kalunu.

⁸ Navuzwa si vahulira anoho si vaatia mba. Muvogono yivwo vuli mundu samulala yaazizagilira kuva mudinyu kandi kokora uvudamanu kuli kazozo. Ndaali ni ndavalaga vaviiki lilagana liange navo, navuzwa vasuura. Kunangwa, ndaviika kuvo viramo viosi vie lilagana kuli ndaali nimbalagi.”

⁹ Maku Yahova yambolera, “Avandu vi Ivuyuda na Jerusalemi vaveeye ni liebaala ku inzi mu vwivisu.

¹⁰ Vamali kwirana kokora uvwoni vwa avaguuga vaavo, avasuuraa kuhulira amakuva gange. Vamali kugirung'ana kuzia kusigamira kandi kutumikira avanyasaye vandi. Avandu va Isiraeli na vandu vi Ivuyuda vamali kuvunaga lilagana lia ndaalomba na avaguuga vaavo.

¹¹ Kunangwa, kalunu, inzi Yahova, mbiganihizaa ndi, ndaleta lidiviza kuvo, kandi si valahononoka mba. Lwa vanira ku inzi kigira ovokonyi, si ndavahulira mba.

¹² Maku avandu vi Ivuyuda na avandu va Jerusalemi valazia ku avanyasaye vaavo, avavahaana ku visiuviliru kandi avavasigamiraa, nu kwanira kandi kwenya ovokonyi kutura kuvo. Navuzwa avanyasaye yavo si navavahonyie mu ing'inga yi Lidivizwa Liduka mba.

¹³ Avandu vi Ivuyuda vaveeye na avanyasaye avanyingi kuli vaveeye na amadara amanene, agavaveeye nago, kandi avandu va Jerusalemi valomba uvwali uvunyingi kuli zinzira ziveeye mu madaala manene nu kuhaanira ku visiuviliru ku Baali, nyasaye wu kuvihiliriza?

¹⁴ Jeremia, utasaala ku inzi anoho kongonya muvogono vwa avandu yava mba. Lwa vaveeye mu vudinyu nu kwaniri ku inzi mbakonye, si ndahulira lianira liavo mba.”

¹⁵ Yahova avoora, “Avandu va ndaayaanza vakora vindu viuvwoni. Vaveeye na vunyali ki kuva mu Litembeli liange? Vasuuvira vanyara kwigalira ikivi ku liloomba lisuuvirizwa kandi ku lihaana visiuviliru vie zinyama? Yaga goosi galavaloomba kuva nu vuyanzi?

¹⁶ Maziambiri ndaavalanga Muzeituni gwa amatu amavisi kandi ugwa makuyu amalahi, navuzwa kalunu, harara ni liatuluruka kuli lie inguba, ndahambiza umuliru mu amatu gagwo kandi ndavunanyia zisia ziagwo.

¹⁷ “Inzi Yahova Nyasaye Wuvunyali, ndaasimika avandu va Isiraeli kandi Ivuyuda kuli misaala, navuzwa kalunu ndavatiihiza ku lileta ikivi kuvo. Vamali kweletera yaga aveene, kigira vamali kokora vudamanu ligali; vamali kokora inze kuva nu vutima ku lihaana visiuviliru ku Baali.”

Lilohiza mu vwivisu kwita Jeremia

¹⁸ Yahova yangola kumanyiriza lilohiza liu muvwivisu lia avasigu vange valomba kwenya kunzita.

¹⁹ Ndaali kuli kememe kehoma ikihilwa kwitwa. Navuzwa si ndaamanya ndi avasigu vange valohiza vindu vidamanu ku inzi mba. Vavoola ndi, “Koteme musaala yigu nigukikiri na amatu amavisi; kumwiti kunangwa mundu navuli kumwizuliza kali hakuzu.”

²⁰ Maku ndaasaara nembora, “Yahova Wuvunyali, ivi oveeye mukalagi mulungi; kandi ogerizaa mioyo ja avandu kandi zing'anagani ziavo. Inzi mali kuviika makuva gange ku ivi. Ndakayanzi kokolola nuvanzaa kisaalia ku avasigu vange.”

²¹ Avandu va Anazozi vaali ni lilohiza kunzita. Vambolera ndi, valanzita niiva ndazizagilira koporofeta amakuva ga Yahova.

²² Kunangwa Yahova Wuvunyali yambolera, “Inzi ndavaha amageri! Avayaayi vaavo avasoleri valitirwa mu muvulwani, avana vaavo valakuza kigira inzara.

²³ Inzi mali kuviika ing'inga yo koleta ikivi ku avandu va Anazozi. Lwi ing'inga yene yeyo iduuka, mundu kali mulala sialakahone mba.”