Jeremia 10 - KITABU KITAKATIFU

Lisigamira vifananyi kandi Nyasaye

¹ O, munyi avandu va Isiraeli, muhuliri makuva ga Yahova amuvoleraa.

² Avoora, “Mutalonda zinzira ziezihiiri zindi mba; mutanyangizwa ni vindu viokogenyia vikoleka mu ligulu mba, kali niiva izihiiri zindi zitihizangwa.

³ Idini ya avandu yava eveeye yavuzwa. Musaala gotemwa mumulitu; guvazaangwa niviugi viumuva,

⁴ kandi vagusiahaa ni feza nizahabu. Guduyilwa hasi nimisumari kogolomba guvuli kugwa.

⁵ Ivifananyi kuli yivi viveeye kuli ivifananyi viukutihiza mu mulimi gwi zindaange; sivinyala komoloma mba, kuduuka vigingwi kigira sivinyala kogenda mba. Mutavitia mba: Sivinyala kumusaliriza mba, kandi sivinyala kumukolera uvulahi mba.”

⁶ O, Yahova, siaveeyeho nu mulala kuli ivi, ivi oveeye wizingulu kandi lieta liilio liveeye linene kandi liezingulu ligali.

⁷ Nivwaha uvura kuha ivi luyali, umwami wizihiiri ziosi? Gaduukanaa oheevwe luyali. Siaveeyeho nu mulala kuli ivi kutura mu vandu vosi vovogeri vizihiiri anoho kutura mu avami vaavo mba.

⁸ Vosi vaveeye vasiru kandi vayingu, nikindiki chavanyala kwiga kutura ku ivifananyi viumusaala?

⁹ Ivifananyi viavo viakunikwa ni ifeza kutura mu kivala cha Sipeini, kandi viakunikwa nizahabu kutura Ufazi, miyinzi yijio jiosi ni jumusiza; vivikwa zinguvu zie irangi isahiriru kandi yumuzambarau ziinaviywi navasiza.

¹⁰ Navuzwa ivi, Yahova, oveeye Nyasaye wagiligali, oveeye Nyasaye oveeye mwoyo kandi umwami uhindiraa mihiga ni mihiga. Lirova lidegera lwa oveeye nu vutima; izihiiri sizinyala kwikuzira ku vutima vuvwo mba.

¹¹ Kunangwa muvavoolere: “Avanyasaye yava avavura kolomba ligulu ni lirova navadivi kutura mu lirova kandi isi wiligulu.”

Lwimbu lwu Kwizominya Nyasaye

¹² Yahova yalomba lirova nizinguru zizie mwene; yalomba kivala novogeri vwivwe kandi navambura ligulu.

¹³ Amazi gahuumaa muligulu ku lilago lilie; aleetaa malesi kutura ku keheri chi lirova. Atumaa zimbeni niimbura kandi aleetaa imbuza kutura muligulu.

¹⁴ Mulilora yaga, avandu vafwana avasiru kandi vugira limanyiriza; yavo avalombanga ivifananyi vavikangwa muzisoni, kigira avanyasaye vavalomba sivaveeye avagiligali mba kandi sivaveeye ni livamwoyo mba.

¹⁵ Vaveeye vuzwa kandi gavadukiraa valeganywi; valakadivizwi lwa Yahova aliiza kuvaha mageri.

¹⁶ Nyasaye wa vandu va Isiraeli siaveeye kuli yavo mba; niyie walomba ivindu viosi, kandi yatovola avandu va Isiraeli kuva aveeve mwene. Lieta lilie ni Yahova Wuvunyali.

Lihaminywa Lizaa

¹⁷ Avandu va Jerusalemi, munyi mumali mukumbelizwiyi! Muvungizi harara ivindu vienyu.

¹⁸ Yahova azizaa kumusiuva ichova wikivala yiki; alamusionolanyia kali mulala kumunyi sialatigala mba. Yahova umali kovora.

¹⁹ Avandu va Jerusalemi vanira, “Kunyi kusaliriziywi vululu ligali! Zingwago zietu sizinyala kohona mba. Kwaganagana ndi yiki nikindu chakunyala kwikuzira kucho!

²⁰ Amahema giitu gayononywa; migoye jiagumiraa mahema jimali kukalika. Avana viitu vosi vazia ihale; siaveeyeho kali mulala watigala kwumbaka amahema giitu mba; siaveeyeho kali mulala unyala kusunga zisuka ziago mba.”

²¹ Ndaativura, “Aviimiliri viitu vaveeye avasiru; sivateeva Yahova aviimiliri mba. Yiki nicho kigira vavura kugasizwa, kandi avandu viitu vamali kusalanywa.

²² Huliri! Konyooye amakuva mageni! Umuliviti munene goveeyeho kutura mu ihiiri ya Ivaale; avamahi gayo valagirung'anyia amadara gi Ivuyuda kuva viangalangwe, havundu hi vivwi vimenyi.”

²³ O, Yahova, manya ligali livamwoyo liu mundu siliveeye lilie mba; sihaveeyeho nu mundu kali mulala oveeye nuvunyari kulimenya lilie mba.

²⁴ Yahova, ogelihizi avandu vovo; navuzwa utava mululu kukunyi mba, anoho utakuha amageri lwa oveeye nu vutima mba; kigira yiki kilava keheri chiitu.

²⁵ Viika uvutima vuvwo kuzihiiri zitasigamira ivi, kandi ku avandu vakusuura. Vamali kwita avandu vovo; vamali kukudiviza ligali nokoleka kivala chietu kugwa mang'anye.