Jeremia 1 - KITABU KITAKATIFU

Jeremia

¹ Kitabu yiki chivaaraa amakuva ga Jeremia mwana wa Hilikia yavoola, mulala ku avasaalisi vi lidaala lia Anazozi mukivala cha Benjamini.

² Yahova yamoloma ku Jeremia mu muhiga gwi likomi na jivaga gwi liamiiha lia Josia mwana wa Amoni, yaali mwami wi Ivuyuda.

³ Yamoloma kuye kandi lwa Jehoyakimu mwana wa Josia yaali mwami wi Ivuyuda. Yamoloma naye ku zing'inga zinyingi, kuduuka ku muhiga gwi likomi na mulala gwi liamiiha lia Zedekia mwana wa Josia. Ku mweli gwa katano, ku muhiga zana yigwo, avandu va Jerusalemi vaahaminywa.

Lilangwa lia Jeremia

⁴ Yahova yambolera,

⁵ “Ndaakotovola imbiri wa ndaali ningikiri kokolomba munda mwa mama woovo, kandi ndaaku takasa imbiri wa waali nukikiri kwivulwa. Ndaakotovola kuva muporofeti kuzihiiri.”

⁶ Maku ndaavoora, “Ai, Yahova Nyasaye! Henza, inzi si manyi kumoloma mba, kigira mbeeye vuzwa mwana mukekeeke.”

⁷ Navuzwa Yahova yambolera, “Utavoola oveeye mwana mukekeeke mba, navuzwa zia ku avandu vangutumaa ku na uvavoolere goosi aga inzi nokovora.

⁸ Utavatia mba kigira mbeeye harara na ive na ndakukinga. Inzi Yahova mali kovora!”

⁹ Maku Yahova yanyira mukono gwigwe nadiira ku munwa gwange, kandi nambolera, “Hulira, inzi mali kukuha amakuva gomolomaa.

¹⁰ Kalunu ngohezanga zinguru ku zihiiri kandi ku vwami, kwiha kandi kusambula, kudiviza kandi kutung'aminya, kwumbaka kandi kusimika.”

Amalola Gaviri

¹¹ Yahova yaandeva, “Jeremia, ni kindiki cha oloraa?” Ndavoora, “Ndolanga ulusia lwu musaala gwu mulozi.”

¹² Maku Yahova yambolera, “Ivi ololi vulahi, kigira mbenzerizanga kuduuka ndore ndi amakuva gange gaduukiziywi.”

¹³ Maku Yahova yamoloma ku inzi kandi, nandeeva, “Kindiki cholora kindi?” Ndaativura, “Ndolaa inyingu ya mazi nitavagira, na munwa gwayo gohenzi ku lovega lwa Ivaale.”

¹⁴ Hene yaho, Yahova yambolera, “Kivi kutura Ivaale kiladuuka ku avandu vosi avamenyi mukivala yiki,

¹⁵ kigira ndalaga zihiiri ziosi kuza kutura Ivaale. Avami vaavo valalomba uvwami vwavo ha vwingiliru vwi virivwa via Jerusalemi, kandi ku zimbega ziosi zia amadigi, kandi ku zimbega ziosi zia amadara gi Ivuyuda.

¹⁶ Ndahaana amageri ku avandu vange vosi kigira vamali kokora uvwoni; vamali kondeka, kandi vamali kuhaana visiuviliru ku avanyasaye vandi, kandi vamali kolomba vifananyi nu kuvisigamira.

¹⁷ Wetegeke Jeremia, uzie na ovoolere avandu va Isiraeli goosi agaamali kukulaga kovora. Utavatia mba, gase ndakokola ove umuti imbiri wavo.

¹⁸ Kalunu mali kukokola ove kuli lidaala lie imbinga enene, itiru yi kivia, lidigi liu mugasa usingili vudinyu nu kuhingira kivala choosi, avami vi Ivuyuda, avanene vacho, avasaalisi vacho, kandi na avandu vi kivala chene yiki choosi.

¹⁹ Avandu yava valakulwaana, navuzwa si valakuguuta mba, kigira mbeeye harara na ivi na ndakukinga. Inzi Yahova mali kovora.”