Isaya 7 - KITABU KITAKATIFU

Makuva ku mwami Ahazi

¹ Lwu mwami Ahazi, muyaayi wa Jozamu na umwisukulu wa Uzia, yaali niyamiha Ivuyuda, uvulwani vwatanga. Rezini, mwami wa Siria, na Peka muyaayi wa Remalia mwami wa Isiraeli, vingilira lidaala linene lia Jerusalemi, navuzwa sivanyala kuligumira mba.

² Lwi likuva liaduuka ku mwami wi Ivuyuda ndi, amahi ga Siria gaali ni gaveeye mu kivala cha Isiraeli, oyo harara na vandu veve vosi vatimukwa engolo nokodegera kuli misaala jihunguzwa nimbuuza.

³ Maku Yahova yavolera Isaya, “Vugula muyaayi woovo Shey Jashubu, na uzie kwagana nu mwami Ahazi. Ulamunyoola kunzira aha valombi vi zinguvu vayinzilira, hu mutaro goletaa amazi kutura mu lidavalia lie igulu guduukaa.

⁴ Umuvolere ahenzerizi kandi yiituliri na atatia anoho kukuza mwoyo mba. Uvutima vwu mwami Rezini na Vasiria veve kandi mwami Peka sivaveeye nuvuhimwa ligali kuli mwoki gwi vigenga viviri mba.”

⁵ Avandu va Siria harara na Isiraeli kandi nu mwami wavo valohizi kokolera ivi uvudamanu mu vuvwivisu.

⁶ Vasavira kwingilira Ivuyuda, vadegeriza avandu vaduuki kuvuunga mukono, maku vaviiki muyaayi wa Tabeeli kondeve yu vwami.

⁷ “Navuzwa inzi, Yahova, mboraa ndi yaga sigalekoleka mba.

⁸ Kigira ki? Kigira Siria sieveeye ni zinguru kuvita Damasiko mba, lidaala linene liacho kandi Damasiko siliveeye nizinguru kuvita mwami Rezini mba. Mu mihiga 65 Isiraeli iladivizwa ligali na silasingira kuli ihiiri mba.

⁹ Kivala cha Isiraeli sikeveeye ni zinguru kuvita Samaria, lidaala linene liacho mba, kandi Samaria siliveeye nizinguru kuvita mwami Peka mba. “Niiva ulavula kusuuvira, ulaguutwa.”

Kelolero cha Imanueli

¹⁰ Yahova yatuma likuva lindi ku mwami Ahazi:

¹¹ “Teeva Yahova Nyasaye woovo akohe kelolero, kinyala kuva ni kituli musi mu kivala cha vakuzu anoho igulu mwigulu.”

¹² Ahazi yativura, “Inzi sindateeva kelolero mba. Sindageriza Yahova mba.”

¹³ Maku Isaya yativura, “Muhuliri, kalunu, munyi visukululwi via Daudi! Voveeye vudamanu ligali kogeliza liekuzira lia vandu. Mulageriza kandi liekuzira lia Yahova Nyasaye?

¹⁴ Kigira yaga, Yahova mwene alamuha kelolero: Henza, mukaana mugima alavereka na alivula mwana muyaayi na alamugulika lieta ‘Imanueli’!

¹⁵ Alalia maguta nuvwuki lwa amanya kusuura uvudamanu nokotovola uvulahi.

¹⁶ Imbiri wu mwana oyo akikiri kumanya lisuula uvudamanu nokotovola uvulahi, vivala via vami vaviri vadunyiraa ivi vilava mang'anye.

¹⁷ “Yahova azizaa koleta ku ivi, ku vandu vovo, kandi ku vosi avinyumba yu vwami madiku gi kivi kidamanu ligali kuvita yago agamala kuduuka kutura uvwami vwa Isiraeli nivwavukanywa kutura ku Ivuyuda - azizaa koleta mwami wa Asiria.

¹⁸ “Lwu ing'inga yeyo iduuka, Yahova alakuba mululi kuli kimanyiru ku vandu va Egebeti vaze kuli iziinji kutura ku zisia ziu mugera gwa Naili iziveeye ihale ligali, kandi ku vandu va Asiria vaze kutura mu kivala chavo kuli zinzuki.

¹⁹ Valaza viduma nividuma nukwizula mu mavoona gaveeye hazwa, mu zimbangaywa mu zinyanda nukukunika vuli kisaka cha mafwa kandi vuli chayilu.

²⁰ “Lwa ing'inga yeyo iduuka, Yahova alatungaa muvegi wa masu kutura engereka wumugera gwa Efurate—naye ni umwami wa Asiria!—kandi alavega zinderu zienyu, liisu liu ku mitwi jinyu kandi liu ku miviri jinyu.

²¹ “Lwa ing'inga yeyo iduuka, kali niiva mulimi yaanyaliza kutuga kemoli kelori kilala ni zimburi ziviri,

²² Zilakahaane maveere manyingi ligali kali alakave ni vindu viosi viayenyaa. Yee, avandu vakekeeke avaliva nivatigara mwoyo mu kivala yicho valava na maveere kandi nuvwuki vwu kulia.

²³ “Lwa ing'inga yeyo iliduuka, vuli mulimi gwi vizabibu vilahi, vuli mulala ni mizabibu elefu ndala, iviali nuvuguli vwi vidonye viefeza elefu ndala, vuli kilala kilakunikwa nulutavati kandi na mafwa givigunzanguva.

²⁴ Avandu valazie kuhiiza yo nuvuhingu nu vuta. Yee kivala choosi kilizula visaka via mafwa ni vigunzanguva.

²⁵ Vigulu viosi uwa ivitagwa viameranga vilakunikwa na mafwa kali sialava ho nu mulala uzia yo mba. Halava havundu hi zing'ombe namagondi gaya.”