Isaya 66 - KITABU KITAKATIFU

Yahova akalagira zihiiri

¹ Yahova avoora, “Ligulu liveeye endeve yange yu vwami na lirova liveeye endeve yukuviika ku virenge viange. Kunangwa mulanyumbakira inyumba ya lugano ki; havundu hange hokomenya halava ha lugano ki?

² Inzi mwene ndaalomba ligulu ni lirova! Nyanzizangwa na yavo avaveeye avahocha na aviliegehiza, avatizaa nukuhulira inzi.

³ “Avandu vakora kuli vayaanza. Gaveeye malala meere kuvo, niiva vita igiriki kuli kisiuviriru anoho vavunanyie ligoti lie imbwa; niiva valahaana kihanwa chuvuswage anoho vahane masahi gi inguruvi; vahaana kimuli anoho vasaale ku kifananyi gaveeye malala meere kuvo. Yee, vasangalira mu zinzira ziavo ziukusigamira zielivihiliriza.

⁴ Kigira yaga, inzi kandi ndavaletera ikivi - ivindu yivio viavatizaa; kigira sihaaliho nu mulala uwahugira lwa ndavalanga anoho uwahuliriza lwa ndamoloma. Vaatovora kuvula kuhulira inzi nokokola uvudamanu.”

⁵ Muhuliri icha Yahova avoora, munyi avamutizaa nukumuhulira: “Kigira muveeye avasuuvirifu ku inzi, valala ku vandu vinyu vene vamudunyira na sivalava ni cha vamukola mba. Vamukolera kehenyahenye nivavoora; ‘Leka Yahova amanyie ovonene vwivwe na amuhonyie, kunangwa kuduuki kolola munyi nimusangara.’ Navuzwa yavo aveene valava muzisoni!

⁶ Muhulirizi! Liyoga lie kivihiri kutura mu lidaala linene, huliri mwoyo yigwo kutura mu Litembeli, goveeye mwoyo gwa Yahova nahaana mageri ku avasigu veve!

⁷ “Lidaala linene litakatifu liange liveeye kuli mukali wiivula umwana vugira kuva ni lilumwa. Lilumwa nilikikiri kuduuka kuye, wiivuywi mwana muyayi.

⁸ Nivwaha wahulira ku kindu kuli yiki? Nivwaha walola ku vindu kuli yivi? Kivala kinyala kolombwa ku mu lidiku lilala? Ihiiri inyala kwivulwa ku ing'inga indala? Navuzwa lwa Ziyoni silalumwa ku ing'inga indambi nikikiri kwivura avana valio.

⁹ Mutaganagana ndi ndakora avandu vange vaduuki ku ing'inga yi liivulwa ma mbaleke vavuli kwivulwa mba.” Yahova umali kovora.

¹⁰ Musangare harara na Jerusalemi, O, munyi avayaanzaa lidaala linene yili! Musangare harara nalio kalunu, musangare harara nalio kalunu O, munyi mwosi, avamali kulisiomera!

¹¹ Mulanuuna nukwiguta ligali ku zimbeere zia Jerusalemi ziokoleminya mwoyo. Mulanwa ligali nuvusangali kutura ku vunyingi vwilimedeka uwalio.

¹² Yahova avoora, “Ndamuletera limedeka liu vutugi vunyingi litahera mba; uvutugi vwi zihiiri vwiutululuka ku munyi kuli mugera gutakamaa. Mulava kuli mwana mudoto olelangwa na mama weve, agingangwa mu maha, nukulindwa muvuyaanzi.

¹³ Ndamuleminya mwoyo mu Jerusalemi kuli mama aleminyaa umwana weve mwoyo.

¹⁴ Lwa muloraa yaga nigekoleka, mulasangale. Galamukola muve nizinguru kandi avalamu. Maku mulamanya ndi inzi Yahova, ngonyaa yavo avambuliranga, kandi manyianga uvutima vwange ku vasigu vange.”

¹⁵ Yahova alaza numuliru, na magare geege gu vulwani gaveeye kuli kihuzuzi. Alaleeta uvutima vwivwe vululu hasi ni iligondoka lilie kuli lomemo lwu muliru.

¹⁶ Yahova alaleeta likalaga lilie liu muliru kandi alahaana amageri gi kivavi ku vandu vosi. Yavo ava Yahova aliita valava vanyingi.

¹⁷ Yahova avoora, “Keheri keveeye ahimbi ku yavo avitakasa aveene lisigamira misambwa, kandi avazizaa mu milimi jukusigamira nivalonda yavo misambwa avalizaa zinyama zie zimbizi, kandi zinyama zia amajungu harara ni zinyama zindi ziu kuvihiliriza.

¹⁸ Inzi manyirizi zing'anagani ziavo, kandi miyinzi jaavo. Inzi nziza kuvungiza avandu vi zihiiri ziosi harara. Lwa navaze harara, valakalole likora lie zinguru ziange,

¹⁹ kandi valamanya ndi inzi Yahova mbana amageri kuvo. Navuzwa ndahonyia valala nukuvatuma ku zihiiri, ziveeye mu vivala vikagatanaa ni inyanza - Tarishishi, Libia, Lidia kivala keveeye na vasaza vaveeye ni limanya liu kulasa uvuta, Tubali kandi Ivuguriki. Avandu vakikiri kuhulira luyali lwange anoho avakikiri kolola ovonene kandi zinguru ziange, hagati hi zihiiri yizi, valalandiza ovonene vwange.

²⁰ Valaleta avamwavo vinyu vosi kutura mu zihiiri ziosi vave kuli kihanwa ku inzi. Valaletwa ku kiguru change kitakatifu mu Jerusalemi, ni vagingiywi ku zibarasi, amagare gu vulwani, zibunda, zisukiri, kandi zing'amia, kuli avandu va Isiraeli valeta uvuswage mu viju ivilahi kuli kihanwa mu litembeli liange.

²¹ Avalala kuvo, ndavakora vave avasaalisi kandi avandi vave vandu va Levi.

²² “Avandu vange harara ni visukululwi viavo valamenya mihiga ni mihiga, kuli ligulu lihia kandi lirova lihia via ndilomba vilakamenye mihiga ni mihiga.

²³ Ku vuli lilia liu mweli muhia, kandi ku vuli lisabato, avandu vosi vi ihiiri valaza kusigamira mu lidaala linene lia Jerusalemi,” Yahova avoora.

²⁴ “Avandu vosi valazia nokohenza ku miviri jakuza jayavo avamala kwibaala ku inzi. Zing'ende zililia miviri jaavo na si zilakuza mba, kandi muliru guvasamba si gulasiminywa mba, kandi valava chu kuvihiliriza ku vandu vosi.”