Isaya 65 - KITABU KITAKATIFU

Amageri ga Nyasaye ku Avibaali

¹ Yahova yavoola, “Inzi ndaali ninzetegeki kuhaana amativuli kulisaala lia vandu vange, navuzwa si vasaala ku inzi mba. Ndaali ninzetegeki yavokonyoora, navuzwa si vaageriza konyenya kali niiva ndaali ninzetegeki vuli kazozo kuhaana amativuli ku lisaala liavo ndi, ‘Inzi mbeeye hano, ndamukoonya.’

² Inzi mali kwetegeka vuli kazozo kwingiliza wange avandu vaveeye vibaali, avagendaa kuzinzira zitaveeye zindahi, kandi avalondaa iziganagani ziavo aveene.

³ Vugira zisoni vazizagiliraa kongola kuva nu vutima. Vahanaa visiuviliru ku munyasaye wi milimi jiavo, kandi vasamba ivimuli vifunya umwayu ku vwali vwa vanyasaye.

⁴ Ing'inga yu vudiku vazizaa mu vilindwa kwenya zing'anagani kutura ku miroho ja vandu vakuza. Valiza zinyama zie zimbizi, kandi vanwa umunyu golombeywi kutura ku zinyama zihaanwa ku avanyasaye kuli ivisiuviliru.

⁵ Maku, vavoola ku vandi, ‘Mutisuunda ahimbi ni kunyi mba; kigira koveeye avatakatifu ligali kuvita munyi!’ Inzi sinyala kwikuzira ku avandu kuli yava mba. Uvutima vwange voveeye kuvo kuli umwochi mu muulu gange, kandi muliru gwakaa lidiku liosi.

⁶ “Inzi mali kotovola kuhaana amageri, kandi likalagirwa liavo limali kong'odwa. Si ndachiring'ana ku goosi agavamali kokora, navuzwa ndatunga kisaalia kuvo.

⁷ Ndahaana amageri kuvo kigira uvwoni vwavo, kandi uvwoni vwa vaguuga vaavo. Kigira vamali kuhaana ivimuli ku vigulu ha vasigamira imisaambwa, kandi nu kovora amakuva madamanu ku inzi. Kunangwa ndahaana amageri kuvo kolondekana ni lienya lie vikolwa viavo.”

⁸ Yahova avoora, “Siaveeye ho mundu wononyia amazabibu malahi mba; navuzwa alombaa iwaini kutura kugo. Inzi si ndakononyie avandu vange mba, navuzwa ndakahonyie avatumikiraa inzi.

⁹ Ndagasiza avandu va Isiraeli avaveeye vi ihiiri ya vandu vi Ivuyuda, kandi visukululwi vaavo valamenya mu kivala change chi ivigulu. Avandu vange avatovole, avandumikiraa, valamenya mu kivala yiki.

¹⁰ Valasigamira kandi valava nu vwayiru vwi mitugu jaavo mu kereremo cha Sharoni kandi mu livona lia Akori.

¹¹ “Navuzwa munyi mwaleka inzi, Yahova winyu, kandi mwayivirira kiguru change Kitakatifu Munyi mwalomba viukulia niviukunwa nimuhaana ku avanyasaye vu vutugi kandi vi livamwoyo liekeheri.

¹² Munyi vosi muliitwa ni kivavi, mulinama na mulasinzwa, kigira, lwa ndamulanga si mwahaana amativuli mba, kandi lwa ndamoloma ku munyi, simwahulira mba, navuzwa mwakora agaveeye amadamanu imbiri wange, kandi mwatovora agandavula kuyaanzizwa nago.

¹³ Kulwayago, yavo avasigamiraa inzi kandi avahulira inzi valanyora lilia kandi linwa linyingi, navuzwa munyi mulava ninzara kandi muvuluhu. Valava nu vusangali, navuzwa munyi mulava mu zisoni.

¹⁴ Valimba nu vusangali mu mioyo jaavo, navuzwa munyi mulalira kigira uvuzunu mu mioyo jinyu.

¹⁵ Avandu vange avatovole valatumikira lieta lienyu kuli kilaamo. Inzi Yahova Nyasaye ndamwita, navuzwa ndahaana lieta lihia ku yavo avahulira inzi.

¹⁶ Mundu woosi oteeva uvugasu mukivala, alateeva uvugasu kutura ku Nyasaye musuuvirifu. Oyo wi suuhaa mu lirova, alisuuha ku Nyasaye wa agiligali; uvudinyu vwaliho kutura kale, vumali kwivilirwa ligali.”

Kelombe kihia cha Yahova

¹⁷ Yahova avoora, “Inzi nombaa lirova lihia kandi ligulu lihia. Vindu via kale vilivirirwa ligali.

¹⁸ Kunangwa muyanze kandi musangare mihiga ni mihiga mu via inzi nombaa. Jerusalemi imbia ya inzi nombaa, ilava yu vusangali ligali, kandi avandu vi lidaala yili valava nuvuyanzi.

¹⁹ Inzi ndasaangalira Jerusalemi, Kandi ndayaanzizwa na vandu vange vi lidaala yili. Lisioma kandi lilira si vilavaho mba.

²⁰ Avana vadoto si valakuza mba, anoho avandu vakulundu si valakuza ni vakikiri kuduukiza amadiku gaavo mba. Mundu woosi ukuza naveeye ni mihiga 100, alava naveeye vuzaa kuli musoleri. Navuzwa mundu woosi ukuza nakikiri kuduukiza mihiga 100, kilava kuli kilaamo kuye.

²¹ Avandu valumbaka zinyumba kandi valamenya muzio aveene, valataga mizabibu mu milimi jaavo kandi valalia amakuyu gajo.

²² Si valumbaka zinyumba ma vandu vandi vamenye mu mba. Si valataga mizabibu mu milimi jaavo na vandu vandi kulia amakuyu gajo mba. Amadiku gi limenya lia vandu vange avatovole galava kuli amadiku gi limenya lie misaala. Kandi valasangalira amakuyu gi miyinzi ja makono gaavo ku madiku manyingi.

²³ Si valakola miyinzi ja vuzwa mba, kandi si valivula avana vaduuki mu kivi mba, navuzwa ndagasiza avandu vange, kandi avana harara ni visukululwi viavo valagasizwa muzing'inga ziosi ziza.

²⁴ Kali imbiri wa vakikiri kumala lisaala liavo ku inzi, ndahaana amativuli ku lisaala liavo.

²⁵ Vivwi na amagondi vilaaya harara, zisimba zilaaya uvunyasi kuli zigiriki, kandi zinzoka zilakomba uluguchi. Si vilasalirizana kandi si viladivizana mu kiguru change kitakatifu mba.”