Isaya 63 - KITABU KITAKATIFU

Yahova Uguuti Zihiiri

¹ “Nivwaha uyu uzaa kutura mu lidaala linene lia Bozira mu kivala cha Edomu? Nivwaha uyu, uwiviiki zinguvu zinzakanyu, na ziuvukumi, uzizaa imbiri mu vonene vwi zinguru zizie?” “Ni Yahova, wizingulu okohonyia, uzaa kulandiza uvuguuti vwivwe.”

² “Kigira ki zinguvu zizie ziveeye zinzakanyu, zinzakanyu ligali kuli ziu mundu uduvagaa mazabibu uukamulaa iwaini?”

³ Yahova yativura, “Inzi mali kuduvaga zihiiri kuli mazabibu, na siali ho nu mulala waza kongonya. Ndaziduvaga ligali mu vutima vwange, na amasahi gaavo giivaki ku zinguvu ziange ziosi.

⁴ Ndaakalaga ndi ing'inga yo kohonyia avandu vange imali kuduuka; yaali ing'inga yu kuhaana mageri ku vasigu vaavo mu livaanza kisaalia.

⁵ Na ndaali niligenya lwa ndahenza nokolola ndi sihali nu mulala wokongoonya. Ndahuga nukutia ligali kolola ndi si haali ho nu mulala wukunyunga mukono. Kunangwa ndanyoora liguuta kuzinguru ziange umwene, na uvutima vwange vululu vwangonya.

⁶ Ndaaduvagira hasi avandu vi zihiiri mu vutima vwange. Ndavakora vahambiki mu vutima vwange vululu. Ndasundura masahi gi livamwoyo liavo hasi ku lirova.”

Vulahi Vwa Yahova ku Isiraeli

⁷ Ndavolera avandu amakuva gu vuyanzi vwa Yahova uvutali ne kegero. Ndamwizominya kolondekana ku goosi aga Yahova amali kokolera kunyi. Yee, umali kokora ivindu vinyingi ku vandu va Isiraeli; kolondekana ni livererera lilie kandi kuli zimbavasi zizie zitahera.

⁸ Yahova yavoola, “Ligali yava vaveeye avandu vange, avandu vatanyala kungada kali hakuzu.” Nandio yavahonyia.

⁹ Mu lidambizwa liavo liosi, yaasalirizwa, na engelosi yeye yavahonyia; mu vuyanzi ni zimbavasi zizie, yavasoola; yavadenda kutura kale.

¹⁰ Navuzwa vibaara nokovereriza Roho weve Mutakatifu; Kunangwa Nyasaye yaavikiruka nukugwa musigu wavo kandi nalwaana navo.

¹¹ Maku avandu veve vizuliza madiku ga kale, madiku ga musa mutumikiri weve. Vateva, “Yahova aveeye haliha kalunu, aviimiliri va vandu veve kutura mu inyanza nzakanyu? Aveeye haliha uyu uwavika Roho weve Mutakatifu hagati haavo,

¹² uwaakola zinguru ziu vukumi vwivwe kuzia ku mukono mulungi gwa Musa, niyaavukanyia amazi gi inyanza nukwimilira avandu veve ku aduuki kwelombera lieta lie mihiga ni mihiga;

¹³ uwavimilira kuvitira hagati hu luliva lwi inyanza? Kuli ibarasi inyagura mwigendanyama, si vikigitara mba.

¹⁴ Kuli zing'ombe ziziizaa mu livona ligunamu, nindio Roho wa Nyasaye yaaha avandu veve ovososi. Kunangwa nindio ivi, O, Yahova, wimilira avandu vovo, uduuki kwelombera umwene ilieta liu vukumi.”

Lisaala liokoteeva liverererwa kandi ovokonyi kutura ku Yahova

¹⁵ Yahova, ohenze ku kunyi kutura mwigulu, uwa omenya mu vutakatifu kandi mu vukumi vuvwo. Lihendera kunyi mwoyo liilio linene liveeye haliha? Zinguru zizio ziveeye haliha? Uvuyanzi vuvwo ni zimbavasi zizio ziveeye haliha? Utahuhiza kunyi mba.

¹⁶ Ivi oveeye baba wiitu. Avaguuga viitu, Aburahamu na Yakobo, sivavugilira kunyi mba, navuzwa ivi, Yahova, oveeye baba wiitu kandi muhonyi wiitu, kutura kale.

¹⁷ O, Yahova, kigira ki olekaa kunyi kogote kutura kuzinzira zizio? Kigira okolaa kunyi kove nikirage kali kuduuki kugirung'ana kutura ku ivi? Mwaza yirana ku kunyi kulwu vulahi vwa yavo avakutumikiraa ivi, kandi kulwa avandu yavo avaveeye avoovo kazozo kutura maziambiri.

¹⁸ Kunyi avandu vovo vatakatifu, kwavugula ahatakatifu hoho ku ing'inga ngekeeke, navuzwa avasigu viitu vaduvagira hasi Litembeli liilio.

¹⁹ Kumali kugwa kuli yavo ava ivi wavula kwamiiha kali hakuzu, kandi kuli avandu avavura kulangwa ku lieta liilio.