Isaya 6 - KITABU KITAKATIFU

Nyasaye yalanga Isaya kuva umuporofeti

¹ Mu muhiga gwu mwami Uzia yakuza, ndaalora Yahova mu malola. Yaali niyikaye kondeve yeye yu vwami, igulu kandi niigingiywi igulu ligali. Ulukigiti lwi iganza yeye lwizura Litembeli liosi.

² Zingelosi zisingiyi igulu weve, vuli indala yaali nizimbaha sita; yakunika mumoni mwimwe nizimbaha ziviri, kandi yakunika muviri gwigwe nizimbaha ziviri, nitumikira zimbaha zindi ziviri kuburuka.

³ Zihanzuka harara nizivoora: “Mutakatifu, Mutakatifu, Mutakatifu! Yahova Wuvunyali aveeye Mutakatifu, uvukumi vwivwe vwizuyi mu lirova liosi.”

⁴ Mwoyo gwi lihaanzuka liazio gwadegeriza misingi ji miliango ji Litembeli, na Litembeli liene liizula mwoki.

⁵ Inzi ndavoora, “O, vayaayi, kivi keveeye ku inzi! Choosi cha mboraa keveeye chu vwoni, kandi menyaa hagati havandu va vuli likuva liavo liveeye liuvwoni. Navuzwa mali kolola mwami, Yahova Wuvunyali!”

⁶ Maku indala ku zingelosi yaaburuka kuuza ku inzi nigingi lianda liu muliru liayaali nivuguyi ni kigumiliru kutura ku vwali.

⁷ Na yaadira munwa gwange ni lianda liu muliru zana navoora, “Yili limali kudiira munwa gugwo, na kalunu mahiolo googo gatuliziywi ho kandi uvwoni vuvwo vusamihiywi.”

⁸ Maku ndahulira Yahova navoora, “Nivwaha wanyala kutuma? Kandi nivwaha unyala kuva mutumwa wiitu?” Maku ndavoora, “Inzi mbeeye hano nduma!”

⁹ Kunangwa yambolera nzie kovoolera avandu makuva yaga: “Mulahuliriza ligali, navuzwa si mulamanya agaakoleka mba; mulahenza ligali, navuzwa simulalola mba.”

¹⁰ Maku yambolera, “Lomba zing'anagani zia vandu yava kuluha, hanyia amatu gaavo, kandi vakuliza zimoni ziavo, kunangwa vavuli kolola, anoho kuhulira kinga kumanyiriza. Niiva vakakoli ndio, vakagirungani kuuza ku inzi ma vahonywe.”

¹¹ Ndaateva, “O, Yahova, yaga galava kuli ndi kuduuka ing'inga ki?” Yativura, “Kuduuka lwa madaala manene gadivizwa ligali nokokorwa hazwa, kuduuka lwi zinyumba zitigala vugira mundu, kandi kuduuka lwi kivala chene kidivizwa ligali.

¹² Ndatuma avandu zana ihale ligali nokokola kivala choosi kuva hazwa.

¹³ Kali niiva mundu mulala ku likomi atigala mu kivala yiki, oyo kandi aladivizwa; alava kuli kitinya chu musaala gwa mwaloni ugwatemwa.” Kitinya yicho keveeye kuli litanga lihia lia vandu va Nyasaye mu kivala.