Isaya 58 - KITABU KITAKATIFU

Lihonga lilia liegiligali

¹ Yahova avoora, “Hanzuka vudinyu ligali kuli unyala! Kuba ulwanga kuli kisiriva! Wilwaziri avandu vange - Isiraeli mahiolo gaavo. Volera visukululwi via Yakobo uvwoni vwavo.

² Vuli lidiku vazaa ukusigamira. Vakayilangwa kumanya zinzira ziange, kuli yavo vaveeye ihiiri ekolaa uvulungi kandi itiviliraa malago ga Nyasaye wavo. Vatevaa inzi likalaga lirungi, kandi valoreka kuva nuvuha ukwisunda ahimbi ninzi, Nyasaye wavo.”

³ Avandu vateva, “Kigira ki kunyi kohonge lilia niiva Yahova sialola mba? Kigira ki kwegehiza niiva ivi si uvugulaamu logendo mba?” Yahova avavolera, “Agiligali gaveeye ndi, ku ing'inga ndala nzere ya muhongaa lilia, munyi mwenya vuzwa lieyanziza lienyu aveene, ni mudambiza avayinziri vinyu vosi.

⁴ Lihonga lilia lienyu limukolaa avatindi, kandi mulembanaa nukulwana. Muganaganaa lihonga lilia lienyu kuli yili lilaangola mbulirizi ku kusaala lienyu?

⁵ Lwa muhongaa lilia, mwisalirizaa aveene. Mwinaminyaa mitwi jinyu hasi kuli lulimu, kandi mwalahasia zinguvu zia magunia nukwuhula ku ligoke muduuki kogona ku. Agene yago nigo aga mulangaa lihonga lilia? Muganaganaa ndayanzizwa nagene yago goosi?

⁶ “Liiva lie lihonga lilia lia nyenya ni yili: Mutulizi ho minyororo ji lidambiza kandi iniira yi likalaga litali lirungi, na muleke avadambizwa navatugwa vave vavoholole.

⁷ Musange viukulia vienyu harara na vaveeye ninzara kandi mwiguli zinyumba ku vadaka vatali na hango. Muhaane zinguvu ku yavo avatali nikindu chukwiviika, kandi mutasuula kokoonya aviiko vinyu mba.

⁸ “Nimukora ndio hene yaho uvugasu vwange vulaaka ku munyi kuli liuva liu mugamba kandi zimbala zienyu zilahona vwangu. Vikolwa vienyu vilungi vilamwimilira; na inzi ndamulinda ku zimbega ziosi kigira uvukumi vwange.

⁹ Lwa musaala, ndamutivulira. Lwa mwanira ku inzi ndamutivulira. “Niiva mulatuliza iniira yi lidambiza hagati hinyu, nimuleka lichaya avandi nokovoora amakuva madamanu,

¹⁰ nimuhaana viukulia ku avinzara nuvuhaani vwosi, nukwigutiza lienya lia yavo avaveeye mu kivi, hene yaho uvulavu vonene vulamwakira mu zing'inga zie kisundi, kisundi chienyu kilava kuli mbasu hagati.

¹¹ Inzi Yahova, ndamwimilira kazozo kandi ndigutiza lienya lienyu nivindu vilahi. Ndamukora muve ni zinguru kandi ovulamu mu miviri jinyu; na munyi mulava kuli milimi jisamwa amazi manyingi, kuli kisinukiru cha mazi gacho gatakamaa mba.

¹² Avandu vinyu valumbaka vuhia vianyi vienyu via kale, valaviumbaka kandi ku mise ja kale. Na munyi mulagulikwa avandu vumbaka vuhia madigi gasasuguka, kandi avandu valalomba zinzira zie lidaala zivitiki kandi harara ni zinyumba iziali vianyi.”

Amadanyi gu kulinda Lisabato

¹³ Yahova avoora, “Niiva ulakola lidiku lie Lisabato kuva litakatifu, na uvuli kunyagulira agayaanziza ivi mwene ku lidiku litakatifu liange yilio; niiva ulaleka miyinzi jijo umwene nukuliha uluyali ku livula kuzia ku zing'endo, kuvula kuyinzira, anoho ku livula komolomela amakuva ga vuzwa,

¹⁴ hene yaho, mulanyola uvusangari uvutulaa ku lindumikira. Ndamukora muhevwe uluyali ku lirova liosi, kandi mulasangalira kivala cha ndaha guuga winyu Yakobo. Inzi Yahova mali kovora yaga.”