Isaya 57 - KITABU KITAKATIFU

Nyasaye yakalagiraa Isiraeli ku lisigamira vifananyi

¹ Avandu valahi vakuza kandi siaveeyeho kali uvahenderaa mwoyo mba. Navuzwa lwavakuzaa, kivi sikinyala kuvasaliriza mba.

² Yavo avagendaa mu vulungi vingira mu mirembe; vanyoola ovososi lwa vagona mu likuza.

³ Hambi hano na mukalagirwi munyi avoni! Munyi simuveeye valahi kuvita avasigitiri, avaheyi namalaya mba.

⁴ Muganaganaa mukoleraa vwaha kehenyahenye? Nivwaha wa vavehi munyi mukiniraa?

⁵ Munyi musigamiraa avanyasaye vahaana ulwivulu nokokola ovoheyi isi wi misaala mitakatifu jinyu yijo. Mwitaa vana vinyu kuli visiuviliru mu zimbangaywa zie zinyanda ahimbi numugera.

⁶ Muvuguraa magina materere kutura mu mugera yigwo nukugasigamira kuli avanyasaye. Muzukaa iwaini kugo kuli kihanwa nukugaleetera vihaanwa viu vuswage. Muganaganaa nyanzizangwa ni vindu yivi viosi?

⁷ Muzizaa ku vigulu vitambi ukuhaana visiuviliru nokokolera ku ovoheyi.

⁸ Musingirizaa vifananyi vienyu viukuvihiliriza inyima wi viliango vienyu vie imbiri. Munyi mundeki; munavuuyi zinguvu zienyu kandi munini igulu ku vidali vienyu vivambalalu harara na vayanze vinyu, avamutungaa mitungu ku vaduuki kogona ni munyi. Hene yaho mwigutizaa likayirwa lienyu liu muviri.

⁹ Mwivakaa amarashi namaguta gafunyaa umwayu ma muzia kusigamira umunyasaye Moleki. Mutumaa avatumwa venyu kuzia ihale na himbi, kali kuduuka mu kihadisi ukwenya avanyasaye va musigamira.

¹⁰ Munyi mwiluhizaa aveene kigira zing'endo zindambi zia mugendagendaa nimwenya avanyasaye vandi va musigamira, navuzwa simutulizaa ku mwoyo mba. Muganaganaa ndi vifananyi viukuvihiliriza vienyu vimuhezaa zinguru, na kigira yaga, simudedekeraa mba.

¹¹ Yahova avoora, “avanyasaye vamutiizaa nukutihizwa ligali navo ni vanga vwaha, kunangwa muduuki kombehera kandi kwivilira inzi ligali? Munyi mumali kolekera ukuha inzi uluyali kigira ngiling'ani ku ing'inga indambi?

¹² Muganaganaa ndi agamukolaa gaveeye malungi, navuzwa inzi ndalang'aminya ivikolwa vienyu, na ivifananyi vienyu sivilamukoonya mba.

¹³ Lwa muliraa kwenya ovokonyi, muleke ivifananyi vienyu yivio vimuhonyie! Imbuza ilavihuuza vizie ihale! Navuzwa yavo avasuuviraa mu inzi valamenya mukivala kandi valasigamira inzi mu Litembeli liange.”

Lisuuvirizwa lia Nyasaye lio vokonyi ni lihonywa

¹⁴ Yahova avoora, “Leki avandu vange viirane ku inzi. Mutulizi iviukwikigitariza viosi mu zinzira zia vandu vange! Mwumbake inzira nukujetegekiza!

¹⁵ “Inzi mbeeye Nyasaye oveeye igulu kandi mutakatifu, omenya mihiga ni mihiga. Inzi menyaa havundu haveeye igulu kandi hatakatifu. Kandi menyaa harara na vandu avahocha kandi aviganiri, kunangwa nduuki kuvilanyira kelemamwoyo chavo kandi mbiki zinguru mu lisuuvira liavo.

¹⁶ Ndahaa avandu vange livamwoyo na sindazizagilira kuvayaala anoho kuvavihilirwa mihiga ni mihiga mba.

¹⁷ Ndavasinyikira kigira uvwoni nu vuviti vwavo, kunangwa ndaavaha mageri, kandi nimbaleka. Navuzwa vahindagiriza nivazizagilira kuzia mu zinzira ziavo aveene.

¹⁸ “Mali kolola kuli vaakora, navuzwa ndavahonyia uvulwaye vwavo. Ndavimilira nukuvakoonya, kandi ndaleminya mioyo jia yavo avasioma.

¹⁹ Mbana mirembe ku vosi, vombi vaveeye ihale na avaveeye ahimbi! Inzi ndahonyia avandu vange.

²⁰ Navuzwa avandu vadamanu vaveeye kuli inyanza enene itali nilisoosa, yi iviguvuli viayo sivilekaa kuhinulanywa, niviletaa indagala amasiokolo novodohi

²¹ Sihali ni mirembe ku avoni mba.” Nyasaye wange avoora.