Isaya 54 - KITABU KITAKATIFU

Uvuyanzi vwa Nyasaye ku Isiraeli

¹ Wimbi nuvusangali, O, ivi Jerusalemi oveeye mugumba; ivi uwavula kwivura umwana. Uhanzuki nukwimba vudinyu kigira uvusangari, ivi uwavula kuva ku ni lilumwa liu kwivura. Mukali walekwa alava na vana vanyingi kuvita avana vu mukali oveeye numusaza.

² Vaambalariza uvwiyangu vwi lihema liilio. Vaambula zinguvu ziu kukinga, utigalira mba; Nyira migoye jalio jitambihi ligali, okole vivambo vialio vive nizinguru.

³ Ulasunda zinzako zizio zivambuki ku zimbega ziosi; kisukururwi chicho kilirana kuvugura kivala, ichi zihiiri zindi zimenya mu kalunu. Madaala manene agaali nigang'anywa galizula avandu.

⁴ Utatia mba, kigira siulavikwa muzisoni kandi mba; kandi siulaleganywa mba. Ulivilira uvwoni vwa wakola nukikiri muyaayi kandi siulizuliza manyego guvukunzakali vuvwo mba.

⁵ Umulombi woovo alava kuli musaza woovo. Lieta lilie ni Yahova Wuvunyali. Yahova Mutakatifu wa Isiraeli alakohonyia aveeye Nyasaye wi lirova liosi.

⁶ Isiraeli, Ivi oveeye kuli mukali mukana, uwalekwa nu musaza weve na oveeye mu livererizwa linene. Navuzwa Yahova akulangaa wirane kuye, na avoora:

⁷ “Ndaakoleka ku ing'inga engekeeke; navuzwa ku uvuyanzi vonene ligali, ndakwilanyia hango kandi.

⁸ Ndaagirung'ana kutura ku ivi mu vutima vonene ku ing'inga engekeeke, navuzwa kalunu ndakumanyia uvuyanzi vwange vutali nekeheri. Nindio Yahova ohonyiaa.

⁹ “Mu ing'inga ya Nuhu, ndaalaga ndi sindaleeta kandi imbura zi migelera ku lirova kali hakuzu mba. Kalunu ndagaa ndi sindavihilirwa ivi kandi mba; sindakogondokera anoho kukuha mageri kandi mba.

¹⁰ Vigulu vinyala kutura ho, utugulu tunyala kutulizwa ho, navuzwa zimbavasi ziu vuyanzi vwange vutali ne keheri sivulatula ku ivi kali hakuzu mba. Lilagana liange lie mirembe sililatulizwa ho mba.” Inzi Yahova overereraa ivi mali kovora.

Jerusalemi ya Madiku gaaza

¹¹ Yahova avoora, “O, Jerusalemi Ivi usalirizangwa, lidaala linene litinyalizaa, vugira mundu wukuleminya mwoyo, ndumbaka vuhia imise jijo na magina guvuguli ovonene.

¹² Ndumbaka minaara jijo na magina makanyu, virivwa vivio na magina gang'ereng'anaa kuli muliru, kandi lidigi likukumbirizaa na magina guvuguli, agazuganywa ni zahabu.

¹³ “Inzi mwene ndigiza avandu vovo, kandi ndavaha limedeka lie miandu ni mu mirembe.

¹⁴ Likalaga lirungi kandi uvulungi vilakokola ove nizinguru, ulava ihale kutura ku lidambizwa ni litihizwa linene.

¹⁵ Niiva mundu woosi alakwingilira, sialava naatumiywi na inzi mba; ku vosi ukwingilira nukukulwaana, alagwa mwene imbiri woovo.

¹⁶ “Inzi nombaa umutuli, ufanaa muliru gwa manda nukutura iviugi. Inzi kandi nombaa musikari wuvulwaani, utumikira iviugi yivi ukwita.

¹⁷ Iviugi sinavikusalirizi mba. Mundu nakuyaala mu kiyaalo ulava namativuli, inzi ndakinga avatumikiri vange, kandi valaguuta.” Yahova umali kovora.