Isaya 53 - KITABU KITAKATIFU

¹ Avandu vaativura; “Nivwaha usuuviyi makuva giitu? Nivwaha wi zinguru zia Nyasaye ziavulika kuye?

² Vwali uvulariri vwa Yahova ndi umutumikiri weve aduuki kuviruka kuli kitagwa kedoto ikihilaa imiri hasi mu kivala chumu. Siyaali nuvukumi anoho ligondo lilahi, okokora kunyi kumukayirwi mba. Sichali ho ni kindu kuye chukuyaanziza, sichali ho ni kindu ichakakungusi kunyi kuye mba.

³ Yaachaywa nukusuulwa na vandu; yikuzira ku vusaliri nuvuzunu. Yaali mulala uwa vandu vavisa mumoni mwavo vavuli kumulora. Yalegwa kandi nikumulola siyaali kindu mba.

⁴ “Navuzwa yikuzira ku vusaliri uvwali vove uvwitu, yikuzira ku vuzunu uvwali vove uvwitu. Zing'inga ziosi kwaganagana ndi uvusaliri vwivwe vwali lihevwa mageri kutura ku Nyasaye.

⁵ Navuzwa yatumitwa kigira uvwoni vwitu. Yaasalirizwa kigira uvudamanu vwitu. Ku lihevwa mageri lilie, kunyi konyoole livamwoyo, ku likuywa lilie, kunyi kohoni.

⁶ Kunyi kwosi kuli magondi agaali nigagota, kandi vuli mulala ku kunyi nazizaa kunzira yeye mwene. Navuzwa Yahova yamudwika amageri, amageri aga kunyi aveene kwadukana koheevwe.

⁷ “Yaadambizwa, nukukubizwa ikivi navuzwa yikuzira mu liegehiza, siyaavoola likuva kali lilala mba. Kuli ligondi lihilangwa mukisinziru, kuli ligondi likiring'anaa lwa likalangwa uvwoya, siyaavoola likuva kali lilala mba.

⁸ Yagumirwa nukukalagirwa nukuhirwa ukwitwa, na siali ho nuwahenda mwoyo ku agazizaa kwekoleka kuye mba. Yitwa kigira uvwoni vwitu.

⁹ Yateevwa mu kilindwa harara na vandu vadamanu. Mu likuza lilie, yayavirwa harara na vatugi, kali niyavula kuvunaga malago ku goosi anoho kovora likuva liovovehi.”

¹⁰ Yahova avoora, “Vwali uvulariri vwange ndi aduuki kusalirizwa; likuza lilie liali kisiuviriru cho koleta uvusamiihi. Nandio alalola visukululwi vivie, alava ni livamwoyo lie mihiga ni mihiga, kandi kuvitira muye uvusaaviri vwange vuladukizwa.

¹¹ Inyima wi limenya liu vusaliri alirana kuva nuvusangali; alamanya ndi siyasaaliraa vugira kivuni mba. Mutumikiri wange mulungi uwa inzi nyanzizangwa naye, alagiinga amageri ga vanyingi, na kigira ye ndasamiiha uvwoni vwavo.

¹² Kigira yaga, ndamuviika havundu hu luyali, alagavulana vilaanye harara na avizingulu. Kigira yihaana umwene kuduuka ku likuza, yavalizwa harara na voni; kali ndio, yaginga uvwoni vwa vandu vanyingi kandi nasaara ndi avoni vaduuki kusaamiifa.”