Isaya 52 - KITABU KITAKATIFU

Nyasaye alasoola Jerusalemi

¹ Avandu va Jerusalemi, muve nizinguru zinene kandi! Lidaala litakatifu lia Nyasaye, mwiviki munyi aveene vukumi! Avandu vatamanyi Nyasaye, sivalingira mu virivwa vivio kandi mba.

² Mwevoholole munyi aveene, O, avandu va Jerusalemi! Singiri muturi mu luguchi na mwikale kondeve yinyu yu vwami! Mwevoholole minyororo jimuvohaa mwigoti, munyi avandu vahambe va Ziyoni!

³ Yahova Wuvunyali avoora ku vandu veve: “Munyi mwagulizwa vugira mitungu josi, kandi mulava avavoholore vugira kutunga esendi kali ndala.

⁴ Lwa mwazia komenya mu kivala cha Egebeti, kuli avageni, mwakora ndio ku liyaanza lienyu aveene. Lwa inyima, Asiria yamugumira nukumuvugula kuzinguru vugira kutunga kindu nukumudambiza.

⁵ Na kalunu, kindu kilala chere kimali kwekoleka mu Babiloni. Muveeye avahambe, vugira kindu kutungwa kigira munyi. Yavo avamiiha ku munyi viyizominya niveevoola kandi vamanyiaa lilegeriza ku inzi.

⁶ Ku ing'inga yiza, munyi mulamanya ndi inzi mbeeye Nyasaye kandi mali komoloma.”

⁷ Gaveeye gukuyaanziza ligali, kolola mutumwa naatuliyi mu vigulu, naletaa makuva malahi, makuva malahi gimirembe! Nalandizaa uvuguuti kandi avoleraa lidaala linene lia Ziyoni, “Nyasaye woovo aveeye Mwami!”

⁸ Yavo avalindaa lidaala linene viimba harara kigira uvusangari! Vanyara kolola ni zimoni ziavo aveene, iliirana lia Yahova mu lidaala linene lia Ziyoni.

⁹ “Muhanzuki zinyimbu ziuvusangali, munyi mang'anye ga Jerusalemi! Yahova alahonyia lidaala lilie linene, kandi alaleminya avandu veve mioyo.

¹⁰ Yahova umali kumanyia mukono gwigwe mutakatifu imbiri wi zihiiri ziosi. Keheri choosi chi lirova kilalola ovohonyi vwa Nyasaye wiitu.

¹¹ Muzie! Muzie! Muturi hano; mutadiira kindu kitali kinifu! Muzie mutule hagati ha vandu va Babiloni! Mwitakase munyi avagingaa viju via Yahova.

¹² Ing'inga yiyi simulatula kuzia vwangu vwangu; simulava nimugerizaa ukwiruka mba. Yahova Nyasaye winyu alamwimilira kandi alamukinga ku zimbega ziosi.”

Mutumikiri wa Yahova usaliraa

¹³ Yahova avoora, “Mutumikiri wange alaguuta mu miyinzi jije midinyu. Alahevwa luyali lonene; kandi alanenehizwa ligali.

¹⁴ Avandu vanyingi valatimukwa engolo lwa vamulola kigira ligondo lilie liononywa; siyaali kandi ni ligondo liu mundu mba.

¹⁵ Kunangwa alagenyia zihiiri zinyingi; avami valakiring'ana niligenya; valalola aga vakikiri kololaku, kandi valamanyiriza aga vakikiri kumanya.”