Isaya 51 - KITABU KITAKATIFU

Amakuva go koleminya Jerusalemi mwoyo

¹ Yahova avoora ndi, “Mu mbulirizi munyi avenya lihonywa; munyi avaazaa ku inzi kigira ovokonyi. Muganagane ku Aburahamu, oveeye lwanda lwa mwatula ku kandi magina ga mwavazwa kutura ku!

² Heenzi ku Aburahamu baba winyu, kandi ku Sara uwamwivula; lwa yaali yeng'ine inzi ndaamulanga ni ndamugasiza ma nimuha avana. Ndakora visukululwi veve kuva vanyingi.”

³ Inzi Yahova, “Ndaleminya Jerusalemi mwoyo. Kandi ndaleminya mwoyo yavo vosi avamenyaa mu mang'anye galio. Kali niiva kivala chalio keveeye ichangalangwe, ndakekola keve mulimi kuli gwa Edeni ugwa ndataaga. Uvuyanzi nuvusangali vilava yo, kandi zinyimbu zieliizominya kandi lisandiza ziliimbwa ku inzi.

⁴ “Mumbulirizi, munyi avandu vange, muhulirize ku ichambolaa. Mbana amigizu gange ku zihiiri; malago gange galavaletera uvulavu.

⁵ Ndaaza vwangu nukuvahonyia; ing'inga yi liguuta liange eveeye ahimbi. Inzi mwene ndamiiha ku zihiiri. Vivala vie ihale vinindilira inzi nzize. Valalindilira ni lisuuvira ndi ndavahonyia.

⁶ Mugiingi zimoni zienyu muhenze mu ligulu; muhenze hasi ku lirova! Ligulu lilavuya kuli mwoki lirova lilakunguha kuli inguvu ingulu. Avandu vaveeye mu kivala vosi valakuza kuli ziinji. Navuzwa vohonyi vwa ndileeta, vulahindira mihiga ni mihiga; liguuta liange lilava liu kumalirika.

⁷ “Mumbulirizi munyi avamanyi agaveeye malungi, munyi avaveeye na malago gange mu mioyo jinyu. Mutatia lwa vandu vamuhenyahenyaliza nukumunyega mba.

⁸ Zisere zilavalia kuli ziliizaa inguvu ingungu; zilavalia kuli ziliizaa inguvu yuvwoya. Navuzwa ovohonyi vwange ndeetaa, vulahindira mihiga ni mihiga. Liguuta liange lilava ho ku makura goosi.”

⁹ Hamba, O, Yahova, na okokonye! Tumikira zinguru zizio na okohonyie; uzitumikiri kuli wazitumikira maziambiri. Yaali ivi uwakalaga ogoyoka gwu mu inyanza Rahabu mu vidonye.

¹⁰ Yaali ivi kandi uwakaminya inyanza, kandi nolomba inzira kuvitira mu mazi, kunangwa yavo avawaali nohonyia vaduuki kwambuka.

¹¹ Yavo ava umali kohonyia valilana Jerusalemi mu nuvusangali, nivimba kandi nivahanzuka kigira uvusangari. Valayaanza mihiga ni mihiga, kigira vovereri nilisioma vilatulizwa ho mihiga ni mihiga.

¹² Yahova avoora ndi, “Inzi niyie ukuhezaa zinguru; kigira ki utizaa mundu akuza, kuli vunyasi?

¹³ Ivi wiviiliyi inzi Yahova uwakolomba, uwaavambula ligulu kandi uwavika mise jie lirova. Kigira ki omenye muvuti kazozo vwu vululu vwa yavo avakudambizaa, vwa yavo aveetegeki kukudiviza? Uvululu vwa avadambizi voveeye haliha?

¹⁴ Yavo avaveeye vahambe valava vavoholole vwangu; valamenya madiku, manyingi nukuva nichukulia kinyingi ichavalia.

¹⁵ “Inzi mbeeye Yahova Nyasaye woovo; uvuruganyiaa inyanza, nokokola viguvuli vihuumi. Lieta liange liveeye Yahova Wuvunyali!

¹⁶ Mali kuviika makuva gange mu munwa gugwo, nguvisi mu chiriri chu mukono gwange; ndaavambura ligulu niinzava muse gwi lirova, mbolera munyi avandu va Jerusalemi: ‘Munyi muveeye avandu vange.’ ”

Keheri chu vusaliri vwa Jerusalemi

¹⁷ O, Jerusalemi, vuka! Vuka ivi mwene na usingiri vulungi! Ivi umali kunywa kutula mukekombe cha mageri icha Yahova amali kukuha mu vutima vwivwe; lwa mwakinywa mwagoyana.

¹⁸ Hagati ha vana vosi va wiivula, sihali ho nu mulala ukwimilira, sihali ho na kali mulala ukugumira mukono ku vana vosi va waavirukiza mba.

¹⁹ Uvuvi yivu vwombi vukugwiliyi. Uvwoneku ni lidiviza, inzara ni liitwa nivwaha ukovelerera? Nivwaha okoleminya mwoyo?

²⁰ Avana vovo vagwiyi hasi, kigira vwongoyi vaagoni mu keheri cha vuli inzira, vaveeye kuli embongo igumiliywi mu mutego gwu muhiizi. Vanyangizwa nu vutima vwa Yahova. Kandi ni ligondoka lia Nyasaye.

²¹ Kunangwa, hulirizi munyi avandu va Jerusalemi avasalirizangwa, munyi avahambiki, navuzwa sigali kigira iwaini.

²² Yahova, Nyasaye winyu, ukingaa munyi avoora, “Inzi mali kutuliza ho vutima vwa ndamuha mu vutima vwange. Simulanwa kandi iwaini imukolaa kugoyana mba. Si mulanwa kandi lubaago lwu vutima vwange mba.

²³ Ndanwehiza avadambizi vinyu kekombe yicho. Yavo avamukola mugone hasi mu zinzira. Ni vakora migongo jinyu kuli lirova, kandi kuli inzira yaavo yukuvitira ku.”