Isaya 48 - KITABU KITAKATIFU

Nyasaye aveeye mwami wi ing'inga yiza:

¹ Munyi avandu va Isiraeli, avaveeye visukululwi kutura Ivuyuda, muhuliri yaga. Mwisuuha ku lieta lia Yahova kandi ni muvooraa ni minwa jinyu ndi, mulasigamira Nyasaye wa vandu va Isiraeli, navuzwa simwavoola agiligali mba.

² Kandi mwigingiraa nokovoora ndi muveeye avandu vi lidaala linene litakatifu lia Jerusalemi kandi mweredaa ku Nyasaye wa vandu va Isiraeli, wi lieta lilie liveeye “Yahova Wuvunyali.”

³ Yahova avooreraa avandu va Isiraeli ndi, “Mu madiku gakale, ndaamuvuulira agaali nigazizaa kwekoleka, maku, nonoho ndagalomba gekoleke.

⁴ Inzi ndaamanya ndi munyi mulaloreka kuva avahindagirizi, kandi avi mitwi midinyu kuli kivia kandi mugasa.

⁵ Ndamuvulira kale vindu viaza viekoleke ku munyi ku madiku gaaza, kandi nimuvoolera vindu viaza viekoleke imbiri wa vikikiri kwekoleka. Ndakora yaga kunangwa namuvuli kovora ndi, ‘Vifananyi viange viakola yaga kokoleka; vifananyi viange vie misaala nu munyasaye wikivia yagatakasa.’

⁶ “Munyi kalunu mumali kolola vindu via ndamuvolera viosi vimali kokoleka, na muduuki kuvugilira ndi livuula liange liveeye lia agiligali. Kalunu ndamuvolera vindu vihia vizizaa kwekoleka, vindu viandavula kali kumuvuulira maziambiri.

⁷ Ni kalunu lweng'ine lwa ngolaa vindu yivi kokoleka; sikeveeye ho ni kindu chekoleka kuli yiki mu madiku gaavita mba. Kilava ni chekoleka, ngano mwaali muvoore ndi mwamanya vindu yivi viosi.

⁸ Munyi simwahulira, kandi simwamanya kutura mu madiku gakale mba. Inzi ndaamanya ndi munyi muveeye avagaadi, kandi muveeye avibaali kutura mu liivulwa lienyu.

⁹ “Ndalindagiriza uvutima vwange kunangwa avandu vaduuki kumwizominya, kandi sindamudiviza mba.

¹⁰ Inzi mali kumugeriza mu muliru gwu kusaliriza, kuli ifeza isiyangwa mu muliru, navuzwa mali kunyoola ndi munyi simuveeye kindu mba.

¹¹ Ndaakola yaga kigira inzi mbeeye Wuvunyali, sindaleka lieta liange livuli kohevwa luyali mba, noho sindaleka munyasaye wundi kohevwa lizominywa mba.”

Sairasi Mwimiliri Mutovole wa Yahova

¹² Yahova avooreraa avandu va Isiraeli ndi, “Mumbulirizi, munyi avandu va Isiraeli ava inzi mali kulanga! Inzi mbeeye Nyasaye wu kutanga kandi we keheri!

¹³ Ndaalomba musingi gwi lirova, kandi ndaavambura ligulu. Lwa mbilangaa visingira viombi harara.

¹⁴ “Muvugane mwosi harara, kandi mu mbulirizi munyi mwosi! Avulaho mulala ku avanyasaye vinyu uwaali unyala kuvuula ndi umundu wa inzi mali kotovola alingilira lidaala linene lia Babiloni; alakola aga inzi mali kusaavira gakolwe ku vandu va Babiloni.

¹⁵ Inzi mali kumulanga kandi kumutovola; ndamwimilira kandi ndaamugasiza mu zinzira zizie ziosi.

¹⁶ “Munyi avandu va Isiraeli, mwisuundi ahimbi ku inzi, kandi muhuliri agamuvoolera. Ndavoora amakuva gange ku munyi havulavu kutura mu litanga, kandi goosi agambooraa kumunyi gaveeye agiligali.” Kalunu mwami munene Yahova yambeeye zinguru zizie kandi yaandumi.

Lilohiza lia Yahova ku vandu veve

¹⁷ Nyasaye Mutakatifu wa vandu va Isiraeli, Yahova ahonyia munyi, avoora: “Inzi mbeeye Yahova Nyasaye winyu, uwenyaa kumwigiza kigira uvulahi vwinyu, kandi mwimiliraa kogenda kunzira idukanaa kogenda kuyo.

¹⁸ “Mulava ni mwahulira amalago gange, ngano uvugasu vwayituluka ku munyi kuli migera ja amazi jilivula kukama mba. Kandi ngano mwaali muve ni liguuta kuli viguvuli via mazi ku inyanza.

¹⁹ Zinzivulu zienyu ziakaveeye kuli muyeka, kandi visukululwi vienyu viakaveeye kuli zinzaro ziu muyeke, kandi ngano sindaamuvika ku lidivizwa mba.”

²⁰ Muzie muturi mu kivala cha Babiloni, mulandizi ku vandu vosi ha vundu hoosi amakuva amalahi gu vusangali: “Yahova umali kohonyia avatumikiri veve Isiraeli!”

²¹ Yahova yimilira avandu veve kuvitira muchangalangwe ichumu kandi kihiu ligali, navuzwa sivali nuvuluhu mba. Nyasaye yavaha amazi kutura mu lwanda, yatanyia ulwanda, na mazi gaturaa mu.

²² Yahova avoora, “Mirembe sijiveeye ho ku voni mba.”