Isaya 47 - KITABU KITAKATIFU

Ligwa lia Babiloni:

¹ Yahova avoora, munyi avandu vi lidaala linene lia Babiloni, “Mwiki hasi kutura kondeve yinyu yu vwami, mwikale hasi mu luguchi. Mwaali kuli mukaana mugima, wi lidaala lia Kalidei, navuzwa kalunu simulava avimioyo mike anoho avadedekere mba. Kalunu muveeye kuli avatugwa!

² Muvuguli zing'ina musie uvusie! Mutulizi zinguvu zifuumi mu zimoni zienyu! Mutanduli zinguvu zienyu zindahi. Mukunyi zinguvu ku virenge vienyu ma mwambuki migera ja mazi!

³ Avandu valalola chahonyo chiinyu, kandi mulava mu zisoni. Ndatunga kisaalia, na sindaleka mundu kali mulala mba.”

⁴ Yahova Wuvunyali aveeye muhonyi wiitu, aveeye Nyasaye Mutakatifu wa avandu va Isiraeli.

⁵ Yahova avooreraa lidaala lia Babiloni, “O, munyi avandu va Babiloni, mwikale mu kisundi muchiring'ane, simulalangwa kandi mwami wi kikali wi zihiiri mba.

⁶ Inzi ndaali nu vutima na vandu vange; ndaavakolera kuli sivali vandu vange mba, ndaavaviika mu zinguru ziu vwami vwa Babiloni, kandi siwavavererera mba. Kali avasaakulu avakulundu vaali mulilindika lidinyu ligali.

⁷ Munyi avandu va Babiloni, mwaganagana mulamiiha mihiga ni mihiga, simwaganagana ku vindu yivi mu mioyo jinyu mba, kandi simwaganangana kuli keheri kiliduuka mba.

⁸ “Kalunu muhuliri yaga, munyi avandu vamenya mu liiva liu kwiyaanziza, munyi avaganaganaa mwahona. Musuuviraa muveeye avanene kuli Nyasaye, kandi siaveeye ho nu mundu wundi kuli munyi mba. Mwaganagana simunyala kuva avakunzakali mba anoho avana vinyu sivanyala kukuza mba.

⁹ Navuzwa mu ing'inga indala kandi mu lidiku lilala, mulakuza harara na avana vinyu vosi, kali niiva muveeye ni zinguru zinene kandi zinyingi ziu vukumu kandi uvusigitiri.

¹⁰ “Mwayanzilira kokora uvudamanu, mwaganagana ndi mundu kali mulala siyaali anyala kumulora mba. Ovogeri kandi limanya lienyu viamugotiza, kandi mwavoora mu mioyo jinyu, ‘Kunyi koveeye Nyasaye, siaveeye ho nu wundi kuli kunyi mba.’

¹¹ Kigira yaga, kivi kiladuuka ku munyi, navuzwa uvukumu vwinyu sivulamuhonyia mba. Nonoho lidiviza liladuuka kumunyi lia mutamanya mba.

¹² Kalunu musingiri vudinyu nu vukumu kandi nu vusigitiri vwinyu, vwa mwaali navwo kutura ni mukikiri avana. Hawundi munyala konyoora ovokonyi, anoho munyala konyoora zinguru ziu kutihiza avasigu vinyu.

¹³ Munyi simuveeye novokonyi ni zing'anagani zia muyoolaa kutura kuvasigitiri mba. Mwaniri ovokonyi kutura ku vandu vaveeye ni limanya lie zing'ereng'ani mu ligulu, kandi avanyala kumuvuulira vuli mweli agazizaa kwekoleka ku munyi.

¹⁴ Ligali vaveeye kuli vunyasi vwumu kandi muliru gulavasamba! Siaveeye ho kali mulala unyala kuhulira uluuya lwa yotaa muliru gwu vunyasi vwumu mba. Sigulava muliru gwa manda gwu kwota anoho muliru gwu kwikala ahimbi mba.

¹⁵ Yava ni vakumu kandi avasigitiri, avamwenyereriza zing'anagani kutura kuvo, kandi avamwakiranyia navo kutura ni mukikiri avayaayi; vosi valatura ku munyi, mundu mulala sa mulala alazia kunzira yeye yuvuchamu. Sialatigala ho mundu kali mulala amuhonyia mba.”