Isaya 46 - KITABU KITAKATIFU

¹ “Yiki nekeheri cha Beli na Nebo, avanyasaye va Babiloni, avasigamirangwa mu litanga; navuzwa kalunu vagingiywi ku zibunda, uvuliduhu ku migongo ji zinyama ziiluhi.

² Vamali kugumirwa kandi kugingwa nukuhirwa ihale, sivanyala kwehonyia aveene mba. Yiki nekeheri cha avanyasaye va Babiloni!

³ “O, mumbulirizi munyi visukululwi via Yakobo, vosi avatigara ku avandu vange! Ndaamulinda kutura ing'inga ya mwivulwa.

⁴ Inzi mbeeye Nyasaye winyu, ndaamulomba kandi ndamulinda, kuduuka lwa muva avasaakulu vi zimbuzi. Ndamukonya kandi ndamuhonyia.”

⁵ Yahova avoora, “Nivwaha wamunyala koneng'anyia kuye? Aveeye ho nu mundu wundi woosi kuli inzi?

⁶ Avandu vatuliza izahabu mu zimuya ziavo, kandi vagera ifeza ku vibimu. Venya muturi wi zahabu wi mitungu ma alombe munyasaye wi zahabu, maku vamwinamiri kandi vamusigamiri!

⁷ Vavugura munyasaye uyu nu kumugingira ku mavega gaavo, ma vamusingiriza havundu, kandi sianyala kogenda mba. Niiva mundu alasaala kuye, sianyala kumuha amativuli mba, anoho sianyala kumuhonyia kutura mu kivi mba.

⁸ “Mwizurizi yaga munyi avoni, kandi muganagane ku gamali kokora.

⁹ Mwizurizi vindu viakoleka mu madiku ga kale, muduuki kumanya ndi inzi wengine mbeeye Nyasaye, kandi siaveeye ho nu munyasaye wundi kuli inzi mba.

¹⁰ Kutura mulitanga, ndalolekizaa agaza gekoleke; kale ligali ndaavura agaali ganyala kwekoleka. Ndavoora ndi, lilohiza liange sililagwa mba, kandi ndakora vuli kindu choosi cha ndasaavira kokora.

¹¹ Ndalaanga mwami Sairasi kutura Ivugwi mu kivala cha Pasia, alaza kuli iliive, kandi alatwekiza goosi agandalohiza kokora. Inzi mali kovora kandi galakoleka.

¹² “Mbulirizi munyi avandu vaveeye avahindagirizi, kandi avaveeye ihale kutura ku vohonyi.

¹³ Lidiku liovohonyi liveeye ahimbi siliveeye ihale ligali mba. Sindalindagira koleta vohonyi vwange mba. Ndahonyia avandu va Jerusalemi kandi ndaleta lizominywa ku avandu va Isiraeli.”