Isaya 44 - KITABU KITAKATIFU

Yahova niyie oveeye Nyasaye yeng'ine

¹ Yahova avoora, “Huliriza kalunu, O, Isiraeli, vatumikiri vange, avandu vange vatovole, visukululwi via Yakobo.

² Inze ni Yahova wamulomba; ndaamukonya kutura ing'inga ya mwivulwa. Utatia mba; Ivi oveeye mutumikiri wange, avandu vange vatovole ava inzi nyanza.

³ “Ndahaana mazi ku yavo avaveeye nuvuluhu. Kandi ndakora migera ja mazi kogenda ku kivala chumu. Ndahaana Roho wange ku vana vovo, kandi ndahaana uvugasu vwange ku visukululwi vivio.

⁴ Valasivuka kuli uvunyasi vusamangwa amazi vulahi, kandi kuli misaala jimelaa himbi ni migera ja mazi.

⁵ “Mundu mulala sa mulala alavoora, ‘Inzi mbeeye wa Yahova.’ Valaza nukuhambana na vandu va Isiraeli. Vuli mulala alang'oda lieta lia Yahova ku mukono gwigwe, kandi aliigulika umwene kuva mulala ku vandu va Nyasaye.”

⁶ Yahova, uwamihaa kandi ukingaa Isiraeli, Yahova Wuvunyali avoora ndi: “Inzi mbeeye Nyasaye Weng'ine, Wukutanga nu Wekeheri; sihaveeye ho na nyasaye wundi, navuzwa inzi.

⁷ Mundu wundi woosi yakakoli aga inzi ndaakola? Nivwaha wakavuuyi goosi agazizaa kwekoleka kutura mu litanga kuduuka ku keheli ching'inga?

⁸ Avandu vange, mutatia mba! Munyi mwamanya yaga kutura zing'inga zia kale kuduuka lero inzi ndaamara kuvuula goosi agazizaa kwekoleka, na munyi muveeye avaloli vange. Haveeye ho na nyasaye wundi lugano ku inzi? Haveeye ho na nyasaye wundi wizingulu wa inzi ngikiri kumuhulira kali hakuzu?”

Uvusiru vwu kusigamira vifananyi

⁹ Vosi avalomba vifananyi vaveeye hazwa, na avanyasaye va vayanzilira sivaveeye novokonyi mba. Yavo avasigamiraa avanyasaye yava vaveeye avavoku kandi sivamanyi kindu kali hakuzu, kandi valava mu zisoni!

¹⁰ Sihaveeye ho novokonyi kolomba ekelombe kutura ku kivia anoho kifananyi chu kusigamira kuli nyasaye mba!

¹¹ Mundu woosi ukisigamira alaviikwa mu zisoni. Avandu valomba vifananyi vaveeye avandu vuzwa, leka vaze kusingira mu kiyaalo. Valatiihizwa kandi valaviikwa mu zisoni ligali.

¹² Umutuli wi vivia avugulaa kedonye chi kivia nukukisamba mu muliru. Mukono gwigwe gwi zinguru gugingaa inyundu igulu nukuduya nukutwula ikivia kuduuka mu lifana lia yenya. Lwa ayinziraa, ahuliraa inzara, nuvuluhu, kandi alolaa aluhi.

¹³ Umuvazi agelaa lubaho numugoye. Akekolaa umufano gwi kindu cha yenya kuvaaza, ma akivaaza ni viju vivie nokokelomba mu lifana liu mundu, mu lifana liu mundu mulahi wukuyaanziza ma akiviika munyumba yeye.

¹⁴ Mundu atemaa musaala gwu mudalagwa aduuki kugutumikira, anoho atovoraa mudaragwa anoho muduguyu kutura mu mulitu. Anoho anyala kusimika musaala ugulangwa mwerezi ma alindiliraa imbura iguvirukizi.

¹⁵ Mundu atumikiraa kedonye kilala chu musaala kuli iziingu na ekedonye kindi akitumikira ku lilomba kifananyi. Atumikiraa kedonye kilala kugwo kolomba muliru ukwota kandi kolomba migadi. Atumikiraa kedonye kindi okolomba umunyasaye, nukukisigamira.

¹⁶ Alombaa muliru na zindala ku zingu zana, asaambira ku inyama, agilia kandi yiiguta. Yotaa muliru umwene ma avoora, “Goveeye mulahi kandi nuluuya! Magu sagwagaasa!”

¹⁷ Kedonye kitigaye akelombaa kifananyi, maku yinamira kifananyi zana nukukisigamira. Asaalaa kucho nokovoora, “Ivi oveeye nyasaye wange, ombonyie!”

¹⁸ Avandu kuli yava vaveeye vasilu ligali kali sivanyala kumanya icha vakora mba. Vakunika zimoni ziavo kunangwa vavuli kolola; kandi vakunika zing'anagani ziavo kunangwa vavuli kumanyiriza.

¹⁹ Mulombi wi vifananyi sianyala kwizuliza nukuganagana, anoho novogeri vwo kovora, “Ndasaamba kedonye chu musaala yigu. Ndaalomba mugadi nekedonye kindi kandi nisambira inyama ningilia. Ndaalomba kifananyi ku musaala gwatigala. Nguyu sigamira kisala chavazwa! Ekeveeye livihilirizwa!”

²⁰ Akombaa ligoke litaveeye kindu kuye. Zing'anagani zizie ziuvusiru zimugotizi ligali kali sianyala konyoora vokonyi kali hakuzu mba. Sianyala kuvugilira umwene ndi kifananyi cha agumiyi mu mukono gwigwe sikeveeye nyasaye mba.

Yahova aveeye mulombi kandi muhonyi

²¹ Yahova avoora, “Isiraeli, wizulizi makuva yaga; wizulizi ndi oveeye mutumikiri wange, Ndaakolomba ove mutumikiri wange, kandi sindakakwivilira mba.

²² Mali kweya vwoni vuvwo kuli lilesi. Wirane ku inzi, kigira mali kokohonyi.”

²³ Mwimbi nuvusangali, munyi ligulu! Muhanzuki munyi isi wi lirova! Muhanzuki nu vusangali, munyi vigulu O, munyi militu ni misaala josi ijiveeye mu, kigira Yahova umali kohonyia kisukururwi cha Yakobo; naye alakuminywa mu kivala cha Isiraeli.

²⁴ Yahova, muhonyi woovo, uwakolomba munda mwa mama woovo, “Inzi mbeeye Yahova walomba vindu viosi. Inzi nzieng'ine, ndaavambura ligulu; lwa ndalomba lirova, nivwaha wangonya?

²⁵ Inzi nzononyiaa vilolekizu via valaguli, kandi ngolaa vasigitiri kuva vasiru. Inzi suraa makuva ga vageri nokokola limanya liavo kuva uvusiru.

²⁶ Navuzwa lwu mutumikiri wange aporofetaa, kandi lwa nduma mutumwa wange kuvuula lilohiza liange, ngolaa ovolohizi yivwo novoporofeti yivwo kuva vwa giligali. Mbolera Jerusalemi ndi avandu valamenya yo kandi; kandi mbolera madaala manene gi Ivuyuda ndi galumbakwa vuhia kandi. Madaala manene yago gasingirizwa kutura mu mang'anye.

²⁷ Inzi ngaminyaa zinyanza ku likuva liu kulaga vuzwa.

²⁸ Mbolera Sairasi ‘Ni ivi uliamiiha avandu kulwa inzi; ulakakole aga nyenya okole. Ulakalage avandu kwumbakwa vuhia Jerusalemi, kandi misingi ji Litembeli kuvikwa.’ ”