Isaya 43 - KITABU KITAKATIFU

Nyasaye alaangaa kosoola avandu veve

¹ Yahova uwalomba munyi avoora, “Mutatia mba; kigira inzi ndamuhonyia. Inzi mali kumulanga ni lieta, na munyi muveeye avandu vange Isiraeli.

² Lwa muvitiraa mu mazi manene gululiva, inzi ndava harara nimunyi; nimuvitira mu migera ja mazi manene simuliiyina mba kali nimuvitira mu madinyu kuli muvitiraa mu migera minene simulaguutwa kuli avamazi gimigera giinaa. Lwa mugendaa kuvitira mu muliru simulahia mba; magerizu madinyu agamugwiraa sigalamusaliriza mba.

³ Kigira inzi mbeeye Yahova Nyasaye winyu, Nyasaye Umutakatifu wa Isiraeli ohonyiaa munyi. Ndahaana Egebeti eve kuli mutungu gwo kovoholora munyi. Ndahaana Ezopia na Seba mu vogono vwinyu.

⁴ Ndahaana zihiiri ziosi ku nduuki okumuhonyia, kigira munyi muveeye avuvuguli vudinyu ligali ku inzi kandi kigira nyanza munyi kandi muheezaa luyali.

⁵ Mutatia mba kigira inzi mbeeye harara nimunyi! “Ndaleta kisukururwi chienyu kutura Ivugwi kandi ndamuvungiza harara kutura Imadioli.

⁶ Ndavolera vandu va Ivaale, vatuli vazie! Kandi ndavolera Isavaalu, vataviigalira mba! Leki avandu vange viirane kutura muvivala vie ihale, kandi kutura mu vuli keheri chi lirova.

⁷ Vaveeye avandu vange, ndaavalomba vaduuki koleta uvukumi ku inzi.”

Isiraeli vaveeye avalolekizi va Yahova

⁸ Nyasaye avoora, Leeti avandu vange vaze mu kiyaalo. Vaveeye nizimoni, navuzwa sivalola mba. Vaveeye namatu, navuzwa sivahulira mba!

⁹ Leeti vandu vi zihiiri vaze mu kiyaalo. Ni uliha ku vanyasaye vaavo unyala kuvuula agaazaa kwekoleka? Ni uliha kuvo uwavuula vindu viekoleka kalunu? Leki avanyasaye yava valeete valoli vaavo kumanyia ndi vaveeye avalungi, kololekiza agiligali ga makuva gaavo.

¹⁰ “Avandu va Isiraeli, muveeye avaloli vange; ndaatovora munyi muve vatumikiri vange, kunangwa muduuki kumanya inzi kandi kusuuvira mu inzi; Kandi kumanyiriza ndi inzi nzieng'ine mbeeye Nyasaye. Sihaliraho nu munyasaye wundi nataveeye inzi nzieng'ine mba; sihaveeyeho kandi sihaveeyeho nanyasaye wundi kuvita inzi.

¹¹ “Inzi weng'ine mbeeye Yahova, ni inzi weng'ine unyala kohonyia munyi.

¹² Inzi ndaavura agazizaa kwekoleka, ma kandi ni nzizaa kumukoonya. Sihaveeyeho nu munyasaye mugeni wanyala kokora yaga mba; munyi muveeye avalolekizi vange.

¹³ Inzi mbeeye Nyasaye na ndakave ndio kazozo. Sihaveeyeho nu mundu kali mulala unyala kohona kutura ku zinguru ziange; siali ho numulala unyala kugirung'anyia icha inzi mali kokora.”

Kwiruka kutura Babiloni

¹⁴ Nyasaye Mutakatifu wa Isiraeli, Yahova ohonyia munyi, avoora, “Ndatuma liihi liange kulwaana Babiloni okohonyia munyi. Ndavunanyia virivwa via madaala manene, kandi ndagirung'anyia lihanzuka lia vandu valio kugwa lilira.

¹⁵ Inzi mbeeye Yahova, Nyasaye winyu Mutakatifu. Inzi ndalomba munyi, avandu va Isiraeli, kandi mbeeye mwami winyu.”

¹⁶ Ku ing'inga yakale Yahova yalomba inzira kuvitira mu inyanza, inzira kuvitira mu viguvuli vinene.

¹⁷ Yadiviza liihi linene liezingulu, liihi lia magare gu vulwani nizibarasi. Vaagwa hasi sivasingira kandi mba, nukuvasiminya kuli ludambi lwi itaya!

¹⁸ Navuzwa Yahova avoora: “Mutizuliza vindu vimali kuvita, kandi mutaganagani vindu via maziambiri mba.

¹⁹ Heenzi kindu kihia icha nziza kokora. Chekoleka kalunu, na munyi munyala kokelola kalunu! Ndalomba inzira mwigendanyama, nukusinukiza migera mu changalangwi.

²⁰ Kali zinyama ziumbulimu zilamba uluyali; ivivwi na mavudu vilanzizominya, lwa ngola migera kuvitira mu changalangwi ukuhaana mazi ku avandu vange vatovole.

²¹ Vaveeye avandu vandelombera umwene, kandi valimba lizominywa liange!”

Uvwoni vwa Isiraeli

²² Yahova avoora, “Navuzwa munyi avandu va Isiraeli mwaluhizwa ninzi; simwasigamira mba.

²³ Simwandetera vihaanwa vienyu viu kusambwa via magondi; simwamba uluyali nivisiuviliru vienyu mba. Sindamudwika misigo miliduhu ku limuniga mundeetere vihaanwa mba, anoho kumuluhiza ku limuteeva kimuli mba.

²⁴ Simwangulira vimuli anoho kunzigutiza ni zitinya zie zinyama zienyu mba. Mu vogono yivwo mwandwika misigo miliduhu nuvwoni vwinyu; mwanduhiza ligali nuvudamanu vwa mwakoraa.

²⁵ Inzi mbeeye Nyasaye usamiihaa vwoni vwinyu; kandi ngolaa yaga kigira ku lwa inzi mwene. Sindizuliza uvwoni vwinyu kandi mba.

²⁶ “Gendi kuzie mu kiyaalo; leeti makuva ginyu! Haani vivuni via makuva ginyu kumanyia ndi muveeye vulungi!

²⁷ Avaguuga vinyu vukutanga vaakora uvwoni, aviimiliri vinyu vaangolera uvwoni,

²⁸ avamihi vinyu vonogonyia hatakatifu hange. Kunangwa ndaadiviza avandu va Isiraeli. Ndaaleka avandu vange vanyegwe.”