Isaya 42 - KITABU KITAKATIFU

Mutumikiri wa Yahova

¹ Yahova avoora, “Uyu nu mutumikiri wange, wa inzi mali kuha zinguru, kandi wamali kotovola wu mwoyo gwange gusangaliraa. Mali kumukola mugulu, kandi mali kuviika muye Roho gwange; alareta likalaga lirungi mu zihiiri ziosi.

² Sialalira anoho alahanzuka, kandi sialamoloma vudinyu kuzinzira.

³ Sialavunanyia kidundu chavedeka mba, anoho sialavunanyia itaya yu ludambi imulamula mba. Alaleeta likalaga lirungi ku vandu vosi.

⁴ Sialakuza mwoyo mba, navuzwa alaleeta likalaga lirungi ku lirova. Avandu vamenyi mu visulu valindilira lilaga lilie.”

⁵ Nyasaye yalomba ligulu kandi nalivambula kuli lihema; kandi yalomba lirova kandi viosi vimenyi mulio. Yahaana mwika gwi livamwoyo ku vandu vosi avamenyi mu lirova. Kalunu Yahova Nyasaye avoora ku vatumikiri veve ndi,

⁶ “Inzi Yahova, mali kumulanga kandi mali kumuha uvunyali. Kolola ndi, likalaga liu vulungi likolangwa ku lirova. Ndalomba lilagana liange na ivi kulwa vandu vosi, kandi ndaleta uvulavu ku zihiiri ziosi.

⁷ Ulahonyia yavo avaveeye avavoku, kandi ndatuliza muvuhambe mu vogo kandi ndatuliza mujera yavo aviikalaa mu kisundi.

⁸ “Inzi mbeeye Yahova Nyasaye winyu, siaveeye ho numunyasaye wundi ohevwa vukumi vwange mba; anoho sindaleka vifananyi vinyoole lizominywa liange.

⁹ Vindu viandavula vimali kololeka kalunu kuva agiligali. Kalunu ndamuvolera vindu vigeni vizizaa kokoleka kali imbiri wa vikikiri kwekoleka.”

Lwimbu lwu kwizominya

¹⁰ Mwimbiri Yahova lwimbu luhia; avandu vosi, mwizominye Yahova, avandu vosi aveelemaa ku inyanza, mwizominye Yahova. Vilombe viosi viu munyanza, mwizominye Yahova, avandu vosi avamenyi mu visulu mwimbi nu kwizominya Yahova.

¹¹ Avandu vamenyi mu changarangwi, kandi avandu vamenyi mu madaala vizominye Nyasaye; avandu vamenyi mu madaala ga Kedari vamwizominye! Avandu vamenyi mu lidaala lia Sela vimbi ni vasaangala kutura kuzindongozi zie vigulu.

¹² Avandu vosi avamenyi mu visulu vimbi lwimbu lwu kwizominya kandi kuhaana uvukumi ku Yahova!

¹³ Yahova atulaa kuzia kulwaana kuli mulwaani aveeye nuvuha kandi yetegeki kulwaana. Aveeye ni lilira lie liihi, kandi lihanzuka liu vulwani; amanyia zinguru zizie ku vasigu veve.

Nyasaye Asuuvirizaa kokonya Avandu veve

¹⁴ Nyasaye avoora, “Ndakahiring'ana ku ing'inga indambi, si ndahaana amativuli ku avandu vange mba. Navuzwa kalunu ing'inga yekekolwa imali kuduuka; ndiraa vudinyu kuli mukali oveeye mu lilumwa liu kwivura umwana.

¹⁵ Ndononyia tugulu ni vigulu, kandi ndakora uvunyasi ni misaala kwuma. Ndagilung'anyia migera ju mumavoona kugwa changarangwi kandi ndakaminya amadavalia ga mazi.

¹⁶ “Ndimilira avandu vange avavoku, kandi ndavamanyia inzira ya vakikiri kolonda ku. Ndagirung'anyia kisundi chavo kugwa uvulavu, kandi ndalungikiza kivala keveeye chamajichi kuva kilahi imbiri wavo. Yili nilio lisuuvirizwa liange ku vandu vange, kandi sindavaleka mba.

¹⁷ Yavo vosi avasuuviraa mu vifananyi, avalanga, vifananyi muveeye avanyasaye viitu, valakolwa kuva mu zisoni ligali.”

Avandu va Isiraeli Vavura Kwiga

¹⁸ Yahova avoora, “Muhuliri munyi avandu vaahana amatu! Kandi muhenze ligali munyi avandu vaveeye avavoku!

¹⁹ Aveeye ho mundu oveeye muvoku kuvita mutumikiri wange? Anoho aveeye ho mundu uvula kuhulira kuli mutumwa wange?

²⁰ O, munyi avandu va Isiraeli, muveeye ni zimoni kolola, navuzwa simulolaa mba. Muveeye na amatu kuhulira, navuzwa simuhuliraa mba.”

²¹ Yahova aveeye Nyasaye uveeye nu vuha kohonyia, kunangwa malago geege gizominywe kandi amigizu geege, kandi yenya avandu veve vahane luyali kuye.

²² Navuzwa kalunu avandu va Nyasaye vamali kulanywa, vamali kotegwa nu kugumirwa kandi vavikiywi mu vuhambe, Siyaali ho nu mundu kali mulala uwaali anyala kuvahonyia mba, anoho kwilanyia ivilanye viavo mba.

²³ Nivwaha ku munyi unyala kuhulira yaga? Kutura kalunu, mulahuliriza nukwiiga ni limanyiriza?

²⁴ Nivwaha wahaana avandu va Isiraeli ku valanyi? Yaali Yahova mwene, wa kunyi kumali kokora uvwoni kuye! Sikwaali kunyala komenya kuli yenya komenye mba, anoho kuhulira amigizu ga yakuha mba.

²⁵ Kunangwa Yahova yakokola ni kuhulira uvulitu vwu vutima vwivwe kandi nikusalirizwa mu vulwani. Uvutima vwa Yahova vwasamba avandu va Isiraeli kuli muliru. Navuzwa sikwamanya kindu chekoleka mba; kandi sikwayiga kindu kali hakuzu mba.