Isaya 41 - KITABU KITAKATIFU

Nyasaye Yasuuviriza Avandu va Isiraeli

¹ Nyasaye avooreraa avandu va Isiraeli ndi, “Munyi avandu vamenyi ahimbi ni inyanza, muchiring'ane kandi mumbulirizi! Mwetegeke kuhaana amakuva ginyu mu kiyaalo; mulava nu vwiyangu vwinyu komoloma. Kwisundi harara kumanye nivwaha oveeye mulungi.

² “Nivwaha waleeta Sairasi kutura Ivugwi, kandi namukora muguuti vuli havundu hoosi ha yaazizaa? Nivwaha wamuha liguuta ku avami kandi ku zihiiri? Kivavi chiche kilavatozera hasi kuli vaveeye luguchi. Mivano jije ju vuta jilavasalanyia kuli vunyasi vwumu vuhuzwa nimbuuza.

³ Avalondelereraa vwangu ligali kandi agendaa mu mirembe, kunangwa virenge vivie sivinyala kudiira hasi mba!

⁴ Nivwaha wakola yaga gekoleke. Nivwaha usingiliraa amakuva ga vandu vakale? Ni inzi Yahova, ndaali ho mu litanga, kandi ndakaveho mu limalirika.

⁵ “Avandu vamenyi ihale vamali kolola aga inzi ndaakola, vaveeye nu vuti kandi ni lidegera linene. Kunangwa vosi visunda ahimbi nu kuvugana harara.

⁶ Vuli mundu akoonyaa wache, kandi avooreraa amwavo weve, ‘Ove muluviliri!’

⁷ Umuvazi adinyirizaa umutuli wi izahabu okoli vulahi kandi mundu uduyaa kifananyi ni inyundu nu kukinihiza, adinyirizaa umundu uduyaa ni inyundu nu kuhambanyia ni misumari harara, vavoola, ‘Lisamba yili liveeye lilahi.’

⁸ “Navuzwa munyi avandu va Isiraeli muveeye avatumikiri vange, muveeye avandu vandaatovola, visukululwi via Aburahamu mulina wange.

⁹ Ndaamulanga kutura mu zikona zie lirova lie ihale ligali, kandi nimuleeta kutura ku keheri chi lirova, na ndamuvolera, ‘Munyi muveeye avatumikiri vange.’ Inzi si ndamusuura mba, navuzwa ndaamutovora.

¹⁰ Mutatia mba, kigira inzi mbeeye harara ni munyi! Mutahendi mioyo mba, kigira inzi mbeeye Nyasaye winyu. Ndamukora kuva avagulu, kandi ndamukonya; Ndamusoola kandi ndamuhonyia.

¹¹ “Yavo avamudunyira, valaduuka mu zisoni ziukuguutwa; yavo avahing'anaa nimunyi valava kindu vuzwa kandi valadiva.

¹² Mulenyeleriza yavo avaveeye vasigu vinyu, navuzwa si mulavanyoola mba; yavo avamulwaanaa, valava kuli kindu vuzwa.

¹³ Kigira Inzi Yahova Nyasaye winyu; ndaamuha zinguru, kandi ndamuvolera, ‘Mutatia mba; ndamukonya!’ ”

¹⁴ Yahova avoora, “Munyi muveeye avakeekeke kandi avadedekere avandu va, Isiraeli mutatia mba, inzi ndamukonya Inzi, Nyasaye Mutakatifu wa Isiraeli. Inzi mbeeye muhonyi winyu.

¹⁵ Ndamukora muve kuli kiju chu kuhuuliraku uvuswage, ekeveeye na miinu mahia kandi amuugi. Mulahuura vigulu nukuvidiviza, kandi muladuvuranyia tugulu kugwa kuli mukuzi.

¹⁶ Mulavwilura nimbuuza ilatulizamu mukuzi, kandi ilasalanyia mukuzi zana yigwo. Maku mulasangala kigira mulizominya inzi Yahova winyu, inzi Nyasaye Mutakatifu wa avandu va Isiraeli.

¹⁷ “Lwa avandu vange avadaka kandi avadambi vaveeye ni lienya amazi kigira uvuluhu, Inzi Yahova ndahaana amativuli ku lisaala liavo. Inzi Nyasaye wa vandu va Isiraeli sindavaleka mba.

¹⁸ Ndakakole migera ja mazi kwituruka ku vigulu viumu viosi, kandi visenukiru via mazi kwituruka hagati ha mavoona. Ndakagilunganyie changarangwi kugwa madavalia ga amazi, kandi ndagilung'anyia vivala viumu kugwa visinukiru via amazi.

¹⁹ Ndakakole misaala ji midaragwa, vikuma, amavono kandi mizeituni kumera mu changarangwi. Militu ji misaala ji miberozi, mivinje kandi misunobari kuviruka mu changarangwi.

²⁰ Avandu valakalole yaga kandi valakamanye ndi Inzi, Yahova, mali kokora yaga. Valakamanye ndi, Nyasaye Mutakatifu, wa Isiraeli okoli yaga kokoleka.”

Yahova ahingiraa avanyasaye vuvugadi

²¹ Yahova, mwami wa avandu va Isiraeli avoora ndi; “Munyi avanyasaye vi zihiiri, muvoore amakuva ginyu. Kandi muhaane vivuni vilahi via makuva ginyu.

²² Hambi hano muvuuli kindu kilakekoleke mu madiku gaaza, kunangwa kuduuki kukimanyiliza lwakiliekoleka. Mwivaale imbiri wi kiyaalo vindu viekoleka mu madiku gaavita, kandi mukovolere livoora liago.

²³ Muvoore vindu vilakekoleke mu madiku gaaza, kunangwa kuduuki kumanyiriza ndi, muveeye avanyasaye! Mukore kindu kilahi anoho muleete kivi; kunangwa kuduuki kuva ni ligenya kandi nu vuti ligali!

²⁴ Munyi simuveeye kindu mba, kandi viosi via mukoraa viveeye vuzwa. Vosi avamusigamiraa vaveeye vu kuvihiliriza.

²⁵ “Inzi mali kotovola muguuti omenya vugwi. Ndamuleta aduuki kumwingilira kutura Ivaale. Alasenagira avamihi hasi kuli vaveeye amadohi, kandi kuli umulongi aduvagaa lidohi.

²⁶ Nivwaha ku munyi uwavuula ndi yaga galakekoleke, kunangwa kuduuki kovora ndi, avooye agiligali? Siaveeye ho kali mulala wahulira kindu kali kilala, anoho wavoola likuva kali lilala ku kindu yiki mba.

²⁷ Inzi Yahova ndaali wukutanga kovoolera avandu va Ziyoni amakuva malahi, ndaatuma umutumwa Jerusalemi kovoolera, ‘avandu vinyu vazaa!’ Vaza yengo!

²⁸ Lwa ndahenzeriza mu avanyasaye yava, siyaali ho kali mulala uwaali unyala kovora kindu mba; Siyaali ho kali mulala uwaali anyala kuhaana amativuli ku mateeva gange mba.

²⁹ Avanyasaye yava vosi sivaveeye kindu kali hakuzu, vaveeye avadedekere kandi sivaveeye nu vunyali mba, sivanyala kokora kindu kali kilala mba.”