Isaya 4 - KITABU KITAKATIFU

¹ Ing'inga yeyo lwaliduuka, avakali saba valagumira musaza mulala nokovoora, “Kunyi kulilihiza aveene, kandi kuliviika aveene, navuzwa yaanza oleke kovoole ivi oveeye musaza wiitu, kunangwa kuvuli kuva mu zisoni ziu kuvula kuva na avasaza.”

Jerusalemi yumbakwa vuhia

² Ing'inga yiza lwa Yahova alakakole vuli kitagwa kandi umusaala mu kivala kuviruka ligali nukuva umulahi. Avandu vosi va Isiraeli, avatigara, valalia nu kusangalira amakuyu malahi gi lirova.

³ Vuli mundu woosi watigala mu Jerusalemi, awa Nyasaye yatovola amenye, alalaangwa mutakatifu.

⁴ Yahova mu zinguru zizie, alakalagira kandi alatakasa ihiiri nukusamiiha mahiolo ga vandu va Jerusalemi kandi amasahi gataaza mu Jerusalemi.

⁵ Maku Yahova alakunika kiguru cha Ziyoni harara na vandu vosi avavugani mucho ni lilesi mu ing'inga yu muvasu, kandi umwochi ni ling'ereng'ana liolomemo vilavaho mu ing'inga yu vudiku. Vukumi vwa Nyasaye vulakunika nu kosoola lidaala linene liosi.

⁶ Vukumi vwivwe vulaleta chiriri ing'inga yu muvasu mululu gwi lidiku, kandi halava havundu hu kwilukira ing'inga yi imbura kandi yi chihi.