Isaya 39 - KITABU KITAKATIFU

Avatumwa kutura Babiloni

¹ Ing'inga yene yeyo, lwu mwami wa Babiloni, Merodaki Baladani, mwana wa Baladani yahulira ndi mwami Hezekia yahoona kutura mu vulwaye vwivwe, yang'oda ibarwa harara ni kihanwa natuma avatumwa veve kuhilila mwami Hezekia.

² Hezekia yagenihiza avatumwa yavo nuvusangali, kandi navamanyia miandu jije, ivindu vivie viuvuguli vudinyu: ifeza, izahabu, vindu vifunya mwayu, amaguta guvuguli vudinyu, kandi viugi vivie viosi viuvulwani. Si haali ho ni kindu kali kilala mu mavikiru geege goosi anoho munyumba yeye yu vwami chayavula kuvamanyia mba.

³ Maku muporofeti Isaya yazia ku Mwami Hezekia namuteeva, “Avandu yava vatuli haliha, kandi vakovoleye kindiki?” Mwami Hezekia yativura, “Vazi kutura Babiloni, kivala chi ihale ligali.”

⁴ Muporofeti Isaya yateeva, “Avandu yava valoli kindiki munyumba yu vwami?” Mwami Hezekia yativura, “Valoli vindu viosi mu mavikiru gange goosi, kandi munyumba yange yu vwami sikeveeye ho ni kindu kali kilala mu mavikiru ichambuli kuvamanyia mba.”

⁵ Maku muporofeti Isaya yavolera mwami Hezekia, “Yahova Wuvunyali avoora,

⁶ Ing'inga yiza lwivindu viosi munyumba yooyo yu vwami, kandi ivindu viosi via avaguuga vovo vaviika mu mavikiru kuduuka ing'inga yiyi, viosi vilavugulwa nu kuhilwa mu Babiloni. Sikeveeye ho ni kindu kali kilala kilakatigale mba.

⁷ Valala ku avana vovo valavugulwa nu kuhilwa ihale kandi valakolwa kuva viziri viu kutumika munyumba yu mwami wa Babiloni.”

⁸ Mwami Hezekia yavolera Muporofeti Isaya ndi, “Likuva lia Yahova amali kovora liveeye lilahi!” Kunangwa, mwami Hezekia yamanya ndi, mirembe kandi likingwa vilavaho ing'inga ya akikiri mwoyo.