Isaya 38 - KITABU KITAKATIFU

Vulwaye kandi lihona liu mwami Hezekia

¹ Ing'inga yene yeyo, mwami Hezekia yaali mulwaye kali kuduuka ahimbi ku likuza. Muporofeti Isaya mwana wa Amozi yazia kumulora, kandi namuvolera, “Yahova avoora, ulungikize vindu viosi kigira siulahona mba, navuzwa ulakuza.”

² Maku mwami Hezekia yagirung'ana nahenza ku lidigi ma nasaara navoora,

³ “O, Yahova, unzizurize kigira inzi mali kukutumikira nu vusuuvirifu vwosi, kandi mali kokora agaveeye amalahi imbiri woovo nu mwoyo gwange gwosi kazozo.” Mwami Hezekia yalira vululu.

⁴ Maku Yahova yalaga Muporofeti Isaya

⁵ kwirana ku Hezekia kumuvolera ndi, “Inzi Yahova, Nyasaye wa guuga woovo Daudi, mali kuhulira lisaala liilio kandi mali kolola maliga googo; ndakomeeda mihiga 15 mu limenya liilio.

⁶ Ndakosoora harara ni lidaala linene lia Jerusalemi kutura ku mwami wi kivala cha Asiria kandi ndazizagilira kukinga lidaala linene yili.”

²¹ Muporofeti Isaya yavolera mwami Hezekia avugule amakuyu gaduvuliywi aviiki ku mavimba na aduuki kohona.

²² Maku mwami Hezekia yateeva, “Ni kelolekizu ki kimanyia ndi inzi ndazia kusigamira Yahova mu Litembeli?”

⁷ Isaya yativura navoora, “Yahova alakuha kelolekizu kukumanyia ndi aladuukiza lisuuvizwa lilie ku ivi.

⁸ Yahova alakola chiriri kwirana inyima ivika 10, kungasi yalombwa nu mwami Ahazi.” Hene yaho, chiriri chirana inyima vika 10.

Lwimbu lwi Lizominya lwu Mwami Hezekia

⁹ Inyima wu mwami Hezekia yaali ni yakahona kutura mu vulwaye vwivwe, yang'oda lwimbu lwi lizominya yilu:

¹⁰ Ndaganagana ndi ndakuza nimbeeye hagati hi mihiga jie limenya liange, nukuzia mu kivala cha vakuzu na mburi komenya kandi.

¹¹ Ndaganagana ndi, inzi si ndalora Yahova kandi mba, anoho si ndalora ku kandi mundu woosi omenya mu kivala yiki.

¹² Livamwoyo liange lituliziywi ho kandi liduuki ku keheri, kuli lihema liu mwayi lisambuliywi, kandi kuli luvusi lwu munavi lukalika kutura kukinaviru. Mbasu nuvudiku, ndaganagana ndi ivi umali kuundukiza ku keheri che livamwoyo liange.

¹³ Ndaalira vudiku vwosi ni lizuunwa, kuli isimba ivunanyiaa, vigumba viange, ndaganangana ndi Nyasaye umali koheriza livamwoyo lianga.

¹⁴ Mwoyo gwange gwaali mudedekere, kandi ndasioma kuli likuulu. Zimoni ziange zialuha kigira kohenza mwigulu, O, Yahova, osoore kutura mu vudinyu yivu vwosi.

¹⁵ Yahova umali kokora yaga, na inzi nyara kovora ki? Mwoyo gwange goveeye muliduhu, kandi sinyala kogona mba.

¹⁶ O, Yahova makuva nivikolwa vivio vihaana livamwoyo ku vuli mundu; kandi mwoyo gwange gonyoolaa livamwoyo mugo. Wanzilanyila livamwoyo liange, noleka ni menya.

¹⁷ Vuliduhu vwu mwoyo gwange vulagilung'ana kuva mirembe, ombonyi kutura mu vuhimwa vwange vwosi; kandi usamihi uvwoni vwange vwosi.

¹⁸ Siaveeye ho mundu kali mulala mu kivala cha vakuzu unyala kwizominya ivi mba; avakuzu sivanyala kusuuvira mu vusuuvirifu vuvwo mba.

¹⁹ Navuzwa avandu vaveeye mwoyo nivo vizominyaa ivi, kuli inzi nzizominya ivi kalunu. Aviivuli vavoolera avana vaavo kuli ivi oveeye musuuvirifu.

²⁰ Yahova, alakambonyie. Kigira yaga kulakakubi vukana kandi kulakimbi zinyimbu ziukwizominya ivi, kulimba nu kwizominya ivi mu Litembeli liilio mu madiku gi livamwoyo lietu liosi.