Isaya 36 - KITABU KITAKATIFU

Avandu va Asiria vatihizaa Jerusalemi

¹ Mu muhiga gwa 14 gwi liamiiha lia Hezekia mwami wi Ivuyuda, Senakeribu, mwami wa Asiria, yingilira madaala manene gi zimbiga gi Ivuyuda kandi nagagumira goosi.

² Maku yalaga Rabishake, mwimiliri wa vatumikiri veve, atuli Lakishi azie Jerusalemi ni liihi linene lia vasikari nokoteeva mwami Hezekia yiyame ndi ugutiywi. Mwimiliri wa vatumikiri oyo yasingira kunzira aha valombi vizinguvu vayinzilira, ahimbi nakagera kaletaa amazi kutura mu lidavalia lieluhia.

³ Avayuda vavaga vatura kuzia kumwaganira: Mutumikiri wasingilira inyumba yu vwami, Eliakimu muyaayi wa Hilikia; mung'odi wekoti Shebina, kandi Joya muyayi wa Asafu, mutumikiri wasingilira agang'odwa.

⁴ Maku Rabishake, mwimiliri wa vatumikiri va Asiria yavavolera, “Voleli Hezekia ndi, mwami munene wa Asiria amuteeva, vuluviliri vwivwe vwidiira kuliha?

⁵ Uganaganaa makuva amere ganyala kuvugura vwiyangu vwo vogeri kandi zinguru ziuvulwani? Nivwaha wa uganaganaa alakokoonya ukwiibaala ku vandu va Asiria?

⁶ Uganaganaa vandu va Egebeti valaza kukokonya, navuzwa yaga galava kuli utumikira kidundu chavunika kuva imbimbu yokogendela, kilavunika kandi kilatooza mukono gugwo. Nindio mwami wa Egebeti aveeye ku uyu woosi usuviraa muye ovokonyi.

⁷ Navuzwa kali niiva mulambolera, ‘Lisuuvira lietu liveeye mu Yahova, Nyasaye wiitu,’ siaveeye Nyasaye mulala mwere wa Hezekia yononyia uvwali vwivwe na hatakatifu hehe kandi navolera avandu vi Ivuyuda na Jerusalemi ndi kuduuka vasigamiri Yahova vuzwa ha vwali vulala vweng'ine?

⁸ Kunangwa kalunu, mulombe livugilirizana munene wange, mwami wa Asiria. Ndamuha zibarasi zielefu ziviri niiva mulanyola avasaza vaduuka livaliza yilio vanini kuzio nukuzihira.

⁹ Munyala ndi kweleng'anyia nu mutumikiri oveeye nidalaja ya hasi ligali mu vutumiki vwa Asiria, lwa munyi aveene muganaganaa umwami wa Egebeti amuletere magare gu vulwani, na vasaza vi zibarasi?

¹⁰ Muganaganaa ndali kwingilira kivala chienyu nukukidiviza vugira Yahova kongonya? Yahova mwene yambolera nduuki kuchingilira nukudiviza.”

¹¹ Maku, Eliakimu, Shebina na Joya vaavoolera Rabishake, “Mwaza, yaanza omolome ni kunyi avatumikiri vovo mu lulimi lwa Aramaiki kigira kunyi kwalumanya. Utamoloma nikunyi mu lulimi lwu Luheburaina; avandu vosi vaveeye ku lidigi nivahulira mba.”

¹² Navuzwa Rabishake yativura, “Muganaganaa ni munyi numwami winyu veng'ine avu mwami wange andumi ku muvooleraa ivindu yivi? Awa, molomaa kandi ku avandu yavo vosi aviikaye ku lidigi, avazizaa kulia amavi gaavo nukunwa amiinyali gaavo, kuli munyi muzizaa kokora!”

¹³ Maku Rabishake yasingira nahanzuka nu mwoyo munene mu Luheburaina navoora, “Huliri agu mwami wa Asiria amuvoleraa.

¹⁴ Amwiganihizaa muvuli koleka Hezekia amugaade. Hezekia sianyala kumuhonyia mba.

¹⁵ Kandi mutaleki amugoonye musuuviri mu Yahova mba. Mutaganagani ndi Yahova alakamuhonyie, kandi Alakigaliri liihi lietu lia Asiria livuli kugumira lidaala linene lienyu mba.

¹⁶ Mutahulirizi aga Hezekia avoora mba! Mwami munene wa Asiria alaangaa munyi muturi ichova wi lidaala linene na mwihaane aveene kuye mwosi. Mulavugilirwa kulia mazabibu kutura ku vizabibu vienyu aveene na makuyu kutura ku misaala jienyu jene, kandi munwi amazi kutura mu vidaho vienyu -

¹⁷ kuduuka lwu mwami munene mwene amwidikiriza mu kivala keveeye kuli chienyu, uwi vizabibu viveeye yo viokuhaana iwaini, kandi uwi ingano eveeye yo kolomba migadi.

¹⁸ Mutaleki Hezekia amusiruharize muduuki kuganagana ndi Yahova alamusoola. Umunyasaye wi zihiiri zindi ziosi yahonyia ku vivala viavo kutura ku mwami munene wa Asiria?

¹⁹ Vaveeye haliha kalunu avanyasaye va Hamazi na Aripadi? Avanyasaye va Sefarivaimu vaveeye haliha? Aveeye ho nu mulala uwahonyia Samaria?

²⁰ Ni ng'inga ki ya vanyasaye vi vivala yivi viosi vahonyia ku vivala viavo kutura ku mwami wiitu? Kunangwa ni ki kekolanga munyi kuganagana ndi Yahova anyala kohonyia Jerusalemi?”

²¹ Navuzwa avandu vakiring'ana makiriri vuzwa, kandi sivamutivulira likuva kali lilala mba, kuli mwami Hezekia yaviganihiza.

²² Maku Eliakimu, Shebina, na Joya vatandula zinguvu ziavo mu vovereri vonene kandi ni vazia kovoolera Hezekia icha Rabishake mutumikiri wu mwami wa Asiria yaali navooye.