Isaya 35 - KITABU KITAKATIFU

Inzira yu Vutakatifu

¹ Changarangwi kandi kivala chumu vilasaangala, kandi vimuli vilalaviza mwigendanyama.

² Changarangwi kilimba nu kusangara; kilava kilahi kuli vigulu via Lebanoni, kandi kilava kigunamu kuli milimi ji vigulu via Karimeli na Sharoni. Vuli mundu alalola vukumi vwa Yahova, kandi alole zinguru novonene vwivwe.

³ Haana zinguru kumakono galuhi kandi ku amalu gadegeraa kigira vodedekere.

⁴ Muvoolere vuli mundu woosi utaveeye ni lilema mwoyo ndi, “Muve nizinguru kandi mutava avati mba! Nyasaye alaza kumusoola, kandi alahaana amageri ku vasigu vinyu.”

⁵ Avavoku valalola, kandi wahana matu alahulira.

⁶ Mundu mulema alatumatuma kuli kisusu, kandi yavo avaveeye zidimbidi, zinimi ziavo zilimba nukusangara. Amazi galasinuka mwigendanyama, kandi togera twa mazi tulituruka kuvitira mu changarangwi.

⁷ Muyeke muhiu gulava kuli lidavalia kandi lirova liumu lilava visenukiru via mazi. Havundu hi vivwi vimenya, vunyasi harara ni lifunzu vilamera ho.

⁸ Halakaveho ninzira enene ilangwa, “Inzira yu Vutakatifu.” Umundu mwoni sialakagende kunzira yeyo mba; kandi mundu musiru sialimilira avandu valonda kunzira yeyo nu kuvagotiza mba.

⁹ Zisimba si zilakave havundu yaho mba; zinyama zinduru si zilavitira kunzira yeyo mba. Yavo ava Yahova yasoola, nivo avaligenda kunzira yeyo nukuzia yengo.

¹⁰ Valaduuka mu Jerusalemi nu vuyanzi, ni vimba nivakuba isango yu vusangali. Valava nu vuyanzi kandi nuvusangali mihiga ni mihiga, kandi sivalava ni liverera kandi nilihenda mwoyo mba.