Isaya 34 - KITABU KITAKATIFU

Nyasaye alahaana amageri ku vasigu veve

¹ O, munyi avandu vi zihiiri ziosi, mwisunde ahimbi muhuliri! Munyi avandu vi lirova liosi, kandi ni viosi vimenyi mulio, mwisundi ahimbi muhuliri.

² Yahova aveeye nu vutima ni zihiiri ziosi harara na mahi gaavo goosi. Umali kuvakalagira likuza.

³ Miviri jaavo mikuzu jilasuvwa na si jirayavilwa mba, jiraguunda, kandi jirafunya vugundu ligali. Vigulu vilava viakanyu na masahi.

⁴ Liuva, mweli, ni zing'ereng'ani zilavunguluka hasi ku lirova. Ligulu liliringa kuli likaratasi liringangwa, kandi zing'ereng'ani zilagwa hasi kuli amatu ga makuyu anoho misaala ja makuyu.

⁵ Yahova umali kwetegekiza kivavi chiche mu ligulu, na kalunu keveeye ahimbi kotema avandu vi kivala cha Edomu, ava Yahova amali kukalagira lidivizwa.

⁶ Kivavi chiche kilakave na masahi nizitinya, kuli amasahi ga magondi nizimbuli zie visiuviliru. Yahova alahaana kisiuviriru yiki mu lidaala linene lia Bozira. Alakole liitwa yili kuva linene mukivala cha Edomu.

⁷ Avandu valakagwi hasi kuli zigiriki ziu muvulimu nizigiriki zisoleri, kivala kilakakunikwi na masahi kandi nizitinya gazio.

⁸ Yiyi niyio ing'inga lwa Yahova alakahonyie avandu va Ziyoni nu kuvanza kisaalia ku vasigu veve.

⁹ Migera ja Edomu jiragirung'anywa kuva ilamu na amalova galagirung'anywa kuva kibiriti. Kivala choosi kilasambwa kuli ilamu.

¹⁰ Kivala kilasambwa mbasu nu vudiku, kandi mwochi gulavuuya mucho mihiga ni mihiga. Kivala kilatigala hazwa kutura ku likula yili kuduuka ku likula lindi, kandi si halavaho nu mundu kali mulala ulivitira hagati hacho kandi mba.

¹¹ Navuzwa amave, amakuure, amajikoro, vilungu kandi zinyama zindi zio muvulimu zilamenya mu kivala yiki. Yahova alakekola kuva chere kuli chaali mulitanga.

¹² Mwami sialivaho uliamiiha kivala yiki mba, kandi aviimiliri vacho vosi si valavaho mba.

¹³ Amafwa ni zindavati na matagalo zilamera mu zinyumba ziavo ziosi ziu vwami, nukumadigi gamadaala, kandi maudo ni vivwi vilakamenye mu.

¹⁴ Zinyama ziu mumulitu zilavoyavoya havundu yaho, kandi amademoni galalanganila ho. Gunani ogonenene gwa vudiku gulaaza havundu yaho kwenya hagunyala kososera.

¹⁵ Amakuure galalomba zinyumba ziago, kandi galatera amavuyu nu kwalula viminyu kandi galavivirukizira yo. Zisoti zilavuganilayo, inyavuli nidaywa.

¹⁶ Mwenyelerizi mu kitabu cha Yahova ma musome icha kevoolaa. Virombe viosi viang'odwa mu kitabu yiki, kikali ni kisaza. Yahova umali kulaga yaga gave ndio; oyo mwene alavungiza virombe viosi harara.

¹⁷ Ni Yahova mwene uligavula kivala hagati ha vandu veve, kandi vuli mundu alakanyoole kedonye chiche. Valakamenya mu kivala yiki kutura ku likula kuduuka kulikula lindi na kilakave chavo mihiga ni mihiga.