Isaya 33 - KITABU KITAKATIFU

Lisaala Kigira Ovokonyi

¹ Kivi keveeye kumunyi avadiviza, na munyi aveene mukikiri kudivizwa; munyi avagaadi vu mundu akikiri kumugadaa. Lwa mumala kolekera kudiviza mulakadivizwi kandi lwa muduuka ku keheri chu vugadi, munyi kandi mulakagadwi.

² Yahova, okovererere. Kunyi kumali kuviika lisuuvirizwa lietu mu ivi. Ukukingi vuli lidiku na okohonyie ing'inga yuvudinyu.

³ Lwukulwaniraa, izihiiri ziilukaa kutura ku liyoga liuvulwani.

⁴ Kunyi kwingiliraa avasigu viitu kuli kekoonya chi zisigi; kunyi kuvuguraa ivindu viavo viosi.

⁵ Yahova aveeye munene ligali! Yamiha vuli kindu. Alahana ku Jerusalemi likalaga lirungi kandi nuvulungi

⁶ na alahaana mirembe ku ihiiri. Yahova akingaa avandu veve kazozo, kandi avaheezaa ovogeri ni limanya. Livikiru liavo linene kuvita liveeye liitia Yahova.

⁷ Valuviliri vanira ovokonyi. Avatumwa avagerizaa koleta mirembe valilaa nu vuzunu ligali.

⁸ Zimbarabara ziveeye nuvuhimwa ligali kali sihaveeye ho nogendanga kuzio mba. Vuhambani hagati hi vivala vutuliziywi ho, kandi livugilirizana liononywi. Siaveeye ho numulala ohevwa luyali mba.

⁹ Kivala keveeye king'anye kandi icheele. Militu ja Lebanoni jiniaye, Livona ligunamu lia Sharoni ligwi kuli ichangalangwe, kandi amatu gahalulukaa kutura ku misaala mu kivala cha Bashani kandi ku kiguru cha Karimeli.

Yahova yiganihiza Avasigu veve

¹⁰ Yahova avoora ku zihiiri; “Kalunu ndasingira! Kalunu ndiiginga igulu inzi mwene! Kalunu ndakuminywa.

¹¹ Munyi mulomba lilohiza litanyala kokoonya kindu kandi vindu viosi via mukoraa viveeye via vuzwa. Mwika gwange goveeye kuli muliru ugwaza gumudivizi.

¹² Mulavunguluka kuli magina gasambwa kolomba ichoka, kandi kuli amafa gaatemwa nukusambwa kugwa ligoke.

¹³ Vuli mundu oveeye ihale nahimbi ahuliri icha inzi Yahova mali kokora na avugiliri zinguru ziange.”

¹⁴ Avandu vuvwoni mu Ziyoni vadegera nuvuti vonene. Vavoola, “Likalaga lia Nyasaye liveeye kuli muliru gusambaa mihiga ni mihiga. Nivwaha ku kunyi unyala kohonokoka lomemo lusambaa kuli yilu?”

¹⁵ Unyala kohononoka niiva ulakola agaveeye amalungi. Utatumikira zinguru zizio kugaada avadaka mba, kandi utavugilira viambeti mba. Utahambana nayavo avalohizaa kwiita anoho kokora uvudamanu vundi vwosi mba.

¹⁶ Maku ulava ni mirembe ivi ulava mulilinda kuli umundu oveeye mu zimbinga zie zinguru. Ulava ni viukulia kandi amazi gukunwa.

Zing'inga ziuvukumi zizaa

¹⁷ Mulalora kandi mwami niyamiha mu vukumi vwivwe ku kivala kivambukaa kuduuka ihale mu zimbega ziosi.

¹⁸ Uvuti vuvwo vwakale vwa vasololi vuvusuuru kandi vwa avatunyirizi vulava chukwizuliza mu zing'anagani.

¹⁹ Simulalola avageni vikirage, avamolomaa lulimi lwa mutanyala kumanya mba.

²⁰ Heenzi ku Ziyoni, lidaala linene ha kolombera masavo giitu agidiini. Heenzi ku Jerusalemi! Lidaala linene lio komenya mu, ni mirembe! Lilava kuli lihema ilitanyala kusundwa kali hakuzu, ilie vivambo vialio vitanyala kwifwa, kandi lie migoye jalio jinyala kukalika.

²¹ Yahova alakakumanyia kunyi uvukumi vwivwe. Kulamenya ahimbi ni migera migalamu kandi notogera, navuzwa zimeri ziu vulwani sizileelema kujo mba.

²² Kigira Yahova aveeye mukalagi wiitu; alakakohonyie.

²³ Ivi Ziyoni, migoye jijo gidengeyi, sijinyala kovoha inguvu yiliato ku mulage gwalio mba, kandi sivanyala kovoholora inguvu yi liato mba. Navuzwa vinyingi vilagavulanywa; kali avalema valavugula kidieli chavo chi viranye.

²⁴ Sihalavaho nu mulala omenya mu kivala chietu uwaza yigaane ndi alwalaa kandi uvwoni vwosi vulasaamiifa.