Isaya 32 - KITABU KITAKATIFU

Umwami Mulungi

¹ Lidiku lilala alakaveho Mwami uliamiihi ni likalaga lirungi, kandi aviimiliri vizihiiri valakimiliri nu vulungi.

² Vuli mulala kuvo alakave kuli chukwikinga kutura kumbuuza kandi havundu hu kwivisa kutura kumbula yikiihi. Valakave kuli migera ja mazi jiturukaa kutura mu changarangwi, kandi kuli chiriri chu lwanda lonene mu kivala kitaveeye ni liama.

³ Zimoni ziavo zilarora, kandi amatu gaavo galahulira yava avaveeye nu vudinyu.

⁴ Valava ni liekuzira, navuzwa valakola ni limanyiriza, kandi valavoora agaveenya.

⁵ Vandu vasiru si valaganaganwa kuva vu luyali mba, anoho mundu mudamanu sialavoorwa kuva musuvirifu mba.

⁶ Mundu musiru alavoora uvusiru, kandi aganagana kokora vindu vidamanu. Goosi agakolaa kandi agaavoola gaveeye gu kuvihiliriza ku Yahova, kandi si ahaanaa viukulia ku avaveeye ninzara anoho siahaanaa ku avaveeye nu vuluhu kindu chu kunwa mba.

⁷ Mundu muyingu aveeye mudamanu kandi akolaa vindu vidamanu. Alohizaa mu vwivisu aduuki kudiviza avadaka na amakuva gu vugadi, kandi ahingiraa vadaka vavuli konyoora uvulungi vwavo.

⁸ Navuzwa mundu wuluyali akolaa vindu nu vusuuvirifu, kandi aveeye muduukiru mu vindu viu vulungi.

Lihaana mageri ku vakali va Jerusalemi

⁹ O, munyi avakali vaveeye ni limenya liovwelemelizi, avataveeye ni lihenda mwoyo, muhulirize amakuva gambolaa.

¹⁰ Munyala kwiguta kalunu, navuzwa ing'inga kuli yiyi muhiga guzaa mulakave mu kivi kigira simulakave ni liagula lia mazabibu mba.

¹¹ Munyi mwamenyangi mulielemeliza, litaveeye ni lihenda mwoyo, navuzwa kalunu, mudegere nu uvuti! Mutulizi zinguvu zienyu, kandi mwevohe zinguvu ziamagunia mu vikenge vienyu.

¹² Muduyi ku vilitu vienyu mu liverera kigira milimi jinyu migunamu kandi ni milimi ji mizabibu jimali kwononywa.

¹³ Visaka viamafwa kandi nivigunzanguvu vimera mu kivala cha vandu vange. Musiome kigira zinyumba ziosi zia vandu vaali nu vusangali kandi musiome kigira lidaala linene iliali liovomenyo vuduukiru.

¹⁴ Kali inyumba yu vwami ilakalekwe, kandi lidaala liveeye linene ligali lilakang'anywi. Hango ho vomenyo kandi, minaara jaavakinga vilava amang'anye mihiga ni mihiga. Zibunda ziu mumulitu zilagendagenda mu, kandi amagondi galakanyole yo uvwayiru.

¹⁵ Navuzwa ing'inga yindi kandi Nyasaye alakuhanira Roho viamo. Kivala chi changarangwi kilava mulimi mugunamu gwi viavo.

¹⁶ Vuli havundu mu kivala, likalaga liu vulungi nu vusuuvirifu lilavaho.

¹⁷ Kigira vuli mundu alakola agaveeye amalungi, mirembe ni likingwa vilavaho mihiga ni mihiga.

¹⁸ Avandu va Nyasaye valava avavoholore kutura mu lihenda mwoyo liavo. Hango haavo halava hovomenyo vwi likingwa kandi hi mirembe.

¹⁹ Navuzwa imbura ya magina ilakuba mu militu, kandi lidaala linene liradivizwa ligali.

²⁰ Vuli mundu alakave navuyanziki lwa mazi nagaveho muvunyingi agukusama ku vitagwa kandi nuvwayiru vunyingi havundu hoosi vwi zibunda kandi mitugu?