Isaya 30 - KITABU KITAKATIFU

Livugilizana lia vuzwa na Egebeti

¹ Yahova umali kovora, “Kivi keveeye ku yavo avamiiha Ivuyuda kigira vamali kwibaala ku inzi. Valonda liloohiza lia inzi mburi kolomba, kandi valomba livugilizana liavo vugira inzi, nivameeda uvwoni ku vundi.

² Vazizaa koteeva ovokonyi kutura ku mwami wa Egebeti vugira koteeva zing'anagani ziange. Veenye mwami wa Egebeti avasoore, kunangwa vaviika lisuuvira liavo mu mwami wa Egebeti.

³ Navuzwa zinguru ziu mwami wa Egebeti ziladuuka ku keheri, na likingwa lienyu kutura Egebeti lilahera mu lidivizwa.

⁴ Kali niiva avanene vaavo vamali kuduuka mu kivala cha Egebeti, mu madaala manene ga Zoani na Hanesi,

⁵ Avandu vi Ivuyuda valaduuka mu zisoni zinene kigira vaasuuvira mu ihiiri yavula kuhaana ovokonyi kuvo lwaveenya kukingwa.”

⁶ Yili ni Likuva lia Nyasaye ku zinyama zimenyi mu changarangwi chi Isavaalu kilangwa Negebu, “Avatumwa vagenda kuvitira mu vivara viveeye nu vuhimwa, wi Zisimba zimenyaa kandi wi Vihirigoma kandi Zinzoka ziburukaa ziuvusungu zimenyaa. Avatumwa yava vagingira uvutugi vwavo ku zibunda kandi zing'amia kuhilira ihiiri itaveeye novokonyi kuvo.

⁷ Vokonyi vwa avandu va Egebeti vahaana si vuveeye kindu mba. Kunangwa mali kugulika Egebeti ‘Goyoka ogonene gutaveeye ni isumu.’ ”

Avandu va Isiraeli Vasuura Lihulira

⁸ Nyasaye yambolera ng'ode likuva yili ku kibaho imbiri wavo, kandi ng'ode mu kitabu, liduuki kuva kelorekizu kuvo kuli vaali mihiga ni mihiga.

⁹ Avandu yava vibaaraa ku Nyasaye vuli kazozo, vaveeye vana vuvugadi, avana valivula kuhulira miigizu ga Yahova.

¹⁰ Vavoolera avaporofeti vakiring'ane. Vavoola, “Mutamolomi kukunyi kigira agaveeye malungi mba. Mukovolere agakweenya kuhulira. Leki kulindi guvugadi giitu.

¹¹ Muturi munzira yitu na muleke ku kwigalira. Sikwenyaa kulira kigira Nyasaye winyu Mutakatifu wa Isiraeli mba.”

¹² Navuzwa yaga nigo aga Nyasaye Mutakatifu wa Isiraeli avoora: “Musuraa aga inzi muvooleraa na musuuviraa mu vutindi kandi mu vugadi.

¹³ Munyi muveeye na mahiolo. Muveeye kuli lidigi litambi ilimali kwadika nukusiavuka kutura igulu kuduuka hasi; nonoho mulagwa.

¹⁴ Mulatanywa kuli inyingu yi lidohi, imali kuduvulanywa ligali, kali kedonye chi kijonjo si kinyala kololeka ikinyala kwanzala umulu anoho kudaha amazi mu kidaho mba.”

¹⁵ Yahova Mwami Wuvunyali, Nyasaye Mutakatifu wa Isiraeli, avooreraa avandu, “Mwirane ku inzi galaha, kandi musuuviri inzi. Nimukora ndio, mulava ni zinguru kandi mulava mulikingwa.” Navuzwa si mwenya kokora ndio mba!

¹⁶ Muvogono yivwo, mulohiza kwiruka kutura ku vasigu vinyu ni munini ku zibarasi ziruka zimbiru ligali. Kandi muveeye vulahi kwiruka nigo aga mwenyeka mukore! Muganaganaa zibarasi zienyu ziveeye ni zimbiru ligali navuzwa avamulondelaa valakave nizimbilu kuvita zienyu.

¹⁷ Avandu 1,000 ku munyi valiruka zimbiru ligali lwa valora musikari mulala musigu, kandi avasikari 5 vuzwa valamuloomba mwosi kwiruka zimbiru ligali; kali mulala sialatigala ku vandu viliihi lienyu, nigataveeye musaala gwembendera gweng'ine kusonga yi kiguru!

¹⁸ Navuzwa Yahova alindiliraa kumuvererera zimbavasi. Aveeye mwetegeke kumanyia zimbavasi ku mwinye kigira akolaa agaveeye malungi kazozo. Vaveeye nu vugasu yavo avasuuviraa mu Yahova.

Nyasaye Alagasiza Avandu veve

¹⁹ O, munyi avandu va Ziyoni, avamenyi mu Jerusalemi, si mulasioma kandi mba. Yahova aveeye wizimbavasi, kandi lwamumwanira amukonye, alamutivulira.

²⁰ Yahova alamuviika mu zing'inga ziu vudinyu, navuzwa alavaho kumwigiza kandi simulamwenyeleliza kandi mba.

²¹ Lwa mugendagendaa kutura kunzira yu mukono mulungi anoho kunzira yu mukono mumosi, mulahulira umwoyo gwigwe kutura inyima winyu nigovoora, “Inzira ni yiyi, mulonde kuyo.”

²² Maku mulavugula vifananyi vienyu iviavakwa ku ifeza, kandi vifananyi viavakwa izahabu, ma muvisiuve ihale ligali kuli kindu kifunyi na muvoore, “Tuli muzimoni ziange!”

²³ Yahova alakubiza imbura ku vitagwa mu milimi jinyu, vilamera kandi vilava ni liama linyingi kandi mulava ni ligesa lilahi. Mitugu jinyu jilava nu vwayiru vunyingi.

²⁴ Zibunda ni zigiriki zilimaa milimi jinyu, zilalia viukulia vilahi, nu vunyasi vulahi.

²⁵ Ku ing'inga yene yeyo, lwa minaara javasigu vinyu jirakagumilwi na vandu vaavo kwitwa, migera ja amazi jilakatuli kutura kuvuli kiguru kitambi.

²⁶ Uvulavu vwu mweli vulakave kuli uvulavu vwi liuva, na uvulavu vwi liuva vulakamedeke haali saba kuvita kazozo, kuli uvulavu vwa amadiku saba mu lidiku lilala. Yaga goosi galakekoleke lwa Yahova avoheleraa nokohonyia zing'oma ziamali kuha avandu veve.

Nyasaye Alahaana Amageri ku Avandu va Asiria

²⁷ Zinguru nu vukumi vwa Yahova vunyala kololeka kutura ihale. Muliru nu mwochi vimanya vutima vwivwe. Amulomaa na makuva geege gasambaa kuli muliru gudivizaa.

²⁸ Atumaa imbuza imbiri weve, kuli mugera gwa amazi ugumali kwizura guhilana vuli kindu keveeye imbiri wagwo! Alahaana amageri ku zihiiri nu kuzidiviza ligali kandi aheliza liloohiza liavo lidamanu.

²⁹ Navuzwa munyi avandu va Nyasaye, mulimba zinyimbu ni musaangara kuli mukoraa mu ing'inga yu vudiku vwe lilia litakatifu. Mulimba ni musaangara kuli mundu agendaa kunzira niyimba nilirere kuzia mu Litembeli lia Yahova, mukingi wa avandu va Isiraeli.

³⁰ Avandu vosi valahulira mwoyo gwa Yahova gwilitiihiza kandi valahulira vululu vwu vutima vwivwe. Uvutima vwivwe vulava kuli olomemo lwu muliru gusambaa, kandi kuli liatuluruka lia malesi, imbura yamagina kandi imbura yizingulu.

³¹ Avandu va Asiria valava nu vuti lwavahulira mwoyo gwa Yahova kandi valahulira vulitu vwa mageri geege.

³² Lwa Yahova ahaanaa amageri ku vandu va Asiria vuli ing'inga, avandu veve valimba zinyimbu nu kukuba zindumba nu vukana. Nyasaye mwene alwaana avandu va Asiria.

³³ Mu madiku ga kale, havundu haloombwa hukusambira mwami wa Asiria nu muliru munene. Haveeye havundu havambalaru kandi hazia musi, vaviika mu zingu zinyingi ligali. Mwika gwa yahova gulava kuli lomemo gwu kuhambiza muliru.